މަސްތުވާތަކެތީގެ ބާވަތެއް އެމެރިކާއިން ނިއުކްލިއާ އަދި ކެމިކަލް ހަތިޔާރުގެ ކެޓަގަރީގައި ހިމަނަނީ

މަސްތުވާތަކެތީގެ ބާވަތެއް ކަމަށްވާ ފެންޓަނިލް "ވެޕަން އޮފް މާސް ޑިސްޓްރަކްޝަން" ނުވަތަ ފަނާކުރުވަނިވި ގެއްލުންދޭ ނުރައްކާތެރި ހަތިޔާރުގެ ކެޓަގަރީގައި ހިމަނަން އެމެރިކާގެ ރައީސް ޑޮނަލްޑް ޓްރަމްޕު ނިންމަވައިފި އެވެ.

ލެޓިން އެމެރިކާގެ ޑްރަގް ކާޓެލްތަކާ ދެކޮޅަށް ހަނގުރާމަ އިއުލާނުކުރައްވާފައިވާ ޓްރަމްޕުގެ މި ނިންމެވުމާ އެކު ފެންޓަނިލް ހިމެނޭނީ ނިއުކްލިއާ އަދި ކެމިކަލް ހަތިޔާރު ވެސް ހިމެނޭ ކެޓަގަރީގަ އެވެ.

"އެއްވެސް ބޮމަކުން ނުލިބޭ ގެއްލުން މީގެ ސަަބަބުން އެބަ ވޭ -- ދެ ލައްކަ، ތިން ލައްކަ މީހުން ކޮންމެ އަހަރަކު މަރުވާކަން އެބަ އެނގޭ،" ފެންޓަނިލް އަކީ ފަނާކުރުވަނިވި ހަތިޔާރެއްގެ ގޮތުގައި ކަނޑައެޅުމުގެ ރިޔާސީ ގަރާރުގައި ސޮއިކުރައްވަމުން ޓްރަމްޕު ވިދާޅުވި އެވެ.

އެކަމަކު، ފެންޓަނިލްގެ ސަބަބުން އެމެރިކާގައި މަރުވާ ކަމަށް ޓްރަމްޕު ވިދާޅުވި އަދަދު އެމެރިކާގެ ސެންޓާސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން މިދިޔަ އަހަރު ހާމަކޮށްފައިވާ އަދަދާ ދިމައެއް ނުވެ އެވެ. ސީޑީސީން އެންމެ ފަހުން ބުނެފައިވާ ގޮތުގައި އޯވަޑޯޒްވެގެން މިދިޔަ އަހަރު 80،000 މީހުން މަރުވެފައިވާ އިރު، އޭގެ ތެރެއިން 48،000 މީހުން މަރުވީ ސިންތެޓިކް އޮޕިއޮއިޑްގެ ސަބަބުންނެވެ.

ޓްރަމްޕުގެ އަމުރުގައި ބުނެފައި ވަނީ "ގާނޫނާ ހިލާފު ފެންޓަނިލް އަކީ މަސްތުވާތަކެއްޗަށް ވުރެ ކެމިކަލް ހަތިޔާރަކާ ގާތް އެއްޗެއް" ކަމަށާއި އެ ހަތިޔާރު އުފައްދައި ވިއްކުމުގެ ސަބަބުން ގައުމީ ސަލާމަތަށް ނުރައްކާވާ ކަމަށާއި މުޅި ސަރަހައްދާއި ގައުމުގައި ގާނޫނާ ހިލާފް އަމަލުތައް އިތުރުވަމުންދާ ކަމަށެވެ.

މަސްތުވާތަކެތީގެ ވިޔަފާރިކުރާ މީހުންނަކީ ނާކޯ-ޓެރަރިސްޓުންގެ ގޮތުގައި ސިފަކުރައްވާ ޓްރަމްޕުގެ މި ނިންމެވުން އައިސްފައި މި ވަނީ ލެޓިން އެމެރިކާގެ ގައުމުތަކުގައި އުޅޭ ޑްރަގް ކާޓެލްތަކާ ދެކޮޅަށް ސެޕްޓެމްބަރު މަހު ހަނގުރާމަ އިއުލާނުކުރެއްވުމަށް ފަހުގަ އެވެ. މަސްތުވާތަކެތި އުފުލާ އުޅަނދުތައް ކަމަށް ޝައްކުވާ އުޅަނދުތަކަށް އެމެރިކާ ސިފައިން ހަމަލާ ދެމުން ގެންދާއިރު އެ ހަމަލާތަކުގައި މިހާތަނަށް 90 މީހަކު ވަނީ މަރުވެފަ އެވެ.

މި ހަމަލާތަކަކީ ބައިނަލްއަގުވާމީ ގާނޫނާ ހިލާފް އަމަލެއް ކަމަށް ބުނެ ފާޑުކިޔުން އަމާޒުވެފައި ވިޔަސް ޓްރަމްޕު ވިދާޅުވެފައި ވަނީ މިހާތަނަށް ވިއްސަކަށް ހަމަލާ ދީފައި ވާއިރު، ގޮއްވާލެވޭ ކޮންމެ ޑްރަގް ޝިޕްމަންޓަކުން އެމެރިކާގެ 25،000 މީހުންގެ ފުރާނަ ސަލާމަތްވާނެ ކަމަށެވެ. އެ ހަމަލާތައް ބޮޑަށް އަމާޒުކޮށްފައިވަނީ ފެންޓަނިލް އުފުލާ ބޯޓުތަކަށް ވުރެ، ކޮކެއިން އުފުލާ ކަމަށް ބެލެވޭ ބޯޓުތަކަށެވެ. -- އޭއެފްޕީ