ރާއްޖެ އާއި ތަޖިކިސްތާނު މެޗަށް "ފޯރީގައި ދަނޑަށް"

އޭޝިއަން ކަޕް ކޮލިފައިންގައި ރާއްޖެ އާއި ތަޖިކިސްތާން މާލޭގައި ބައްދަލުކުރާ މެޗު ފޯރިގަދަކުރުމުގެ ގޮތުން "ފޯރީގައި ދަނޑަށް" ނަމުގައި ހާއްސަ އިވެންޓެއް އެފްއޭއެމުން އިއްޔެ ހަވީރު އާޓިފިޝަލް ބީޗުގައި ބާއްވައިފި އެވެ.

ކޮލިފައިންގައި ބާކީ ތިން މެޗު ވެސް އޮތީ ރާއްޖޭގަ އެވެ. ފުރަތަމަ މެޗުގައި ތަޖިކިސްތާނާ ދެކޮޅަށް ނުކުންނާނީ އަންގާރަ ދުވަހު ހަވީރު އެވެ. ފިލިޕީންސް މެޗު އޮތީ ނޮވެމްބަރުގަ އެވެ. އަދި އީސްޓް ޓިމޯއާ ދެކޮޅަށް ކުޅޭނީ މާޗު މަހު އެވެ.

ދުވަސްތަކަކަށް ފަހު ގަލޮޅު ދަނޑުގައި ގައުމީ ޓީމު މެޗު ޕްރޮމޯޓްކުރުމުގެ ގޮތުން އިއްޔެ ބޭއްވި އިވެންޓުގައި އެފްއޭއެމްގެ އިސްވެރިންނާއި، ގައުމީ ޓީމުގެ ކުޅުންތެރިންނާއި، އޮފިޝަލުން ބައިވެރިވި އެވެ.

ކުޑަކުދިންނަށް ހާއްސަ ހަރަކާތްތަކެއް ކުރިއަށް ގެންދިޔަ މި އިވެންޓުގައި، ކުޑަކުދިންގެ މެދުގައި މަގުބޫލު ރޯބޯޯ މޭންގެ ހަރަކާތްތަކާއި ބިދަބިން ބޮޑުބެރު ގުރޫޕްގެ ހަރަކާތްތައް ވެސް އޮތެވެ.

އަދި ގައުމީ ޓީމުގެ ކުޅުންތެރިންނާ އެކު ފޮޓޯ ނެގުމާއި އޮޓޯގްރާފް ނެގުން ވެސް ކުރިއަށް ދިޔަ އެވެ. އަދި ސާފް ޗެމްޕިއަންޝިޕް ޓްރޮފީ އާއި ސައުތު އޭޝިއަން ސުޕަ ކަޕް ޓްރޮފީއާއެކު ފޮޓޯ ނެގުން ވެސް އިއްޔެގެ މި ހާއްސަ އިވެންޓުގައި ކުރިއަށް ދިޔަ އެވެ.

ތަޖިކިސްތާން މެޗުގެ ޓިކެޓް ވެސް އިއްޔެގެ އިވެންޓުގައި ވަނީ ވިއްކައިފަ އެވެ. ގޮނޑިބަރިން ޓިކެޓެއް ވިއްކަނީ 100ރ. އަށެވެ. އަދި ސިޑިބަރީގެ އަގަކީ 50ރ. އެވެ.

މިއަދުން ފެށިގެން ޓިކެޓް ވިއްކާނީ ގަލޮޅު ދަނޑުގަ އެވެ.

އާދީއްތަ: 14:00 - 18:00 އަދި 20:00 - 22:00

ހޯމަ: 10:00 - 12:00، 14:00 - 18:00 އަދި 20:00 - 22:00

އަންގާރަ: 10:00 އިން ފެށިގެން