ސައޫދީ ވަލީ އަހުދު އެމެރިކާގެ ރައީސްއާ ބައްދަލުކުރައްވަނީ

ސައޫދީ އަރަބިއްޔާގެ ވެރިކަމުގެ ޒިންމާތައް އަދާކުރައްވާ ވަލީ އަހުދު މުހައްމަދު ބިން ސަލްމާން އަންނަ މަހު އެމެރިކާއަށް ވަޑައިގެން، ރައީސް ޑޮނަލްޑް ޓްރަމްޕާ ބައްދަލުކުރައްވާނެ ކަމަށް ސައޫދީ ސަރުކާރާ ގާތް ގުޅުމެއް އޮންނަ ފަރާތަކުން އޭއެފްޕީއަށް ކަށަވަރުކޮށްދީފި އެވެ.

ނަން ހާމަ ނުކުރުމަށް ޝަރުތުކޮށް ވާހަކަ ދެއްކެވި އޮފިޝަލް ވިދާޅުވީ މުހައްމަދު އެމެރިކާއަށް ވަޑައިގަންނަވާނީ އަންނަ މަހުގެ 17 ވަނަ ދުވަހު ކަމަށާއި އޭގެ އަނެއް ދުވަހު ޓްރަމްޕާ އެކު ރަސްމީ މަޝްވަރާތައް ކުރިއަށް ގެންދާނެ ކަމަށެވެ.

މި ދަތުރު ހަމަޖެހިފައިވާކަން ހާމަކޮށްފައި މި ވަނީ ފަލަސްތީނުގެ ޣައްޒާގައި ދެމުން ދިޔަ ހަމަލާތައް ދެ އަހަރަށް ފަހު ހުއްޓުމަކަށް ގެނުވި، ޓްރަމްޕުގެ ހުށަހެޅުމަށާއި އެއްބަސްވުމަށް ސައޫދީން ވަރަށް ހޫނު މަރުހަބާއެއް ކިޔާފައި ވަނިކޮށެވެ.

އޮކްޓޫބަރު 7، 2023 ގައި އިޒްރޭލުން ޣައްޒާއަށް ހަމަލާތައް ދޭން ފެށުމުގެ ކުރިން އެމެރިކާ އާއި ސައޫދީން ދިޔައީ ސަލާމަތީ ގޮތުންނާއި ހަކަތައިގެ ދާއިރާއިން ޔަގީންކަން ދިނުމުގެ ބަދަލުގައި އިޒްރޭލާ އެކު އާދައިގެ ގުޅުމަކަށް ރުޖޫއަވުމާ ބެހޭ ގޮތުން މަޝްވަރާކުރަމުންނެވެ.

ޣައްޒާއަށް އިޒްރޭލުން ހަމަލާތައް ދޭން ފެށުމާ އެކު ސައޫދީން ވަނީ އެމެރިކާއާ އެކު މި މަޝްރާތައް ހުއްޓާލައިފަ އެވެ. އަދި ފަލަސްތީނުގެ މިނިވަން ދައުލަތެއް ގާއިމު ނުކުރެވެނީސް އިޒްރޭލު ބަލައިނުގަންނާނެ ކަމަށް ވަނީ ތަކުރާރުކޮށް ބުނެފަ އެވެ. -- އޭއެފްޕީ