ހުޅުމާލެ ތިނެއް ހިއްކައި ފަރުކޮޅުފުއްޓާ ގުޅުވާލައިފި

ހުޅުމާލެ ތިނެއްގެ ބިން ހިއްކުމުގެ މަސައްކަތުގެ ތެރެއިން ބޮޑު ސަރަހައްދެއް ހިއްކައި ފަރުކޮޅުފުއްޓާ ގުޅުވާލައިފި އެވެ.

ހުޅުމާލެ ތިނެއް ހިއްކުމުގެ މަސައްކަތްކުރާ އެމްއޭސީއެލުން މިއަދު ބުނީ ޖުމްލަ 40 ހެކްޓަރުގެ ބިން މިހާރު ހިއްކާ ނިމިފައިވާ ކަމަށެވެ. އެއީ 63 ހެކްޓަރުގެ ބިން ހިއްކަން ނިންމާފައިވާ އެ ޕްރޮޖެކްޓުގެ 63.5 ޕަސެންޓް ކަމަށާއި އެ މަސައްކަތް ވަރަށް ބާރު ސްޕީޑުގައި ކުރިއަށް ގެންދާ ކަމަށް އެ ކުންފުނިން ބުންޏެވެ.

އެމްއޭސީއެލުން މިއަދު އާންމުކުރި އެ ސަރަހައްދުގެ ފޮޓޯތަކާ އެކު، ހުޅުމާލެ ތިނަކާއި ފަރުކޮޅުފުށި އެއްކޮށްލާފައިވާ މަންޒަރަށް އާންމުންގެ ސަމާލުކަން ވަނީ ހުއްޓިފަ އެވެ. އެ ސަރަހައްދު ހިއްކުމާ އެކު، ކުރިން ރިސޯޓެއްގެ ގޮތުގައި ހިންގި ފަރުކޮޅުފުށީގެ ރީތިކަން އެއްކޮށް ވަނީ ގެއްލިފަ އެވެ.

މޫދާ ކައިރީގައި ސުވިމިން ޕޫލަކާ އެކު ހަދާފައި އޮތް ފަރުކޮޅުފުށީގެ އެ ސަރަހައްދުގެ ރީތި ކަމުގެ ސަބަބުން ކައިވެނި ޕާޓީތަކަށާއި އެކި ކަހަލަ އިވެންޓުތައް ބޭއްވުމަށް އެތަނަށް އޮތް ޑިމާންޑު ވަރަށް ބޮޑެވެ.

ހުޅުމާލޭގެ މާސްޓަޕްލޭންގައި ކުރިން އޮތީ އެ ސަރަހައްދު ނުހިއްކާ ގޮތަށެވެ. ކުރިން މާސްޓަޕްލޭންގައި އޮތީ ހުޅުމާލެ 3 އާއި ފަރުކޮޅުފުއްޓާ ދެމެދުގައި ކޯރެއް އޮންނަ ގޮތަށެވެ. އެ ދެ ސަރަހައްދު ގުޅުވާލުމަށް ޗެނަލް ބްރިޖުތައް އަޅާ ގޮތަށެވެ. އަދި ފަރުކޮޅުފުށީގައި ހެރިޓޭޖު ވިލެޖެއް ހެދުމުގެ މަސައްކަތް ވެސް އެޗްޑީސީން ވަނީ ފަށައިފަ އެވެ.

ނަމަވެސް، އެޗްޑީސީން މިދިޔަ މެއި މަހު މާސްޓަޕްލޭނަށް ބަދަލު ގެނެސް އެ ސަރަހައްދު އެއްކޮށް ހިއްކަން ވަނީ ނިންމައިފަ އެވެ.

އެޗްޑީސީން ނިންމީ ހުޅުމާލެ ދޭކާއި ތިނަކާ ދެމެދުގައި ކުރިން "ކޯރެއްގެ" ގޮތުގައި ކަނޑައަޅާފައި އޮތް ބައި ހިއްކައި، ދެ ސަރަހައްދު އެއްކޮށްލާށެވެ. އެ ބައި ހިއްކަނީ އެ ސަރަހައްދުގެ ކަނެކްޓިވިޓީ ރަނގަޅުކޮށް، ދަތުރުފަތުރުގެ ނިޒާމު ހަރުދަނާ ކުރަން ގެންނަ ބަދަލެއްގެ ގޮތުގައި ކަމަށް އެ ކުންފުނިން ބުނެފައިވެ އެވެ.

އެގޮތަށް ނިންމަން ޖެހުނު ދެވަނަ ސަބަބަކީ ހުޅުމާލޭގެ ބަނދަރު ސަރަހައްދުގެ ގޮތުގައި މިހާރު ބޭނުންކުރަމުން އަންނަ 36 ހެކްޓަރުގެ ސަރަހައްދު 53 ހެކްޓަރަށް ބޮޑުކުރަން ކަމަށް ވެސް އެޗްޑީސީން ބުނެފައިވެ އެވެ. އެއާ އެކު، ހުޅުމާލޭގެ ބަނދަރުގައި އުޅަނދުފަހަރު އެޅުމަށާއި ލޮޖިސްޓިކަށާއި އުޅަނދުތަކަށް ބޭނުންވާ އެ ނޫން ކަންކަމަށް ލިބޭ ޖާގަ ތަނަވަސްވާނެ ކަމަށް އެޗްޑީސީން އޭރު ބުންޏެވެ.

ހުޅުމާލެ 3 ހިއްކަނީ މާލޭ މީހުންނަށް 698 ގޯތި ދިނުމަށެވެ.

ރައީސް ޑރ. މުހައްމަދު މުއިއްޒު މިދިޔަ މަހުގެ ފަހުކޮޅު ވިދާޅުވީ މާލޭ މީހުންނަށް ގޯތި ދިނުމަށް ހުޅުމާލެ ތިނަކާއި ގިރާވަރު ފަޅުގެ ބިން ހިއްކުން އަވަސްކުރުމަށް އިތުރު ޑްރެޖަރެއް ގެނެސްފައި ވާތީ، ހުޅުމާލެ 3 ގެ ބިން ހިއްކުމުގެ މަސައްކަތް އަންނަ މަހަށް އެއްކޮށް ނިންމާލެވޭނެ ކަމަށެވެ. އެމަނިކުފާނު އަންދާޒާ ކުރައްވާ ގޮތުގައި ގިރާވަރު ހިއްކުމުގެ މަސައްކަތް 2-3 މަސް ތެރޭގައި ނިމެނޭ އެވެ.

ކުރީގެ ސަރުކާރުގެ ބިންވެރިޔާ ސްކީމުގެ ދަށުން، ހުޅުމާލެ ތިނަކުން ގޯތި ލިބިފައިވާ މީހުންގެ މެދުގައި ގުރުއަތުލުން ވެސް އިއްޔެ ވަނީ ބާއްވައިފަ އެވެ.