އެމްޓީސީސީގެ ހިއްސާދާރުންގެ ފައިސާއަށް އިހުމާލުވި މައްސަލަ ބަލަނީ

ކުރީގެ އޮޑިޓް ރިޕޯޓުތަކުގައި އެމްޓީސީސީގެ ފައިސާއަށް އިހުމާލުވެފައިވާ ކަމަށް އޮތުމުން، އެކަންކަން ބެލުމަށް އަންގާފައިވާ ކަމަށް އެ ކުންފުނިން މިއަދު ބުނެފި އެވެ.

އެމްޓީސީސީން ނެރުނު ބަޔާނެއްގައި ބުނީ އެ ކުންފުންޏަކީ ހިއްސާދާރުންގެ ކުންފުންޏަކަށް ވާއިރު މިދިޔަ އަހަރުތަކުގެ އޮޑިޓް ރިޕޯޓުގައި ހިއްސާދާރުންގެ ފައިސާއަށް އިހުމާލުވެފައިވާ ކަމަށް ފެންނަ ކަމަށެވެ.

އެކަން ގަވާއިދުން ތަހުގީގުކޮށް، އިހުމާލުވި ފަރާތްތަކުން އަތުން އެ ފައިސާ ހިއްސާދާރުންނަށް ހޯދައިދިނުމަށް ކަމާބެހޭ ފަރާތްތަކުގައި އެދިފައިވާ ކަމަށް އެމްޓީސީސީން ބުންޏެެވެ.

އެމްޓީސީސީން ބުނި ގޮތުގައި އެކަން ތަހުގީގުކޮށް ޝަރީއަތުގެ ކުރިމައްޗަށް ގެނައުމަށް އެ ކުންފުނީގެ ފަރާތުން ދޭންޖެހޭ އެއްބާރުލުން ދޭނެ އެވެ. އެކަމަކު އިހުމާލުވީ ކިހާ ފައިސާއަކަށް ކަމެއް އަދި ކޮން ބައެއް ކަމެއް އެމްޓީސީސީއަކުން ހާމައެއް ނުކުރެ އެވެ.

އެމްޓީސީސީގެ ފައިސާއަށް އިހުމާލުވި ކަމަށް ބުނެ، އެ މައްސަލަ ބަލަމުން އަންނަ ކަމަށް އެ ކުންފުނިން ބުނިއިރު، މިރޭ އެޗްޑީސީން ވެސް ވަނީ 2019 އިން 2023 ގެ ނިޔަލަށް އެ ކުންފުނީގެ 200 މިލިއަނެއްހާ ރުފިޔާއަށް ހިޔާނާތްތެރިވި ކަމަށް ބުނެ އެކަން ބެލުމަށް ކަމާބެހޭ އިދާރާތަކަށް ހުށަހަޅާފައިވާ ކަމަށް ބުނެފަ އެވެ.