އަސާސީ ކާބޯތަކެތި ވިއްކަން އެސްޓީއޯގެ ހޯލްސޭލް ސެންޓަރެއް މާލޭގެ ބާޒާރުމަތީގައި ހުޅުވައިފި

ދައުލަތުގެ ވިޔަފާރި ކުންފުނި އެސްޓީއޯ އިން ވިއްކާ އަސާސީ ބާވަތްތަކުގެ އަދަދު މި އަހަރުގެ އޮކްޓޫބަރު 15 އިން ފެށިގެން އިތުރު ކޮށްފައިވާތީ އެ ބާވަތްތައް ވިއްކުން ފުޅާކުރުމަށްޓަކައި މާލޭގެ ބާޒާރުމަތީގައި އާ ހޯލްސޭލް ފިހާރައެއް މިއަދު ހުޅުވައިފި އެވެ،

"އެސްޓީއޯ ޕީޕަލްސް ޗޮއިސް ހޯލްސޭލް ސެންޓަ 2" ހުޅުވީ ކުރީގައި އެސްޓީއޯ ހޯމް އިމްޕްރޫވްމަންޓް ހިންގި އިމާރާތް ނުވަތަ މާލޭ ނޯތު ހާބަރުގެ ގޭޓު ކުރިމަތީގަ އެވެ.

އެސްޓީއޯ އިން ބުނީ، ބާޒާރުމަތީގައި ހޯލްސޭލް ސެންޓަރެއް ހުޅުވުމުގެ ބޭނުމަކީ އަސާސީ ކާބޯތަކެތީގެ ގޮތުގައި ކަނޑައަޅާފައިވާ 23 ބާވަތުގެ އިތުރުން އެ ކުންފުނިން ވިއްކާ ބްރޭންޑުތަކުގެ އުފެއްދުންތައް ހެޔޮ އަގެއްގައި ހޯލްސޭލްކޮށް ވިޔަފާރިވެރިންނަށާއި އާންމުންނަށް ފޯރުކޮށްދިނުމާއި މާލެ އިން ރަށްރަށަށް މުދާ އުފުލާ ބޯޓުތަކަށް އެ ތަކެތި ފަސޭހައިން ލިބޭނެ މަގު ތަނަވަސް ކޮށްދިނުން ކަމަށެވެ.

އެސްޓީއޯ އިން މާލޭގައި ހުޅުވި އާ ހޯލްސޭލް ފިހާރަ މެދުވެރިކޮށް، ދަނޑުވެރިން އުފައްދާ ބާވަތްތަށް ހޯލްސޭލްކޮށް ގަތުމުގެ އިންތިޒާމް ވެސް ހަމަޖެހޭނެ ކަމަށް އެ ކުންފުނިން ބުންޏެވެ.

"މީގެ ސަބަބުން ދަނޑުވެރީންނަށް އެ ފަރާތްތަކުން އުފައްދާ ބާވަތްތައް ވިއްކޭނެ ކަމުގެ ޔަގީންކަން ލިބި، މަސައްކަތް އިތުރަށް ކުރިއަށް ގެންދިއުމަށް އައު ހިތްވަރެއް ލިބިގެންދާނެ އެވެ،" އެސްޓީއޯ އިން މީޑިއާއާ ހިއްސާކުރި މައުލޫމާތުގައި ވެ އެވެ.

އެސްޓީއޯ އިން ވިއްކާ އަސާސީ ކާބޯތަކެތީގެ ލިސްޓަށް 23 ބާވަތެއް އިތުރުކުރީ ރާއްޖޭގެ ބާޒާރުގައި މޭވާ އާއި ތަރުކާރީގެ ބާވަތްތައް އާދަޔާ ހިލާފަށް އަގު ބޮޑުވާ މައްސަލައަށް ދާއިމީ ހައްލެއް ހޯދުމުގެ ގޮތުންނެވެ.

ކާޑުގެ ބާވަތްތަކުގެ އިތުރުން އަސާސީ ކާބޯތަކެތީގެ ލިސްޓަށް މި އަހަރުގެ އޮކްޓޫބަރުމަހުން ފެށިގެން އެސްޓީއޯ އިން އިތުރުކުރީ:

1- ދޮންކެޔޮ

2- އާފަލު

3- އޮރެންޖު

4- ލުނބޯ

5- ޖުމްހޫރީމޭވާ

6- އަނބު

7- ފަޅޯ

8- ކަރާ

9- މިރުސް

10- މޭބިސްކަދުރު

11- ފިޔާ (ރަތް)

12- އިނގުރު

13- ކެރެޓް

14- ބަށި

15- ކައްޓަލަ

16- ލޮނުމެދު

17- އަލުވި

18- ކެބެޖު

19- ބަރަބޯ

20- ބޯވެލި

21- މުގު (ރީނދޫ)

22- ކުކުޅު ބިސް

23- ކާށި

އެސްޓީއޯ އިން ނިންމާފައި ވަނީ އަސާސީ ކާބޯތަކެތީގެ ބާވަތްތައް ހޯލްސޭލްކޮށް ވިއްކުން އަދިވެސް ފުޅާކުރުމަށްޓަކައި، ހުޅުމާލޭގައި އެ ކުންފުނީގެ އައުޓްލެޓެއް ވަރަށް އަވަހަށް ހުޅުވާށެވެ.

އެސްޓީއޯ އިން ބުނީ، އެ ހުރިހާ ބާވަތްތައް އެ ކުންފުނިން މާލޭގައި ހިންގާ ދެ ފިހާރަ ކަމަށްވާ އެސްޓީއޯ ހޯލްސޭލް ސެންޓަރުންނާއި އެސްޓީއޯ ޕީޕަލްސް ޗޮއިސް މެދުވެރިކޮށް މިހާތަނަށް ވެސް އައީ މެދުނުކެނޑި ވިއްކަމުން ކަމަށެވެ.