ކަރާ ކިލޯއެއް 25ރ. އަށް، ތޮއްޑޫގައި 600 ޓަނުގެ ކަރާ ހައްދައިފި

އަންނަ ހަފުތާގައި ފަށާ މި އަހަރުގެ ރޯދަމަހާ ދިމާކޮށް އއ. ތޮއްޑޫގައި 500-600 ޓަނާ ދެމެދުގެ އަދަދަކަށް ކަރާ ހައްދާނެ ކަމަށް ލަފާކުރެވޭ ކަމަށް އެ ރަށު ކައުންސިލުން މިއަދު ބުނެފި އެވެ.

ކައުންސިލްގެ ރައީސް އަހުމަދު ކަރަމް ވިދާޅުވީ، ތޮއްޑޫން ކުރިއަށް އޮތް ރޯދަމަހަށް ހާއްސަކޮށް 114 ދަނޑެއްގައި ކަރާ ހެއްދުމުގެ މަސައްކަތް ކުރި ކަމަށާއި ރޯދަމަހުގެ ފުރަތަމަ ދުވަހުގެ ކުރިން، ކަރާގެ ފުރަތަމަ ސްޓޮކް މާލެ ގެންނާނެ ކަމަށެވެ.

އޭނާ ވިދާޅުވީ، މިދިޔަ ވިއްސާރަ މޫސުމާ ގުޅިގެން ބައެއް ކަރާ ދަނޑުތަކުން ކަރާ ލިބުމުގައި ލަސްތަކެއް ކުރިމަތިވި ނަމަވެސް ރޯދަމަހަށް ބޭނުންވާ ވަރަށް ކަރާ ލިބޭނެ ކަމަށެވެ. ތޮއްޑޫގައި 2.4 މިލިއަން އަކަފޫޓުގެ ސަރަހައްދެއްގައި ދަނޑުވެރިކަން ކުރެ އެވެ.

ލޯކަލް މާރުކޭޓުގައި މިވަގުތު ކަރާ ކިލޯއެއް ލިބެން ހުރީ 25ރ. އަށެވެ. އެއީ އިންޑިއާ ކަރާ އެވެ. މި ފެށޭ ހަފްތާގައި ރަށްރަށުން ކަރާ ގެންނާނެ ކަމަށް ވިޔަފާރިވެރިން ވެސް ލަފާކުރެ އެވެ. ބައެއް ވިޔަފާރިވެރިން ބުނީ، ރަށްރަށުގައި ހައްދާ ކަރާގެ އަގު 30ރ. އަށް އެރުމުގެ ފުރުސަތު އެބައޮތް ކަމަށެވެ. އެއީ މިހާރު ވެސް، މަދުން ލިބެން ހުންނަ ކަރާގެ އަގު އިންޑިއާ ކަރަލަށް ވުރެ ބޮޑުވުމުން ކަމަށް އެ މީހުން ބުންޏެވެ.

ރޯދަމަހު ދިވެހިން އެންމެ ގިނައިން ބޭނުން ކުރާ އެއް ބާވަތަކީ، ކަރަލެވެ. ކޮންމެ ރޯދަމަހަކު ވެސް ބާޒާރުގައި އެންމެ ބޮޑަށް ޑިމާންޑު އުފުލެނީ ވެސް ކަރަލުގަ އެވެ.