އިންގްލެންޑްގެ "ހޮލީވްޑް ކްލަބް" ގެ ހިއްސާ އެތުލެޓިކޯގެ ވެރިން ގަނެފި

އިންގްލެންޑްގެ ޗެމްޕިއަންޝިޕްގައި ވާދަކުރާ ކްލަބް، ރެކްސަމްގެ ހިއްސާ، އެތުލެޓިކޯ މެޑްރިޑްގެ މެޖޯރިޓީ ހިއްސާދާރުން ގަނެފި އެވެ.

އެތުލެޓިކޯގެ މެޖޯރިޓީ ހިއްސާ މިހާރު ކޮންޓްރޯލް ކުރަނީ އެމެރިކާގެ އެސެޓް މެނޭޖްކުރާ ކުންފުނި އެޕޯލޯއިންނެވެ. އެޕޯލޯ ސްޕޯޓްސް ކެޕިޓަލްގެ ނަމުގައި އުފައްދާފައިވާ ކުންފުނިން އެތުލެޓިކޯގެ ހިއްސާ ގަތީ މިދިޔަ މަހު އެވެ.

ހޮލީވުޑްގެ ދެ އެކްޓަރުން ކަމަށްވާ ރޮބް މެކް އާއި ރަޔަން ރެނަލްޑްސްގެ ހިއްސާ އޮންނަ ރެކްސަމް، މަޝްހޫރު ވެފައި ވަނީ "ހޮލީވްޑް" ކްލަބްގެ ނަމުންނެވެ.

އެޕޯލާއިން ގަތީ ރެކްސަމްގެ މައިނޯރިޓީ ހިއްސާ އެވެ. އެ ކްލަބުން ނެރުނު ބަޔާނުގައި ބުނީ އެޕޯލޯގެ އިންވެސްޓްމެންޓާ އެކު އެ ކްލަބްގެ ސްޓޭޑިއަމް ބިނާ ކުރުމުގެ މަސައްކަތައް އިތުރު ފައިސާ ހަރަދު ކުރާނެ ކަމަށެވެ.

"މި އިންވެސްޓްމަންޓްގެ ދަށުން އެޕޯލޯ ސްޕޯޓްސް ކެޕިޓަލުން ވަނީ ސްޓޭޑިއަމް އަލުން ތަރައްގީ ކުރުމަށް ބޭނުންވާ ފައިސާ ވެސް ފޯރުކޮށްދީފަ. މި ރީޑިވެލޮޕްމަންޓަކީ އެ ސިޓީ [ރެކްސަމް] ގެ ކަނެކްޓިވިޓީ އާއި އިގްތިސާދަށް އެހީވުމުގެ ގޮތުން ކުރިއަށް ގެންދާ ބޮޑު ބޮޑު ޕްރޮޖެކްޓެއް،" އެ ކްލަބުން ނެރުނު ބަޔާނުގައި ބުނެފައި ވެއެވެ.

ރެކްސަމްއިން ބުނީ އެޕޯލޯގެ އިންވެސްޓްމެންޓާ އެކު ސްޓޭޑިއަމްގެ މި ތަރައްގީ ކުރަނީ ރެކްސަމްގެ ސަގާފަތާއި ތަރިކަ ދަމަހައްޓައިދޭ ގޮތަށް ކަމަށެވެ. އަދި އެ ސަރަހައްދަށް ޒިޔާރަތްކުރާ މީހުންނާއި އާންމުންނަށް ވެސް ހާއްސަ މަންޒިލަކަށް ވާނެ ގޮތަށް ސްޓޭޑިއަމް ތަރައްގީ ކުރާނެ ކަމަށް ރެކްސަމުން ބުންޏެވެ.