އައްޑޫ ވޯޓު: "ފޭދުއަށް 25 މިލިއަން، ހުޅުދުއަށް 14 މިލިއަން އަދި މީދުއަށް 18 މިލިއަންގެ ބްލޮކް ގްރާންޓު ލިބޭނެ"

އައްޑޫ ސިޓީ ކައުންސިލުގެ ދަށުން އިދާރީ ގޮތުން ހުޅުދު އާއި މީދޫ އަދި ފޭދޫ ވަކިކޮށް، އެ ތިން ރަށުގައި ވަކިވަކި ކައުންސިލްތައް ހަދަން ފެނޭތޯ ބަލަން އަންނަ ހޮނިހިރު ދުވަހު ނަގާ ވޯޓުގައި ސަރުކާރުން ބޭނުންވާ އެއްވެސް ގޮތެއް ނެތް ކަމަށާއި ވަކި ކައުންސިލްތައް ހަދަން އެ ތިން ރަށުން ނިންމައިފި ނަމަ ސަރުކާރުން ދޫކުރާ ބްލޮކް ގްރާންޓު ވެސް ވަކިން ލިބޭނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

ލ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ފޮނަދޫގައި ބޭއްވި ޖަލްސާގައި ރައީސް ވިދާޅުވީ، އެ މަނިކުފާނު ރިޔާސީ އިންތިހާބުގެ ކެމްޕެއިނަށް އައްޑު އަށް ވަޑައިގަތުމުން ފޭދު އާއި ހުޅުދު އާއި މީދޫގެ ރައްޔިތުން އެދުނީ އެ ތިން ރަށުގައި ވަކިވަކި ކައުންސިލްތައް އުފެއްދުމާ ގުޅޭ ކަންތައްތަކުގައި ސަރުކާރުން ހައްލެއް ހޯދައިދޭން ކަމަށެވެ. އެހެންވެ، ހަތަރު ދުވަސް ފަހުން ކުރާ ކަމަކީ އެ ވައުދު ފުއްދެވުމާ ގުޅޭ ކަންތައްތަކުގައި ވޯޓެއް ނެގުން ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވީ، އެ ތިން ރަށުގެ ރައްޔިތުންގެ ފަރާތުން އެ މައްސަލަ ލިބިވަޑައިގަތުމުން ދަންނަވާފައި ވާނީ ވަކިވަކި ކައުންސިލްތައް އުފެއްދުމާ ގުޅޭ ގޮތުން ދާއިމީ ހައްލެއް ހޯއްދަވައި ދެއްވަން މަސައްކަތްޕުޅު ކުރައްވާނެ ކަމަށެވެ.

"އަޅުގަނޑަށް އެ ކަން ކުރެވޭނީ ރައްޔިތުން ގާތު އަހައިގެން، ނިޒާމުގެ ތެރެއިން، ގާނޫނީ ނިޒާމުގެ ތެރެއިން. އެހެންވީމާ ރައްޔިތުން ގާތު އަޅުގަނޑު މި އަހަނީ ރައްޔިތުން ބޭނުންވާ ގޮތެއް ނިންމަވާށޭ. އެހެންވީމާ އެ ރައްޔިތުން އެ ނިންމަވާ ކޮންމެ ގޮތެއް އެެއީ ސަރުކާރުގެ ނިންމުން، ސަރުކާރުން ތާއީދު ކުރާނެ ގޮތް،" ރައީސް ވިދާޅުވި އެވެ.

"ސަރުކާރުން ވަކި ޕްރިފާ ކުރާ ވަކި ބޭނުންވާ އެއްވެސް ނިންމުމެއް އެ އަކު ނެތް. އައްޑޫ ސިޓީގެ މިހާރު އޮތް ކޮމްޕޮޒިޝަން ބޭއްވުން ކަމަށް ވިޔަސް ސަރުކާރުން އެ އަށް ތާއީދުކޮށް ފުރިހަމަ އަށް އެެއްބާރުލުން ދޭނެ ކަމެއް. ވަކިވަކި ކައުންސިލްތަކެއް ފޭދޫންނާއި ހުޅުދޫންނާއި މީދޫން ނިންމެވިޔަސް ސަރުކާރުން ފުރިހަމަ އަށް އެއްބާރުލުން ދޭނެ."

ރައީސް މުއިއްޒު ވިދާޅުވީ، މުޅި އައްޑޫ ސިޓީ އަށް މިހާރު ކަނޑައަޅާފައި އޮންނަނީ "އެއް ބަޖެޓު" ކަމަށާއި އެކަމަކު ރައްޔިތުން ނިންމާ ގޮތަކުން ކުރިމަގުގައި ފޭދު އާއި ހުޅުދު އާއި މީދޫ އަށް ވަކި ބަޖެޓެއް ލިބޭނެ ކަމަށެވެ. އެ ގޮތުން ރައީސް ފާހަގަކުރެއްވީ ކޮންމެ ކައުންސިލަަކަށް ދައުލަތުގެ ބަޖެޓުން ދޫކުރާ ބްލޮކް ގްރާންޓު ނުވަތަ ހިލޭ ދޫކުރާ ފައިސާ އެވެ.

އެ މަނިކުފާނު ވިދާޅުވި ގޮތުގައި، ފޭދޫގެ ރައްޔިތުން ވަކި ކައުންސިލެއް ހަދަން ނިންމައިފި ނަމަ އަހަރަކު 25 މިލިއަނެއްހާ ރުފިޔާ އެ ކައުންސިލަށް އެކަނި ލިބޭނެ އެވެ.

"ހުޅުދޫ ކައުންސިލަށް ލިބޭނެ ގާތްގަނޑަކަށް 13 ނުވަތަ 14 ވަރަކަށް މިލިއަން ރުފިޔާ ބްލޮކް ގްރާންޓުގެ ގޮތުގައި. މީދޫ ކައުންސިލަށް ލިބޭނެ ގާތްގަނޑަކަށް 18 މިލިއަން ރުފިޔާ ބްލޮކް ގްރާންޓުގެ ގޮތުގައި، މިއީ އާބާދީގެ ނިސްބަތުންނާއި އެ ކަހަލަ ބައެއް އިންޑިކޭޓާސް އަށް ބިނާކޮށް ހަދާ އެއްޗެއް ވީމާ،" ތަފުސީލް ދެއްވަމުން ރައީސް ވިދާޅުވި އެވެ.

ރައީސް މުއިއްޒު ވިދާޅުވި ގޮތުގައި ބްލޮކް ގްރާންޓުގެ ތަފުސީލް ދެއްވީ އެ ވާހަކަތައް ވެސް ބައެއް މީހުންނަށް އޮޅުން ނުފިލާ ކަމަށް ގަބޫލުފުޅު ކުރެއްވޭތީ އެވެ. ރައީސް ވިދާޅުވީ، އައްޑޫ ވޯޓުގައި ސަރުކާރުން ވަކިކޮޅެއް ނުނެގި ނަމަވެސް ހަގީގަތް އޮޅޭ ގޮތަށް ބައެއް ފަރާތްތަކުން ވާހަކަ ދައްކާ ނަމަ ސާފުކޮށްދިނުމަކީ އެ މަނިކުފާނުގެ ޒިންމާއެއް ކަމަށެވެ.