ދިއްލީގެ ރެޑް ފޯޓް އޭރިއާގައި ކާރެއް ގޮވައި އެތައް ބަޔަކު މަރުވެއްޖެ

އިންޑިއާގެ ވެރިރަށް ނިއު ދިއްލީ މަޝްހޫރު ރެޑް ފޯޓް އޭރިއާގައި ކާރެއް ގޮވައި މަދުވެގެން 8 މީހަކު މަރުވެ 19 މީހަކު ޒަހަމްވެއްޖެ އެވެ.

މި ހާދިސާ ހިނގާފައި މި ވަނީ ފަރީދްއާބާދުން، ގޮވާޒާތުގެ ގިނަ އަދަދެއްގެ ސާމާނު ފެނި ދިއްލީގައި ސަލާމަތީ ފިޔަވަޅުތައް ވަރުގަދަކޮށްފައި ވަނިކޮށެވެ.

ސަލާމަތީ ފިޔަވަޅުތައް ވަރުގަދަ، ދިއްލީގެ މެދުތެރޭގެ ހައި ސެކިއުރިޓީ ޒޯނެއްގައި މި ހާދިސާ ހިނގި ގޮތެއް ނޭނގި ކަންބޮޑުވުން ވަނީ އިތުރުވެފަ އެވެ. އެހެންވެ ދިއްލީގެ އިތުރުން މުމްބާއީގައި ވަނީ ސަލާމަތީ ކަންތައް ބެލެހެއްޓުން ވަރަށް ބޮޑަށް އިތުރުކޮށް އެލާޓް ލެވަލް މަތިކޮށްފަ އެވެ. މިއީ ޓެރަރިސްޓު ހަމަލާއެއް ކަމަށް އިންޑިއާގެ ބައެއް މީޑިއާތަކުން ރިޕޯޓްކުރި ނަމަވެސް ރަސްމީ އިދާރާއަކުން އަދި އެފަދަ ވާހަކައެއް ނުބުނެ އެވެ.

ދިއްލީގެ ޑެޕިއުޓީ ފަޔަ ޗީފް ވިދާޅުވީ ޓްރެފިކް ލައިޓެއްގެ ކައިރިއަށް، ވަަރަށް މަޑުން ގޮސް ހުއްޓި ކާރެއް ގޮވި މި ހާދިސާގައި ހަ ވެހިކަލެއްގައި ރޯވި އެވެ. މީގެ ތެރޭގައި ހަ އޮޓޯ ރިކްޝޯ ވެސް ހިމެނެ އެވެ.

މި ހާދިސާ ހިނގި ރެޑް ފޯޓް ސަރަހައްދަކީ އިންޑިއާގެ މަޝްހޫރު ލޭންޑްމާކެކެވެ. ސަތާރަ ވަނަ ގަރުނުގައި ބިނާކޮށްފައިވާ އެ ތަނަށް އިންޑިއާ މީހުންނާއި ޓޫރިސްޓުންގެ އެތައް ހާސް ބަޔަކު ކޮންމެ ދުވަހަކު ޒިޔާރަތްކުރެ އެވެ.

މިއީ އިންޑިއާގެ ގާނޫނު ހަދާ މަޖިލީހާ ފަސް ވަރަކަށް މޭލު ދުރެވެ. އަދި ކާރޫބާރު ބޮޑު ވިޔަފާރީގެ ހަބް ޗާންދަނީ ޗައުކް ސަރަހައްދާ ވެސް ވަރަށް ކައިރި އެވެ.

މިއީ ކޮންމެ އަހަރެއްގެ އޮގަސްޓް މަހުގެ 15 ވަނަ ދުވަހު އިންޑިއާގެ ބޮޑުވަޒީރުން މިނިވަން ދުވަހުގެ ތަގުރީރު ދެއްވަން ވެސް ވަޑައިގަންނަވާ ސަރަހައްދެވެ.

ފުލުހުން ބުނީ ހާދިސާ ހިނގަން މެދުވެރިވި ސަބަބު އަދި ނޭނގޭ ކަމަށާއި ކަމާބެހޭ ހުރިހާ އިދާރާތަކެއް ގުޅިގެން ތަހުގީގު ފަށާފައިވާ ކަމަށެވެ.