މާލޭ ސިޓީ ކައުންސިލްގެ ޖަލްސާ ހޫނުވެ، ސީރިއަސް ތުހުމަތުތަކަކާ އެކު އާޒިމާއި ނަހުލާގެ ބޮޑު ކޯޅުމެއް!

މާލެ ސިޓީ ކައުންސިލުން ކުއްޔަށް ދޫކޮށްފައިވާ ބިމަކާ ގުޅޭ ލިޔެކިޔުންތަކެއްގެ މައްސަލާގައި މޭޔަރު އާދަމް އާޒިމާއި ވިލިމާލެ ދާއިރާގެ ކައުންސިލަރު ނަހުލާ އަލީ އެކަކު އަނެކަކަށް ސީރިއަސް ތުހުމަތުތަކެއް ކުރައްވައި، އެ ދެބޭފުޅުންގެ ދެމެދުގައި ބޮޑު ކޯޅުމެއް މިއަދު ހިނގައިފި އެވެ.

އޮޅުވާލައިގެން ބިން ހަވާލުކުރުމުގެ އެއްބަސްވުމެއްގައި ސިޓީ ކައުންސިލުން ސޮއިކުރަން އުޅުނު ކަމަށް ބުނާ މައްސަލައެއް މިއަދުގެ ޖަލްސާގެ އެޖެންޑާއަށް ނަހުލާ ވަނީ ހުށަހަޅުއްވައިފަ އެވެ. އެ މައްސަލައިގެ ބަހުސް ފެށުމުގެ މާ ކުރިން ނަހުލާގެ ނަން ވިދާޅު ނުވެ، މޭޔަރު އާދަމް އާޒިމް ވިދާޅުވީ ސިޓީ ކައުންސިލުން ކުއްޔަށް ދޫކޮށްފައިވާ ބިމަކާ ގުޅޭ ލިޔެކިޔުންތަކެއް ކައުންސިލަރަކު އިރާލި މައްސަލައެއް ތަހުގީގުކުރަން ފުލުހުންނާއި ލޯކަލް ގަވާމަންޓް އޮތޯރިޓީ (އެލްޖީއޭ) އަށް ހުށަހަޅުއްވާފައިވާ ކަމަށެވެ.

އާޒިމް ވިދާޅުވީ އެއީ ކައުންސިލުން އާންމުކޮށްފައިވާ ބިމުގެ ލިސްޓުގައި ނުހިމެނޭ ކަމަށް ބުނާ އެއްބަސްވުމަކާ ގުޅޭ ލިޔެކިޔުންތަކެއް ނައްތާލަން ކައުންސިލަރަކު މަސައްކަތްކުރި މައްސަލައެއް ކަމަށާއި އެ މައްސަލައިގެ ހެކި ފެންނަ ވީޑިއޯ ފުޓޭޖު އެބަހުރި ކަމަށެވެ.

އެ ވީޑިއޯ ފުޓޭޖު ކައުންސިލަރުންގެ ވަޓްސްއެޕް ގްރޫޕަށް ލުމަށް އާޒިމް ވަނީ ޖަލްސާ ކުރިއަށް ގެންދަނިކޮށް ކައުންސިލްގެ އެސްޖީގެ އަރިހުގައި އެދިވަޑައިގެންފަ އެވެ. އެހެންވެ، އެ ޖަލްސާ ކުރިއަށް ގެންދަނިކޮށް އެސްޖީ ވަނީ އެ ވީޑިއޯ ފުޓޭޖު ކައުންސިލަރުންގެ ވަޓްސްއެޕް ގުރޫޕަށް އަޕްލޯޑް ކުރައްވައިފަ އެވެ.

"މި ބިންތަކުގެ މައްސަލަ ޖެހިގެން މިކަމަށް އިންޓަފިއާކުރަން ވެގެން ފުލުހަށް މިހާރު ވާނީ މައްސަލަ ހުށަހަޅާފައި... ފުލުހުންނަށް މައްސަލަ ހުށަހަޅާފައި ވަނީ، ލިޔެކިޔުންތަކެއް ނައްތާލަން މިތަނުގެ ކައުންސިލަރަކު އެބައުޅޭ، މިތަނުގައި ފުޓޭޖު އެބަހުރި، އެ ފުޓޭޖާ އެކު މިހާރު ވަނީ މައްސަލަ ފުލުހަށް، ޖިނާއީ ތަހުގީގު ހިންގުމަށްޓަކާ ފޮނުވައިފައި. އެ ފުޓޭޖު ހިއްސާކުރާނަން ކާކުތޯ ސާފުކޮށް އެނގޭނެ،" އާޒިމް ވިދާޅުވި އެވެ.

އެ ވީޑިއޯ ފުޓޭޖުން ފެންނަނީ ވިލިމާލެ ދާއިރާގެ ކައުންސިލަރު ނަހުލާ، އޮފީސް ތެރޭގައި ހުރި ގަނޑުތަކެއް ނަންގަވައި އިރާލާ މަންޒަރެވެ. އަދި އެ ގަނޑުތައް ހިފައިގެން އުޅުނު އިދާރީ މުވައްޒަފަކު އޭނާ ކައިރީގައި ހުރެ އެވެ.

ނަހުލާ ލިޔެކިޔުންތަކެއް އިރާލި ކަމަށް ބުނާ މައްސަލައެއް ފުލުހަށް ހުށަހެޅި ކަމަށް އާޒިމް ވިދާޅުވީ އޭނާ ހުށަހެޅުއްވި މައްސަލައިގެ ބަހުސް ނުފެށެނީހެވެ. އެހެންވެ، ނަހުލާ ވަނީ ޖަލްސާގެ ތެރެއިން އެކަމަށް ހޫނު ރައްދެއް ދެއްވައިފަ އެވެ.

"މިއަށް އަޅުގަނޑު ބޭނުންވާނެ އިނގޭތޯ ވާހަކަދައްކަން. އަޅުގަނޑުގައި އަތުގައި ވެސް ހެކި އެބަހުރި އެ ދުވަހު އެތަނުގައި ހިނގާދިޔަ ހުރިހާ ކަމެއްގެ ފުޓޭޖާއި އޯޑިއޯ ރިކޯޑިންއާ އަދި އޭގެ ފަހުން އަޅުގަނޑަށް އެސްޖީ ގުޅާފައި ދެއްކެވި ވާހަކަ އާއި އެތަނުގައި އެ މުވައްޒަފު ބިމުގެ ފޭކް ޑޮކިއުމެންޓް ބެކް ޑޭޓްކޮށްފައި ހަވާލުކުރަން މަސައްކަތްކުރި ލިޔުމުގެ. މުވައްޒަފު ދައްކާފައި ހުރި ހުރިހާ ވާހަކައަކާ އެއްޗެހި އަޅުގަނޑުގެ އަތުގައި ވެސް އެބަހުރި،" ނަހުލާ ވިދާޅުވި އެވެ.

"ބުރާސްފަތި ދުވަހު މިކަމެއް ހިނގީ. އެހެންވީމަ، ބުރާސްފަތި ދުވަހުގެ ރޭ އޮންނާނީ ރަސްމީކޮށް ޖަލްސާއަށް މި މައްސަލަ އެޖެންޑާކުރުމަށް އެދި ހުށަހަޅާފައި. އެހެންވީމަ އަޅުގަނޑަށް ފުރުސަތު ނުދެއްވައި ރައްޔިތުންނަށް އޮޅޭ ގޮތަށް މިތަނުގައި ވާހަކަދައްކަވާނެ ކަމެއް ނެތް."

ނަހުލާ ވިދާޅުވީ "ގޯސްކޮށް ކަމެއް ކުރެއްވިއްޔޭ" ކަމަށް އެ މުވައްޒަފު ބުނަނީ މޭޔަރުގެ ނަން ކަމަށާއި އޭނާގެ އަތުގައި އޮތް އޯޑިއޯ ރެކޯޑިން އިން އެކަން ހާމަވާނެ ކަމަށެވެ.

"މިތަނުގައި ކެމްޕެއިން ކުރަން، މިތަނުގައި ޓިކްޓޮކް ހަދަން، މިތަނުގައި ބޭނުން އެއްޗެއް ވިދާޅުވެފައި އެހެނެއް އެކަމެއް ނުކުރެއްވޭނެ. އަޅުގަނޑަށް ދެއްވާ ފުރުސަތު ވާހަކަދައްކަވަން،" ނަހުލާ ހިތްހަމަނުޖެހިވަޑައިގެން ވިދާޅުވި އެވެ.

ނަހުލާ ވިދާޅުވީ އެ ދުވަހު އެސްޖީ ދެ ފަހަރެއްގެ މަތިން އޭނާއަށް ގުޅުއްވައި ދެއްކެވި ވާހަކައިން ވެސް މިކަން ހިނގާފައި އޮތްގޮތް ވަރަށް ސާފުކޮށް އެނގޭނެ ކަމަށާއި ލިޔެކިޔުންތައް ފޮރުއްވަން އުޅުއްވަނީ މޭޔަރުކަން ވެސް އެނގޭ ކަމަށެވެ.

"މިތަނުގައި ފުޓޭޖެއް ހުރިއްޔާ ފެންނާނީ އެ މުވައްޒަފު ބުރާސްފަތި ދުވަހު ބޯ ވާރޭގަނޑުގެ ތެރޭގައި ބިމެއް ހަވާލުކުރަން އެދި ގުޅައިގެން އޮފީހަށް ގެނައި މަންޒަރާއި އޮފީހަށް އަޅުގަނޑު އައީ ވިލިމާލޭގެ ޕްރޮޖެކްޓަކަށް ވާތީ، އެ ޕްރޮޖްކެޓު ހަވާލުވި ފަރާތުން ބިމާ ހަވާލުވާން އެދި ކައުންސިލުން ބުރާސްފަތި ދުވަހު ގުޅައިގެން އެ މީހާގެ އެދުމުގެ މަތިން އަޅުގަނޑު އައީ،" ނަހުލާ ވިދާޅުވި އެވެ.

އޮޅުވާލަން އުޅުއްވަނީ މޭޔަރު: ނަހުލާ

ޖަލްސާގެ ފަހުން ނަހުލާ ފޭސްބުކްގައި ކުރެއްވި ޕޯސްޓެއްގައި ވިދާޅުވީ ވިލިމާލޭގައި އައުޓްޑޯ ޖިމްއެއް އެޅުމަށް ޝަރުތުކޮށް މެރީ ޖޫގޯ ކިޔާ ކުންފުންޏަކަށް ސެޕްޓެމްބަރު 27، 2023 ގައި ދިން ބިން (ވިލިމާލެ ވިޔަވާރި ސަރަހައްދު ބްލޮކް ސީ އަދި ޕްލޮޓް 41) މާލޭ ބިމުގެ ދަފްތަރުގައި ނެތީ އެއްބަސްވުމެއް ނެތިގެން ކަމަށް މިދިޔަ މަހުގެ 26 ވަނަ ދުވަހު މޭޔަރު އާޒިމް ވިދާޅުވެފައިވާ ކަމަށެވެ.

ނަމަވެސް، މިދިޔަ ބުރާސްފަތި ދުވަހު މެރީ ޖޫގޯ ކައުންސިލަށް ހާޒިރުކޮށް، ބިން ހަވާލުކުރަން މިދިޔަ ޖޫން މަހުގެ އެއް ވަނަ ދުވަހަށް ބެކްޑޭޓް ކޮށްފައިވާ ލިޔުމެއްގައި ސޮއިކުރުވަން އުޅުނު ކަމަށް ނަހުލާ ވިދާޅުޅި އެވެ.

އެ ލިޔުމާ އެކު، ބިން ހަވާލުކުރި އެއްބަސްވުމުގައި ސޮއިކުރުވަން އަންގާފައި އޮތް މެމޯ އާއި ނެތް ކަމަށް މޭޔަރު ވިދާޅުވި އެއްބަސްވުމުގެ ކޮޕީ ވެސް ހިމަނާފައި އޮތް ކަމަށް ވިދާޅުވެ، ނަހުލާ ވަނީ އެ ލިޔެކިޔުންތަކުގެ ފޮޓޯ ފޭސްބުކް ޕޯސްޓުގައި އާންމުކުރައްވައިފަ އެވެ.

"އަޅުގަނޑު ހަދަނީ ދޮގު ކަމަށް ބުނެ، ފެންނާން ހުރި ހުރިހާ އެގްރިމަންޓަކާ ވާ ބިންތައް ދަފްތަރުގައި ހިމަނާފައިވާނެ ކަމަށް މޭޔަރު އާދަމް އާޒިމް ވިދާޅުވުމަށް ފަހު، ނެތް ކަމަށް ވިދާޅުވާ އެގްރީމަންޓުގެ މައްޗަށް ބިން ހަވާލުކުރަން ބަޔަކު ގެނެސް، ބެކްޑޭޓް ކުރި ބިން ހަވާލުކުރި ލިޔުމެއްގައި ސޮއިކުރުވާން މި އުޅެނީ ކޮންފަދަ މަކަރާއި ހީލަތެއް ހައްދަވަން ކަމަށްބާ؟،" ނަހުލާ ވިދާޅުވި އެވެ.

ނަހުލާ ވިދާޅުވީ އާޒިމް ނެތް ކަމަށް އެ ވިދާޅުވާ ހުރިހާ އެއްބަސްވުމެއްގެ ކޮޕީ ސިޓީ ކައުންސިލްގައި އެ ދުވަހު ހުރި ކަމަށެވެ. އޭނާ އިރާލި ކަމަށް މޭޔަރު އާޒިމް ވިދާޅުވާ ލިޔެކިޔުމަކީ މެރީ ޖޫގޯ ލައްވައި، މިދިޔަ ބުރާސްފަތި ދުވަހު ސޮއިކުރުވައި ފިންގާ ޕްރިންޓް ޖެހުވި "ބެކްޑޭޓް ކުރި، ފްރޯޑް ބިން ހަވާލުކުރި ލިޔުން" ކަމަށް ނަހުލާ ވިދާޅުވި އެވެ.