ސީއެސްސީން ޖަމާއަތްތެރިންގެ އެލަވަންސް ކަނޑާލުމުން ސިޓީ ކައުންސިލް ބަޖެޓުން ފައިސާ ދެނީ

ސިވިލް ސާވިސް ކޮމިޝަން (ސީއެސްސީ) އިން ޖަމާއަތްތެރިންނަށް ދެމުންއައި "ގަބުރުސްތާން އެލަވަންސް" އިން އުނިކުރިބައި، މާލެ ސިޓީ ކައުންސިލްގެ ބެލުމުގެ ދަށުން މަސައްކަތްކުރާ ޖަމާއަތްތެރިންނަށް އެ ކައުންސިލްގެ ބަޖެޓުން ދޭން ނިންމައިފި އެވެ.

މީގެ ކުރިން ޖަމާއަތްތެރިންނަށް މުސާރައިގެ އިތުރުން 1،500ރ. ގެ އެލަވަންސެއް ލިބުނެވެ.

އެ ފައިސާ ކަނޑާލަފައިވާކަން ސީއެސްސީން އެންގީ މިދިޔަ ބުރާސްފަތި ދުވަހު ހުރިހާ ސިޓީތަކާއި އަތޮޅު އަދި ރަށު ކައުންސިލެއްގެ ސެކްރެޓަރީ ޖެނެރަލުންނަށް ފޮނުވި ސާކިއުލާއެއްގަ އެވެ. އެ އެލަވަންސް ދިނުމުގައި މާލިއްޔަތު ގަވައިދަށް ފުށުނާރާ ގޮތަށް، ކައުންސިލްގެ ފުދުންތެރިކަމަށް ރިއާޔަތްކޮށް ކައުންސިލުން ކަނޑައަޅާ ގޮތަށް އަމަލު ކުރުމަށް އެދޭ ކަމަށް އެންގި ނަމަވެސް އެ އެލަވަންސް ކަނޑާލި ސަބަބެއް ހާމައެއް ނުކުރެ އެވެ.

މާލޭ ސިޓީ ކައުންސިލްގެ ދަށުގައި ތިބި ޖަމާއަތްތެރިންނަށް އެ ތަނުގެ ބަޖެޓުން އެ ފައިސާ ދޭން ހުށަހެޅީ މޭޔަރު އާދަމް އާޒިމް އެވެ.

އެ ޖަލްސާގައި މޭޔަރު ވިދާޅުވީ، ޖަމާއަތްތެރިންނަކީ މުހިންމު އަދި މާތް މަސައްކަތެއް ކުރާ ބައެއް ކަމަށާއި ކުއްލިއަކަށް ވަކި ސަބަބެއް ބަޔާން ކުރެއްވުމެއް ނެތި، ޖަމާއަތްތެރިންގެ އެލަވަންސް ކަނޑާލުމަކީ އިންސާފުވެރި ގޮތެއް ނޫން ކަމަށެވެ.

އިއްޔެގެ ޖަލްސާގައި ހުރިހާ މެމްބަރުންގެ އިއްތިފާގުން ވަނީ ކައުންސިލް ބަޖެޓުން އެ ފައިސާ ދޭން ފާސްކޮށްފަ އެވެ.

ގަލޮޅު އުދުރު ދާއިރާގެ ކައުންސިލަރު މުހައްމަދު ސައިފް ފާތިހު ވިދާޅުވީ ރޯދަމަހާ ދިމާކޮށް މުސާރައިން އެ ވަރުގެ ބޮޑު އެއްޗެއް ކަނޑާލުމުން ދަތިވާނެ ކަަމަށެވެ. އެއީ ރަނގަޅަށް ކުރި ކަމެއް ނޫންކަން ފާހަގަ ކޮށް އެލަވަންސް ކަނޑާލި ސަަބަބު ހޯދަން ސީއެސްސީއަށް ހުށަހެޅުމަށް ވެސް އިއްޔެގެ ބައްދަލުވުމުގައި ވަނީ ފާސްކޮށްފަ އެވެ.