އިތިއޯޕިއާގެ އަލިފާން ފަރުބަދައެއްގެ ދުން އިންޑިއާއާ ހިސާބަށް ގޮސް ދަތުރުތަކަށް ހުރަސްއެޅިއްޖެ

އިރުމަތީ އެފްރިކާގެ ގައުމެއް ކަމަށްވާ އިތިއޯޕިއާގެ ބޮޑު އަލިފާން ފަރުބަދައެއް ގޮވައި އެރި ބޯ ދުމުގެ އަސަރު އިންޑިއާއަށް ކުރުމުން ގިނަ ފްލައިޓްތަކެއް ކެންސަލް ކުރަން ޖެހިއްޖެ އެވެ.

އިތިއޯޕިއާގެ އަލިފާން ފަރުބަދައެއްގެ ދުން އިންޑިއާއަށް

އިފްރާޒް އަލީ

25 ނޮވެމްބަރ 2025

ބޭރުގެ ބައެއް ނޫސްތަކުގައި ބުނެފައިވާ ގޮތުގައި އިތިއޯޕިއާގެ އިރުމަތީގައި އޮންނަ އަފާރު ސަރަހައްދުގެ ހެއިލީ ގުއްބީ އަލިފާން ފަރުބަދަ 12،000 އަހަރުގެ ތެރޭގައި ފުރަތަމަ ފަހަރަށް ގޮވައި ފެތުރުނު ބޯ ދުމުގެ އަސަރު އެތައް ހާސް ކިލޯމީޓަރު ދުރަށް ކޮށްފައިވެ އެވެ.

މިދިޔަ އާދިއްތަ ދުވަހު ގޮވި އެ އަލިފާން ފަރުބަދައިން އެރި ދުމުގެ އަސަރު އެފްރިކާ އާއި މެދުއިރުމަތީގެ ގައުމުތަކަށް ކޮށްފައިވާއިރު، ދެކުނު އޭޝިއާގެ ގައުމުތަކަށް ވެސް އެ ދުމުގެ އަސަރުކުރާނެ ކަމަށް މިހާރު ލަފާކޮށްފައިވާ ކަމަށް ނޫސްތަކުގައިވެ އެވެ.

The Hayli Gubbi volcano, in Ethiopia’s Afar region, erupted for the first time in 10,000 years, and it is impacting flights as far as Delhi
A cloud of ash from the volcanic eruption moved across large parts of northwest India, sweeping over Rajasthan, Gujarat ,Delhi etc pic.twitter.com/TEej1EWOGa
— tweetsforupsc (@factsforupsc) November 25, 2025

އިންޑިއާގެ މޫސުމާ ބެހޭ އިދާރާއާ ހަވާލާދީ އެ ގައުމުގެ ނޫސްތަކުން މިއަދު ރިޕޯޓްކުރި ގޮތުގައި، އިތިއޯޕިއާގައި ގޮވި ފަރުބަދައިން އެރި ދުމުގެ އަސަރު އުތުރުގެ އިންޑިއާގެ ހިސާބުތަކަށް މިހާރު ވަނީ ކުރަން ފަށައިފަ އެވެ.

ދުމުގެ ސަބަބުން އިންޑިއާގެ ދެ އެއާލައިނެއް ކަމަށްވާ އެއާ އިންޑިއާ އާއި އަކާސާ އެއާގެ ބައެއް އިންޓަނޭޝަނަލް ފްލައިޓްތައް ވެސް މިއަދު ކެންސަލް ކޮށްފައިވާ ކަމަށް ރިޕޯޓްތައް ބުންޏެވެ.

އިއްޔެ އިން ފެށިގެން އެއާ އިންޑިއާގެ 13 ފްލައިޓެއް ކެންސަލްކޮށްފައި ވާއިރު، އިންޑިއާގެ އޭވިއޭޝަން ރެގިއުލޭޓަރު ޑިރެކްޓަރޭޓް ޖެނެރަލް އޮފް ސިވިލް އޭވިއޭޝަން (ޑީޖީސީއޭ) އިން ވަނީ ދުމުގެ އަސަރުކޮށްފައިވާ ރޫޓުތަކުން ދަތުރު ނުކުރުމަށް އިރުޝާދު ދީފަ އެވެ.

އަކާސާ އެއާ އިން ވަނީ ސައުދި އަރަބިއްޔާގެ ޖިއްދާ އާއި ޔޫއޭއީގެ އަބޫ ދާބީ އަދި ކުވެއިތައް ކުރާ ދަތުރުތައް މިއަދު ކެންސަލް ކޮށްފަ އެވެ.

Hayli Gubbi, a Volcano located in the Afar Region of Ethiopia had its first recorded eruption in thousands of years resulting in massive amounts of ash thousands of meters into the air in one of the busiest air traffic regions.
Map shows:Current (black) and forecasted ash cloud. pic.twitter.com/qEtqEAvwZY
— Jagriti Chandra (@jagritichandra) November 24, 2025

އިންޑިއާގެ މޫސުމާ ބެހޭ އިދާރާއިން ބުނީ އެ ދުންގަނޑުގެ މިސްރާބު މިހާރު ހުރީ އިންޑިއާގެ އިރުމައްޗަށް ކަމަށާއި މިއަދު އިރުއޮއްސޭ ފަހުން އިންޑިއާ ހުރަސްކޮށް، ޗައިނާގެ ހުޅަނގުގެ ސަރަހައްދަށް އެ ދުންގަނޑު ފެތުރޭނެ ކަމަށް ލަފާކުރެވޭ ކަމަށެވެ.

ފޯކާސްޓް މޮޑެލްތަކުން ދައްކާ ގޮތުގައި، އެ ދުމުގެ އަސަރު އިންޑިއާގެ ގުޖުރާތާއި ދިއްލީ އާއި ރާޖަސްތާނާއި ޕަންޖާބު އަދި ހަރްޔާނާއަށް ކުރާނެ އެވެ. އުތުރު އިންޑިއާގެ ޖައްވު މި ދުވަސްވަރު ވަރަށް ބޮޑަށް ތަޣައްޔަރުވެފައިވާއިރު، މި ކާރިސާގެ ސަބަބުން ހާލަތު އިތުރަށް ގޯސްވެދާނެ ކަމަށް އިދާރާތަކުން ވަނީ ލަފާކޮށްފަ އެވެ.

އިތިއޯޕިއާގެ އަލިފާން ފަރުބަދަ ގޮވައި އެރި ދުމުގެ އަސަރު ޔަމަނާއި އޮމާން އަދި ޕާކިސްތާނުގެ ބައެއް ސަރަހައްދުތަކަށް ކޮށްފައިވާ ކަމަށް ވެސް ރިޕޯޓްކޮށްފައިވެ އެވެ.

Comments