އާ މަސްމާރުކޭޓު އަޅާނީ ޖަޕާން ސަރުކާރުގެ ހިލޭ އެހީގައި

މާލޭގައި ޒަމާނީ ފެންވަރުގެ އާ މަސްމާރުކޭޓެއް އެޅުމުގެ މަސައްކަތް ޖަޕާން ސަރުކާރުގެ ހިލޭ އެހީގައި ކޮށްދޭން އެއްބަސްވެފައިވާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

ރައީސް، ހެންވޭރުގެ ރައްޔިތުންނާ ބައްދަލުކުރެއްވުމަށް ރޭ ކަލާފާން ސްކޫލުގެ ހޯލުގައި ބޭއްވި ޖަލްސާގައި ވިދާޅުވީ އެމަނިކުފާނު މާލޭގެ މޭޔަރަކަށް ހުންނެވި އިރު ފެށި އާ މަސްމާރުކޭޓެއް އެޅުމުގެ މަސައްކަތް އެކި ސަބަބުތަކާ ހެދި ހުއްޓިފައިވާ ކަމަށެވެ.

އެ މައްސަލައަށް ހައްލެއް ގެންނަން ކުރި މަޝްވަރާގެ ތެރެއިން ޖަޕާން ސަރުކާރުން އެ މަސައްކަތް ކޮށްދޭން މިހާރު އެއްބަސްވެފައިވާ ކަމަށް ރައީސް ވިދާޅުވި އެވެ.

"އަޅުގަނޑުމެން މިހާރު ވާނީ ޖަޕާން ސަރުކާރުގެ ހިލޭ އެހީގައި ހިންގާ މަޝްރޫއެއްގެ ގޮތުގައި އެ މަޝްރޫއު ކަނޑައެޅުމަށްޓަކައި އެ ބޭފުޅުންނާ އެކުގައި ވެސް ވާހަކަދެކެވި، މަސައްކަތްތަކެއް ފެށިފައި،" ރައީސް ވިދާޅުވި އެވެ.

ރައީސް ވިދާޅުވީ އެ މަސައްކަތް ފެށުމަށްޓަކައި ޖަޕާނުގެ ފަންނީ ޓީމެއް ވަރަށް އަވަހަށް ރާއްޖެއަށް އަންނާނެ ކަމަށެވެ.

އާ މަސްމާރުކޭޓު އަޅާނީ ކުރިން ވެސް ޕްލޭންކޮށްފައި އޮތް ގޮތަށް ލޯކަލް މާރުކޭޓު މިހާރު ހުރި ބިމުގައި ކަމަށް ރައީސް ވިދާޅުވި އެވެ.

"އެއީ ހަމަ އޮރިޖިނަލް ޕްލޭން. ރައީސް މައުމޫން ވެރިކަމުގައި އެތަން ހިއްކި އިރުގައި ވެސް އެކަން ކުރަން ރާވާފައި އޮތް ގޮތް،" ރައީސް ވިދާޅުވި އެވެ.

"ލޯކަލް މާރުކޭޓު ހުރި ތަނުގައި ޒަމާނީ ފެންވަރުގެ މަސްމާރުކޭޓަކާއި އަދި ތަރުކާރީ މާރުކޭޓު ހިމެނޭ މިކްސްޑް ޔޫސް މާކެޓެއް ހަދައި މޮޑާން ބިލްޑިންއެއް ހިމެނޭ ގޮތަށް ޖަޕާން ސަރުކާރުގެ އެހީގައި [އެ މަސައްކަތް ކުރާނީ]."

ރައީސް ވިދާޅުވި ގޮތުގައި، މަސްމާރުކޭޓު މިހާރު ހުރި ތަނުގައި މަސްވެރިކަމުގެ ސިނާއަތުގައި އުޅޭ ކުންފުނިތަކާއި ޖަމިއްޔާތަކަށް ބޭނުންވާ އޮފީސް ޖާގަ ދެވޭނެ ގޮތަށް އިމާރާތެއް އަޅަން ވެސް އަންނަނީ ރާވަމުންނެވެ.

ރައީސް މުއިއްޒު މޭޔަރަކަށް ހުންނެވި އިރު، މާލޭގައި ޒާމާނީ މަސްމާރުކޭޓެއް އެޅުމުގެ މަސައްކަތް ފަށަން ތައްޔާރުވި އެވެ. އޭރު ޕްލޭންކޮށްފައި އޮތީ ލޯކަލް މާރުކޭޓު މިހާރު ހިންގާ ބިން ހުސްކޮށް، އެ ތަނުގައި ހަތަރު ބުރީގެ އިމާރާތެއް އަޅާށެވެ. އެއަށް ފަހު، ދަތުރުވެރިންގެ މާރުކޭޓާއި މަސްމާރުކޭޓު ވެސް އާ އިމާރާތަށް ބަދަލުކުރާ ގޮތަށެވެ.

ކޮންޓްރެކްޓް ފައިނޭންސް އުސޫލުން މާރުކޭޓް ހަދަން ބަޔަކާ އެކު މާލޭ ސިޓީ ކައުންސިލުން އޭރު ސޮއި ވެސް ކުރި އެވެ. ނަމަވެސް، އޭރުގެ ޕްލޭނިން މިނިސްޓްރީން މާލޭގެ ލޭންޑް ޔޫސް ޕްލޭން ފާސް ނުކުރުމުން އެކަން ފެށޭގޮތް ނުވީ އެވެ.

ސިޓީ ކައުންސިލުން އޭރު ޕްލޭންކުރީ އަލަށް ހަދާ އިމާރާތުގެ ބޭސްމަންޓުގައި ޕާކިން ޒޯނެއް ވެސް ހަދާށެވެ. ގްރައުންޑު ފްލޯގައި މަސް މާރުކޭޓު ހަދާއިރު، ފުރަތަމަ ތިން ފުލޯގައި ހަދަން ނިންމީ ދަތުރުވެރިންގެ މާރުކޭޓާއި ލޯކަލް މާރުކޭޓެވެ. އަދި އެންމެ މަތީ ފްލޯ ދޫކުރަން ނިންމީ ފުޑް ކޯޓް ހިންގާށެވެ.