އަނގައިގެ ކެންސަރަން ހޭލުންތެރިކުރަން ކެމްޕޭނެއް ފަށައިފި

އަނގައިގެ ކެންސަރަށް އާއްމުން ހޭލުންތެރިކުރަން ކެންސަ ސޮސައިޓީ އޮފް މޯލްޑިވްސް އާއި އެސްޓީއޯ ގުޅިގެން އެއް އަހަރު ދުވަހުގެ ކެމްޕޭނެއް މިއަދު ފަށައިފި އެވެ.

އެސްޓީއޯ ހެޑް އޮފީހުގައި ބޭއްވި ރަސްމިއްޔާތު ޝަރަފްވެރިކޮށްދެއްވަމުން ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވީ ރާއްޖޭގައި އަނގައިގެ ކެންސަރު އިތުރުވަމުންދާ ކަމަށެވެ. އަދި އެކަމަށް ހޭލުންތެރިކުރުމަށް ކެންސަ ސޮސައިޓީން ކުރަމުން އަންނަ މަސައްކަތްތަކަށް މިނިސްޓްރީގެ ފަރާތުން ފުރިހަމަ އެއްބާރުލުން ދެއްވާނެ ކަމަށް ވެސް މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ އާއްމުންގެ ސިއްހަތަށް ގެއްލުންދޭ ބާވަތްތައް އެތެރެކުރުން މަދުކުރުމަށް ސަރުކާރުން ކުރަމުން އަންނަ މަސައްކަތަށް މިއަހަރު ވަރަށް ބޮޑުކުރިއެރުމެއް ލިބިފައިވާ ކަމަށެވެ. އެގޮތުން ސިނގިރެޓާއި އެނާޖީ ޑްރިންކުން ނަގާ ޑިއުޓީ ބޮޑުކޮށްފައިވާކަން ނާޒިމް ފާހަގަކުރެއްވި އެވެ.

މިނިސްޓަރު ވިދާޅުވީ ކުރިޔަށް އޮތްތަނުގައި ވެސް، ސިއްހަތަށް ގެއްލުން ލިބޭ ބާވަތްތައް ރާއްޖެ އެތެރެކުރުން މަދުކުރުމަށް ސަރުކާރުން މަސައްކަތްކުރާނެ ކަމަށެވެ.

އެ ރަސްމިއްޔާތުގައި ކެންސަ ސޮސައިޓީގެ ރައީސް ޖުވައިރިޔާ ސައީދު ވިދާޅުވީ މި ކެމްޕޭންގެ ދަށުން އަނގައިގެ ކެންސަރަށް ސްކްރީންކުރުމުގެ އިތުރުން ހޭލުންތެރިކުރުމަށް ތަފާތު އެކި ކެމްޕޭންތައް ހިންގަން ހަމަޖެހިފައިވާ ކަމަށެވެ. އަދި އެ ކެމްޕޭނަށް އެސްޓީއޯގެ ފަރާތުން ދޭ އެހީތެރިކަން އޭނާ ފާހަގަކުރެއްވި އެވެ.

"އަޅުގަނޑުމެންނަށް ފާހަގަކުރެވިފައި އެބަހުރި ރާއްޖޭގައި އަނގައިގެ ކެންސަރު ޖެހޭ މީހުންގެ އަދަދު ވަރަށް ބޮޑަށް އިތުރުވަމުން އަންނަކަން. އެހެންވެ އަޅުގަނޑުމެން މި ކެމްޕޭން މި ފެށީ ބަލީގެ ކުރީކޮޅުގައި ސަލާމަތްވުމުގެ ފުރުސަތު ބޮޑުކަމަށް ފާހަގަކުރެވޭނީ މީހުން ސްކްރީންކޮށް ހޭލުންތެރިކުރުމަށް،" ޖުވައިރިޔާ ވިދާޅުވި އެވެ.

އޭނާ ވިދާޅުވީ އެ ކެމްޕޭންގެ ދަށުން މާލޭގެ 10 ޑެންޓަލް ކްލިނިކަކުން އަނގައިގެ ކެންސަރަށް ހިލޭ ސްކްރީންކޮށްދޭނެ ކަމަށެވެ. އަދި އޭގެ އިތުރުން މާލޭގެ ބައެއް ރެސްޓޯރަންޓް ކެފޭތަކުގައި އާއްމުން ހޭލުންތެރިކުމުގެ މެސެޖް ފެންނަ ގޮތަށް ބެހެއްޓުމަށް ނިންމާފައިވާ ކަމަށް ވެސް ޖުވައިރިޔާ ވިދާޅުވި އެވެ.