ނަތަންޔާހޫ ބުނަނީ ފަލަސްތީނުގެ ދައުލަތެއް އުފެދުނަ ނުދޭނެ ކަމަށް

ފަލަސްތީނުގެ ދައުލަތެއް އުފެދުނަ ނުދޭނެ ކަމަށް، ފަލަސްތީނުގެ ހުޅަނގު އައްސޭރީގައި ޔަހޫދީން އާބާދުކުރުމުގެ ބޮޑު މަޝްރޫއެއް ފެށުމުގެ ރަސްމިއްޔާތުގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އިއްޔެ ބުނެފި އެވެ.

"ފަލަސްތީނުގެ ދައުލަތެއް އުފެދުނު ނުދޭނެ ކަމުގެ ވައުދު އަހަރެމެން ފުއްދާނަން. މިއީ އަހަރެމެންގެ ބިމެއް،" ގުދުސްގެ އިރުމަތީ ފަރާތުން ޖެހިގެން އޮންނަ މައާލީ އަދުމީމްގައި ޔަހޫދީން އާބާދުކުރަން ފެށުމުގެ ރަސްމިއްޔާތުގައި ނަތަންޔާހޫ ބުންޏެވެ.

އޭނާ ބުނީ އެ ސިޓީގައި އާބާދީ ދެ ގުނަ ބޮޑުކުރާނެ ކަމަށާއި ޔަހޫދީންގެ ތާރީހާއި ސަގާފަތް ދިރުވައި ޔަހޫދީންނަށް ރައްކާތެރިކަން ކަށަވަރުކުރާނެ ކަމަށެވެ.

ޔަހޫދީން އާބާދުކުރަން ހުޅަނގު އައްސޭރީގައި 12 އަކަ ކިލޯމީޓަރު (ފަސް އަކަ މޭލު) ގެ ސަރަހައްދެއް ތަރައްގީކުރަން އިޒްރޭލުން ރާވައިގެން އުޅޭތާ އެތައް އަހަރެއް ވެއްޖެ އެވެ. އެކަމަކު ބައިނަލްއަގުވާމީ ޕްރެޝަރާ ހެދި އެކަން ކުރިއަށް ނުގެންދެވި އޮތީ އެވެ.

އާބާދުކުރަން ނިންމާފައިވާ ސަރަހައްދު އޮންނަނީ ގުދުސް އާއި ޔަހޫދީންގެ އާބާދެއް ކަމަށްވާ މައާލީ އަދުމީމް، ފަލަސްތީނުގެ އުތުރާއި ދެކުނުން ގުޅުވައިދޭ މަގުތަކުގެ ތެރެއިންދާ ގޮތަށެވެ.

އިޒްރޭލުގެ ހަރުކަށި ކަނާތު ފިޔައިގެ ފިނޭންސް މިނިސްޓަރު ބެޒަލެލް ސްމޮޓްރިޗް ވަނީ އެ ބިމުގައި 3،400 ހައުސިން ޔުނިޓް އިމާރާތް ކުރުމުގެ ޕްލޭނަށް ތާއީދުކޮށްފަ އެވެ.

އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވިދާޅުވީ މި ޕްލޭންގެ ސަބަބުން ހުޅަނގު އައްސޭރި ބައިވެ، ފަލަސްތީނުގެ ދައުލަތެއް އުފެއްދުމަށް ހުރަސްއެޅޭނެ ކަމަށެވެ.

އިޒްރޭލުން 1967 ވަނަ އަހަރުން ފެށިގެން ހުޅަނގު އައްސޭރިން ހިފައި ޔަހޫދީން ވަޒަންވެރިކޮށްފައިވާ ހުރިހާ ސަރަހައްދުތަކަކީ، އިޒްރޭލުގެ ޕްލޭނިން އެޕްރޫވަލް އޮތް ނަމަވެސް، ބައިނަލްއަގުވާމީ ގާނޫނުތަކާ ހިލާފު ތަންތަނެވެ.

ފަލަސްތީނުގެ ދައުލަތެއް ބަލައިގަނެ އދ. ގެ އާންމު މަޖިލީހުގައި އެކަން އިއުލާނުކުރުމަށް އިނގިރޭސި ވިލާތާއި ފްރާންސް ފަދަ ނުފޫޒު ގަދަ އެތައް ގައުމަކުން މަސައްކަތްކުރަމުން އަންނަ އިޒްރޭލުން ގެންދަނީ އެކަމާ ދެކޮޅުހަދަމުންނެވެ. އަދި ފަލަސްތީނުގެ ދައުލަތް އިއުލާނުކޮށްފި ނަމަ އިޒްރޭލުން ވެސް އަމިއްލައަށް ކަންކަން ނިންމާނެ ކަމުގެ އިންޒާރު ދީފައިވެ އެވެ. -- އޭއެފްޕީ