މާލޭ މަގުމަތީގައި ކަނޑި އާއި ވަޅި ހިފައިގެން އުޅުނު ދެ މީހަކު ހައްޔަރުކޮށްފި

މާލޭގެ މަގުމަތީގައި ކަނޑިއަކާއި ވަޅިތަކެއް ހިފައިގެން އުޅުނު ދެ މީހަކު ފުލުހުން މިދިޔަ އާދިއްތަ ދުވަހުގެ ރޭ ހައްޔަރުކޮށްފި އެވެ.

އެ މައްސަލާގައި ހައްޔަރުކުރީ ގދ. ހޯނޑެއްދޫ ކެލާގެ، މުހައްމަދު އާރިފް އާއި ސ. މީދޫ ވައިލެޓްހައުސް، ހައިކަލް އަބްދުﷲ ޝާތިރެވެ.

މި ދެ މީހުންގެ ބަންދު އަމުރުގައިވާ ގޮތުން، އެ ދެ މީހުން ހައްޔަރުކުރީ އާއްމުތަނެއްގައި ތޫނު ހަތިޔާރު ގެންގުޅުނު މައްސަލައެއްގަ އެވެ.

ކޯޓުގައި ފުލުހުން ބުނީ 21 އަހަރުގެ ހައިކަލްއާ އެކު ހުރި 33 އަހަރުގެ އާރިފްގެ އަތުން ކަނޑިއަކާއި ވަޅިއެއްގެ އިތުރުން ސާޖިކަލް ވަޅިއެއް ފެނުނު ކަމަށެވެ. އޭނާގެ އަތުގައި އޮތް ސާޖިކަލް ވަޅި، ފުލުހުން ފެނުމާ އެކު ބިންމައްޗަށް ވައްޓާލީ އެވެ. އެ މީހުން ގެންގުޅުނު ކަނޑީގެ ތިލައިގައި ދެ ފޫޓު 10 އިންޗި ހުރި ކަމަށް ފުލުހުން ބުންޏެވެ.

އެކި މައްސަލަތަކުގައި ފުލުހުންގެ ބެލުމުގެ ދަށަށް މީގެ ކުރިން ވެސް ގެންދިޔަ ހައިކަލް ބުނީ، ކަނޑި އާއި ވަޅި ގެންގުޅުމުގައި އޭނާގެ އެއްވެސް ބައިވެރިވުމެއް ނެތް ކަމަށެވެ. އެ ތަނުގައި އޭނާ މަޑުކޮށްގެން ހުރީ އާރިފް ގެންގުޅުނު ވަޅިތައް ކަނޑަން، އަލިކޮށްދޭން އެދުމުން ކަމަށް އަމުރުގައިވެ އެވެ.

ފުލުހުން، ކޯޓުގައި ބުނީ އެކި މައްސަލަތަކުގައި ބަންދު ކޮށްފައިވާ އާރިފް، އެ ހަތިޔާރުތައް ގެންގުޅެން ޖެހުނު ސަބަބެއް ބުނެ ނުދެވުނު ކަމަށެވެ.

ދެ މީހުންގެ ބަންދަށް ވެސް ކްރިމިނަލް ކޯޓުން ވަނީ 15 ދުވަސް ޖަހައިފަ އެވެ.