ޕޮލްކޯގެ ކޮރަޕްޝަން ބަލާއިރު ފުލުހުންގެ ވެރިންނަށް މަގާމުތަކުގައި ތިބެވިދާނެތޯ ސުވާލު އުފައްދައިފި

ފުލުހުންނަށް ފްލެޓް އެޅުމުގައި އެ އިދާރާގެ ވެލްފެއާ ކުންފުންޏަށް ކުރެވިފައިވާ ކޮރަޕްޝަންގެ ތުހުމަތުގައި ފުލުހުންގެ އިސް ވެރިންގެ ޝާމިލުވުން ބޮޑުކަން ފާހަގަކުރެވޭ ކަމަށާއި އެހެންވެ އެ މައްސަލަ ބަލާއިރު އެ ބޭފުޅުން މަގާމުތަކުގައި ތިބެވިދާނެކަމާ މެދު، އެ މައްސަލަ ދިރާސާކުރާ މާލިއްޔަތު ކޮމިޓީގެ ސަބް ކޮމިޓީން ސުވާލު އުފައްދައިފި އެވެ.

މިއަދު ބޭއްވި ބައްދަލުވުމުގައި އެ ކޮމިޓީގެ މުގައްރިރު ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވީ، ޒިންމާދާރު މަގާމުތައް ކަމަށްވާ އެސިސްޓެންޓް ކޮމިޝަނަރުންނާއި ޑެޕިއުޓީ ކޮމިޝަނަރުންނަށް ތިއްބެވި ބޭފުޅުން ވެސް ފޮލްކޯއިން ހިންގި ކޮރަޕްޝަނުގެ މައްސަލަތަކުގައި ބައިވެރިވެފައިވާކަން އޮޑިޓް ރިޕޯޓުން ފާހަގަކުރެވޭ ކަމަށެވެ.

"އޮޑިޓަ ޖެނެރަލްގެ ރިޕޯޓުގެ ޗާޓު އެކެއްގައި މުހިއްމު 16 އިވެންޓެއް އެބަ އޮވޭ. އޭގެ މަރުހަލާތަކުގައި އެބޭފުޅުން [ފުލުހުންގެ އިސްވެރިން] އެބަތިބި ބައިވެރިވެފައި. އަޅުގަނޑަށް ގަބޫލުކުރެވެނީ އެ މައްސަލައިގެ ކަންކަން ކުރިއަށްދާ އިރު އެ ބޭފުޅުން އެ މަގާމުތަކުގައި ތިބެގެން ކުރިއަށްދާނީތޯ ނުވަތަ ނޫންތޯ އެބަޖެހޭ ނިންމަން،" އޭނާ ވިދާޅުވި އެވެ.

ފުލުހުންގެ ފްލެޓްތަކާ ގުޅޭ ރިޕޯޓުގައިވާ ގޮތުން ފްލެޓްތަކުގެ މަޝްރޫއުގެ އެގްރީމެންޓް ތިން ފަހަރެއްގެ މަތިން ބަދަލުކޮށް، މަސައްކަތުގެ އަގަށް 122 މިލިއަން ރުފިޔާ އިތުރުކޮށް މަސައްކަތް ނިންމަން ކަނޑައެޅި ތާރީހު 54 މަހަށް ދިގު ދަންމާފައިވެ އެވެ. އެ ޕްރޮޖެކްޓް އެންމެ ފުރަތަމަ ހަވާލުކުރީ 580 މިލިއަން ރުފިޔާއަށް ދެ އަހަރު ތެރޭ ނިންމަން، ނޫމަޑި ކުންފުންޏަށެވެ. އެކަމަކު މަސައްކަތް ނިމުނު އިރު އެ ޕްރޮޖެކްޓަށް އެއް ބިލިއަން ރުފިޔާ ވަނީ ހަރަދުވެފަ އެވެ.

ނާޒިމް ވިދާޅުވީ މައްސަލަ ދިރާސާ ކުރަމުން އަންނަ އިރު، ފުލުހުންގެ ވަޒީފާގައި މަސައްކަތް ކުރަމުން އަންނަ "ވިސުލްބްލޯވާ" އެއްގެ ފަރާތުން ވެސް އިތުރު ކަންކަން ފާހަގަކޮށް، ލިޔެކިޔުންތަކެއް ލިބިފައިވާ ކަމަށެވެ. އޭގައިވާ ގޮތުން ޕޮލްކޯއިން ހަމައެކަނި ކޮރަޕްޝަން ހިންގާފައިވަނީ ހައުސިން ޕްރޮޖެކްޓްގެ ތެރެއިން ނޫން ކަމަށާއި އެއަށްވުރެ ފުޅާ ދާއިރާއެއްގައި ވެސް މުދަލާ ހިދުމަތް ހޯދުމުގައި ޕޮލްކޯގެ ތެރެއިން ކޮރަޕްޝަން ހިންގާކަމަށް މައުލޫމާތު ހިއްސާކޮށްފައިވާ ކަމަށް އޭނާ ވިދާޅުވި އެވެ.

"އޭގައި ހަވާލާ ދީފައި އޮތް އޭރުގެ ކޮމިޝަނާ އޮފް ޕޮލިހަށް ފޮނުވާފައިވާ ރިޕޯޓެއް. އަޅުގަނޑުމެން އެބަ ބޭނުންވޭ، ވިސުލްބްލޯވާ ގާނޫނުގައި އަޅުގަނޑުމެން ބައުންޑް ވަނީ ކިހާވަރަކަށްތޯ ވެސް ބަލަން. ވިސުލްބްލޯވާގެ ޑޮކިއުމެންޓެއް ވީމަ އެ ހެންޑުލްކުރަން ޖެހޭނީ ވެސް ތަފާތުކޮށް،" އޭނާ ވިދާޅުވި އެވެ.

އެ ވާހަކަތައް، ހާމަކުރި ނަމަވެސް، ނާޒިމްގެ ވާހަކައިގެ ވަކި ހިސާބުން ވަނީ މައިކްގެ އަޑު ކަނޑާލައިގެން ކުރިއަށް ގެންގޮސްފަ އެވެ. މަޖިލީހުގެ އިދާރާއިން ބުނީ، އެ ކޮމިޓީގެ މައިކްގެ އަޑު ކަނޑާލައިގެން ކުރިއަށް ގެންދިޔައީ "އޯފް ދަ ރެކޯޑު" ވާހަކަތައް ކުރިއަށް ގެންދިއުމަށް ކަމަށެވެ. އެހެންވެ، ކޮމިޓީގައި ފަހުން ނިންމި ނިންމުންތަކުގެ ތަފްސީލެއް ހާމައެއް ނުވެ އެވެ.

ޖޫން، 23، 2013 ގައި ފެށި ފުލުހުންގެ ހައުސިން ޕްރޮޖެކްޓް، ބްލޫސް ހައުސިންއާ ގުޅިގެން ހަދައި އާއްމުކޮށްފައިވާ އޮޑިޓުގައި ބުނެފައިވާ ގޮތުގައި އެ މަޝްރޫއުއަށް މިހާތަނަށް 1.06 ބިލިއަން ރުފިޔާ ހަރަދުކޮށްފައިވެ އެވެ. އަކަފޫޓަކަށް 1،851 ރުފިޔާގެ ރޭޓުން ހަރަދުކޮށްފައިވާ އިރު މިހާތަނަށް ކުރި ހަރަދަކީ މަޝްރޫއުގެ ދެގުނަ އަގު ކަމަށް އޮޑިޓުގައިވެ އެވެ.

މިފަދަ ބޮޑެތި ޕްރޮޖެކްޓްތައް ހިންގުމުގެ ފަންނީ ގާބިލުކަން ޕޮލްކޯގައި ނެތް ކަމަށާއި ކޮންޓްރެކްޓަރުންނަށް ފައިދާވާ ގޮތަށް އެއްބަސްވުންތަކަށް ބަދަލުގެނެސްފައިވުމާއި ފްރޯޑާއި ކޮރަޕްޝަނުގެ އަމަލުތަކަށް ޝައްކުކުރެވޭ ކަންކަން މި މަޝްރޫއުގެ ތެރޭގައި ހިންގާފައިވާ ކަމަށް ވެސް އޮޑިޓަށް ފަހު ނެރުނު ރިޕޯޓްގައިވެ އެވެ. އަދި މިއީ ވަކި ފަރާތަކަށް މަންފާ ލިބޭ ގޮތަށް ހިންގި ޕްރޮޖެކްޓެއް ކަމަށް ވެސް ބުނެފައިވެ އެވެ.

ޕޮލްކޯ އިން ހަދާފައިވާ 628.7 މިލިއަން ރުފިޔާގެ ކޮންޓްރެކްޓްތަކަކީ ވަކި ފަރާތަކަށް ސީދާ ގޮތުންނާއި ނުސީދާ ގޮތުން ގުޅުން ހުރޮ ކުންފުނިތަކެއް ކަމަށް ބެލެވޭ ކަމަށާއި އެ ފަރާތަކީ ނޫމަޑީގެ ރެޕްރެސެންޓަޓިވް، އައިލެންޑް އެކްސްޕާޓްގެ މެނޭޖިން ޑިރެކްޓަރު އަދި ދެކޯމަސްގެ މާޗަންޓް ކޮމްޕެނީގެ މެނޭޖިން ޑިރެކްޓަރާ އާއިލީ ގުޅުން އޮންނަ މީހެއް ކަމަށް ބެލެވޭ ކަމަށް ބުނެފައިވެ އެވެ.

މި އޮޑިޓާ ގުޅިގެން އެންޓި ކޮރަޕްޝަން ކޮމިޝަނުން ވެސް ތަހުގީގެއް ވަނީ ފަށައިފަ އެވެ. އަދި މި މައްސަލަ އިތުރަށް ތަހުގީގުކުރަން ބަލާއިރު މައްސަލައާ ގުޅޭ މުހިންމު ލިޔެކިޔުންތައް ފުލުހުންގެ "ސާވާއަށް ޖެހުނު މައްސަލައަކުން" ގެއްލިފައިވާ ކަމަށް ބުނެފައިވާ ކަމަށް ވެސް އޮޑިޓަ ޖެނެރަލް ވިދާޅުވެފައިވެ އެވެ.