ހުޅުމާލެ 2 އާ ސްކޫލުން ޖާގައަށް އެދި 500 އަށް ވުރެ ގިނަ ކުދިން

ހުޅުމާލެ 2 ގައި އިމާރާތް ކުރަމުންދާ އާ ސްކޫލް ކަމަށްވާ ޝަހީދު އަލީ ސްކޫލުން 500 އަށް ވުރެ ގިނަ ކުދިންގެ ޖާގައަށް މިހާތަނަށް އެދިފައިވާ ކަމަށް އެޑިޔުކޭޝަން މިނިސްޓްރީން ބުނެފި އެވެ.

މާލެ ސަރަހައްދުގެ އެކި ސްކޫލްތަކުގައި ކިޔަވަމުންދާ ކުދިންނަށް އެ ސްކޫލުން ޖާގައަށް ހުޅުވާލީ މިދިޔަ މަހު އެވެ. އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު "މިހާރު" އަށް މިއަދު ވިދާޅުވީ ފޭސް 2 ގައި ދިރިއުޅޭ ދަރިވަރުންގެ ތެރެއިން 800 އަށްވުރެ ގިނަ ކުދިން ހުޅުމާލެ ފޭސް 1 އަދި މާލޭގެ ސްކޫލުތަކުގައި ކިޔަވަމުންދާ ކަމަށެވެ.

އެ ދަރިވަރުންގެ ތެރެއިން އާ ސްކޫލަށް 525 ކުދިން ބަދަލުކުރަން މިހާތަނަށް ފޯމު ހުށަހަޅާފައިވާ ކަމަށް ވެސް އިސްމާއިލް ވިދާޅުވި އެވެ.

މުޅި ރާއްޖޭގައި ވެސް އެންމެ ހަލުވިކޮށް އާބާދީ އިތުރުވަމުންދާ ހުޅުމާލެ 2 ގައި މިހާރު އިމާރާތް ކުރަމުން އަންނަ އާ ސްކޫލުގެ މަސައްކަތް މި އަހަރުގެ ނޮވެމްބަރު މަހަށް ނިމި އަދި އަންނަ އަހަރުގެ ޖެނުއަރީ މަހު ކިޔަވައިދޭން ފަށާނެ ކަމަށް ވެސް މިނިސްޓަރު ވިދާޅުވި އެވެ.

ގްރޭޑް 1-10 އާ ހަމައަށް ކިޔަވައިދޭނެ އެ ސްކޫލަކީ އެއްދަންފަޅި އަށް 1،500 ކުދިންނަށް ކިޔަވައިދޭ ސްކޫލެކެވެ. ނަމަވެސް މިނިސްޓްރީން ނިންމާފައިވަނީ އާ ސްކޫލުން ޖާގަ ބޭނުންވާ ކުދިން ގިނަ ނަމަ ދެ ދަންފަޅި އަށް ބަދަލު ކުރުމަށެވެ. އެއީ ވީހާ ވެސް ގިނަ ކުދިންނަށް ފަސޭހަކޮށް، އެ ކުއްޖެއްގެ ގެއާ ކައިރި ސްކޫލަކަށް ދިއުމުގެ ފުރުސަތު ދިނުމަށެވެ.

އެ ސްކޫލުގައި 32 ކުދިންގެ ޖާގައިގެ 54 ކްލާސްރޫމާއި އޮޑިޓޯރިއަމް އަދި ލައިބްރަރީ އާއި 20 ކުދިންގެ ޖާގައިގެން ތިން ލިފްޓު ވެސް ހުންނާނެ އެވެ.

މިހާރު ހުޅުމާލެ 2 ގައި ހުރިހާ ގްރޭޑެއްގައި ކިޔަވައިދެނީ ހަމައެކަނި ސަލާހުއްދީން ސްކޫލުގަ އެވެ.

ހުޅުމާލެ އަށް މިހާރު ވެސް އިތުރު ހަތް ސްކޫލް ބޭނުންވާ ކަމަށް މިނިސްޓްރީން ކުރިން ވަނީ ބުނެފަ އެވެ.