ވިނަރެސް ފްލެޓުގެ އެޕާޓްމަންޓެއްގައި ރޯވެ އަނދައިފި

ހުޅުމާލެ 2 ގެ ވިނަރެސް ފްލެޓުގެ އެޕާޓްމަންޓެއްގައި މިއަދު ހެނދުނު ރޯވެ، ވަރަށް ބޮޑަށް އަނދައިފި އެވެ.

އެ ހާދިސާގައި އެއްވެސް މީހަކަށް އަނިޔާއެއް ނުވާ ކަމަށް އެމްއެންޑީއެފް ފަޔާ ސާވިސް އިން ބުންޏެވެ.

އެމްއެންޑީއެފުން ބުނިގޮތުގައި އަލިފާން ރޯވީ ވިނަރެސް ފްލެޓް ނުވައެއްގެ 13 ވަނަ ފަންގިފިލާގެ ހަ ވަނަ އެޕާޓްމަންޓުގަ އެވެ.

އެތަނަށް އެމްއެންޑީއެފުން ދިޔައީ ހެނދުނު 7:41 ހާއިރު އެޕާޓްމަންޓުން ދުން އަރާކަމުގެ މައުލޫމާތު ލިބިގެން ކަމަށް ވެސް ބުންޏެވެ.

އެމްއެންޑީއެފުން ބުނީ ހުޅުމާލޭ ފަޔާ ސްޓޭޝަނުން އެ ތަނަށް ގޮސް، ރޯވެފައިވާ އަލިފާންގަނޑު ނިއްވާލާފައިވާ ކަމަށެވެ.

އެމްއެންޑީއެފުން ހިއްސާކުރި ފޮޓޯގައިވާ ގޮތުން ކޮޓަރީގައި ހުރި ބަންކް ބެޑުގައި ރޯވެ އެއްކޮށް އޮތީ އަނދައިފަ އެވެ. އަދި ކުޑަދޮރުގެ ފޮތިގަނޑު ވެސް އެއްކޮށް އަނދައިގެން ގޮސް އޮތީ ބިންމަތީގަ އެވެ.

އަލިފާން ރޯވީ ގޮދަޑީގައި ކަމަށް ބުންޏަސް އަލިފާން ރޯވީ ކީއްވެ ކަމެއް ސާފެއް ނޫނެވެ.