ރިއަލް އެސްޓޭޓް ދާއިރާ އަށް ދޫކުރި ލޯނުގެ އަދަދު 3.5 ބިލިއަނަށް

ރިއަލް އެސްޓޭޓް ވިޔަފާރިތަކަށް ބޭންކުތައް މެދުވެރިކޮށް ނެގި ލޯނުގެ އަދަދު 3.5 ބިލިއަން ރުފިޔާ އަށް އަރައިފި އެވެ.

މަރުކަޒީ ބޭންކު، އެމްއެމްއޭގެ ހިސާބުތައް ދައްކާ ގޮތުން މިއީ މިދިޔަ އަހަރުގެ ޖުލައި މަހަށް ވުރެ 1.1 ބިލިއަން ރުފިޔާ އިތުރު އަދަދެކެވެ. އެއީ ގާތްގަނޑަކަށް 45 ޕަސެންޓުގެ އިތުރުވުމެކެވެ.

މިދިޔަ ތިން އަހަރު ރިއަލް އެސްޓޭޓް ވިޔަފާރިތަކަށް ރާއްޖޭގެ ބޭންކްތަކުން ދޫކޮށްފައިވަ ލޯނުގެ އަދަދު ވަނީ 67 ޕަސެންޓަށް އިތުރު ވެފަ އެވެ.

ރާއްޖޭގެ ބޭންކުތަކުން ދޫކުރާ ލޯނުގެ 10 ޕަސެންޓް ނިސްބަތް ވަނީ ރިއަލް އެސްޓޭޓަށެވެ. އެންމެ ގިނަ އަދަދެއްގެ ލޯނު ދޫކުރަނީ ޓޫރިޒަމް ދާއިރާއަށެވެ. މި އަހަރުގެ ޖުލައި މަހުގެ ނިޔަލަށް ބޭންކުތަކުން ޓޫރިޒަމްގެ ހިދުމަތްދޭ ތަންތަނަށް ދޫކުރި ލޯނުގެ އަދަދު 12.5 ބިލިއަން ރުފިޔާ އަށް އަރަ އެވެ.

ރިއަލް އެސްޓޭޓްގެ އިތުރުން ކޮސްޓްރަކްޝަން ދާއިރާ އަށް ވެސް ޖުލައި މަހުގެ ނިޔަލަށް 6.2 ބިލިއަން ރުފިޔާގެ ލޯނު ދޫކޮށްފައި ވެ އެވެ.

ޖުލައި މަހުގެ ނިޔަލަށް ބޭންކުތަކުން ޖުމްލަ ދޫކުރި ލޯނުގެ އަދަދު 35.6 ބިލިއަން ރުފިޔާ އަށް އަރަ އެވެ. އެއީ ޖޫން މަހަށް ވުރެ 500 މިލިއަން ރުފިޔާ އިތުރު އަދަދެކެވެ. މިއީ މިދިޔަ އަހަރުގެ ޑިސެމްބަރު މަހަށް ވުރެ 1.7 ބިލިއަން ރުފިޔާ އިތުރު އަދަދެކެވެ.