ލުބްނާންގެ ފޭސްބުކް އެކްޓިވިސްޓް ދޫކޮށްލަން ގޮވާލައިފި

ދައުލަތުގެ ވެރިންގެ އަބުރަށް އަރައިގަތުމުގެ ކުށުގައި ހައްޔަރުކޮށްފައި ހުރި، ލުބްނާންގެ ސޯޝަލް މީޑިއާ އެކްޓިވިސްޓް އަހްމަދު އަމްހާޒް ވަގުތުން ދޫކޮށްލައި އޭނާގެ މައްޗަށް ކޮށްފައިވާ ދައުވާ އަނބުރާ ގެންދިއުމަށް، މީޑިއާ އިދާރާތަކުންނާއި އިންސާނީ ހައްގުތަކަށް މަސައްކަތް ކުރާ ބައެއް ފަރާތްތަކުން ގޮވާލައިފި އެވެ.

ބައެއް މީޑިއާތަކާއި ހިއުމަން ރައިޓްސް ވޮޗުން ނެރުނު ބަޔާނުގައި ބުނެފައިވަނީ އަމްހާޒް ހައްޔަރުކުރި ކުރުން އެ ފަރާތްތަކުން ކުށްވެރި ކުރާ ކަމަށެވެ. އަދި އޭނާ ހައްޔަރުކޮށްފައިވަނީ ލުބްނާންގެ ގާނޫނުތަކާ ޚިލާފަށް ކަމަށް ވެސް އެ ބަޔާނުގައިވެ އެވެ.

ލުބްނާންގެ ގާނޫނު ހަދާ މަޖިލީހުގެ ރައީސަކީ ކިނބުލެއް ކަމަށާއި ބޮޑުވަޒީރަކީ ހިމާރެއް ކަމަށާއި ގައުމުގެ ރައީސަކީ، މިހާތަނަށް އެއީ ކޮން ބާވަތެއްގެ ޖަނަވާރެއް ކަން ނޭނގޭ ޖަނަވާރެއް ކަމަށް ބުނެ ފޭސްބުކްގައި ލިޔުނު ލިޔުމަކާ ގުޅިގެން އޭނާ ހައްޔަރު ކުރީ މި މަހުގެ 21 ވަނަ ދުވަހު އެވެ.

އޭނާގެ މައްޗަށް އުފުލާފައިވާ ދައުވާ ސާބިތުވެއްޖެ ނަމަ ދެ އަހަރުގެ ޖަލު ހުކުމެއް އަންނާނެ އެވެ. އޭނާ މިނިވަން ކުރުމަށް ގޮވާލައި ނެރުނު ބަޔާނުގައި ބުނެފައިވަނީ، އޭނާގެ މައްޗަށް ކޮށްފައިވާ ތުހުމަތުގައި އަސްލެއް ނެތް ކަމަށާއި އަބުރާ ބެހުމަކީ ޖިނާއީ ކުށެއްގެ ގޮތުގައި ގާނޫނުގައި އޮންނަ އޮތުން ބަދަލު ކުރުމަށް ލުބްނާންގެ ގާނޫނު ހަދާ މަޖިލީހަށް ހުށަހަޅާނެ ކަމަށެވެ.

އެ ބަޔާނުގައި ބުނެފައިވާ ގޮތުގައި އަބުރާ ބެހުމަކީ ޖިނާއީ ކުށެއްގެ ގޮތުގައި އޮތުމަކީ ލުބްނާންގެ އިންސާނީ ހައްގުތަކާ ބެހޭ ގަވާއިދުތަކާއި ބައިނަލްއަގުވާމީ ގާނޫނުތަކާ ވެސް ޚިލާފު ކަމެކެވެ. ސޯޝަލް މީޑިއާގެ ތަފާތު ވަސީލަތްތަކުގައި ވަކިވަކި ފަރުދުން ލިޔާ ލިޔުންތަކާ ގުޅިގެން ލުބްނާން ސަރުކާރުން މިހާރު ދަނީ އެ ފަރާތްތަކާ މެދު ފިޔަވަޅު އަޅަމުންނެވެ.