ފިސްތޯލަ ގެންގުޅުނު މައްސަލާގައި އަދީބުގެ ހުކުމް ދަމަހައްޓައިފި

ފިސްތޯލަ ގެންގުޅުނު މައްސަލާގައި ކުރީގެ ނައިބު ރައީސް އަހުމަދު އަދީބު 10 އަހަރަށް ޖަލަށް ލާން ކްރިމިނަލް ކޯޓުން ކުރި ހުކުމް ރަނގަޅު ކަމަށް ހައި ކޯޓުން މިއަދު ހުކުމްކޮށްފި އެވެ.

މި ސަރުކާރުގެ ނައިބު ރައީސް ކަން ކުޑަ ދުވަސްކޮޅަކު ކުރެއްވި އަދީބު މެއި، 2015 ގައި އިދިކޮޅު ފަރާތްތަކުން ބޮޑު މުޒާހަރާ ބޭއްވި ދުވަހު ދެ ފިސްތޯލަ ގެންގުޅެއްވި ކަމަށް ބުނެ ދައުލަތުން ދައުވާ ކުރުމުން އޭނާ ޖަލަށް ލާން ކޯޓުން ހުކުމްކުރީ މިދިޔަ އަހަރު އެވެ. އެ ދެ ފިސްތޯލަ ފުލުހުންނަށް ހޯދިފައެއް ނުވެ އެވެ. އެކަމަކު މޭ 1 ގައި އެ ފިސްތޯލަ އަދީބު ދެއްކެވި ކަމަށް ބުނެ ދެ މީހަކު ވަނީ ކޯޓުގައި ހެކިބަސް ދީފަ އެވެ.

އެ މައްސަލަ އަދީބުގެ ފަރާތުން އިސްތިއުނާފް ކުރުމުން ހައި ކޯޓުގެ ތިން ފަނޑިޔާރުންގެ އިއްތިފާގުން ނިންމީ ދަށު ކޯޓުގެ ހުކުމް ރަނގަޅު ކަމަށެވެ.

ހައި ކޯޓުގެ ހުކުމުގައިވާ ގޮތުގައި ދައުވާގައި ބުނާ ދުވަހު ދެ ފިސްތޯލަ އަދީބު ގެންގުޅެއްވި ކަން ދައުލަތުން ހުށަހެޅި ދެ ހެކިންގެ ހެކިބަހުން އެނގެ އެވެ. އެ ހެކިން ބަލައިގަތުމުގައި ދަށު ކޯޓުން ގާނޫނާ ޚިލާފަށް އަމަލުކޮށްފައިވާ ކަމަށް ބެލެވެން ނެތް ކަމަށް ވެސް ހުކުމުގައިވެ އެވެ. އަދި ހެކިންނާ ސުވާލު ކުރުމުގެ ފުރުސަތު ދަށު ކޯޓުން އަދީބަށް ދީފައިވާ ކަމަށާއި ކުށުން ބަރީއަވާން އެކަށީގެންވާ ވަގުތާއި ފުރުސަތު ވެސް އަދީބަށް ލިބުނު ކަމަށް އެ ހުކުމުގައިވެ އެވެ.

ޝަރީއަތުގައި އަދީބުގެ ފަރާތުން ބުނެފައި ވަނީ އެ މައްސަލާގައި އަދީބު ޖަލަށް ލީ ބަޔަކު ބުނި ބުނުމެއްގެ މައްޗަށް ބިނާކޮށްގެން ކަމަށެވެ. އެހެންކަމުން އެއީ "މުތުލަގު މަސްއޫލިއްޔަތު" އުފުލަން ޖެހޭ ކުށްތަކުގައި އަމަލު ކުރަން ޖެހޭ އުސޫލުތަކާ ޚިލާފް ކަމެއް ކަމަށް އަދީބުގެ ވަކީލުން ބުނެފައިވެ އެވެ.

އެ ވާހަކަތަކާ ގުޅިގެން ހުކުމުގައި ވަނީ އަދީބުގެ މައްޗަށް ދައުލަތުން ކުރީ ޓެރަރިޒަމްގެ ދައުވާ ކަމަށް ވާއިރު އެއީ "މުތުލަގު މަސްއޫލިއްޔަތު" އުފުލަން ޖެހޭ ބާވަތުގެ ކުށެއް ނޫން ކަމަށެވެ. އަދި އަދީބުގެ ފަރާތުން އެކަމާ ގުޅިގެން ހަވާލާދީފައިވާ މަތީ ކޯޓުގެ ނިންމުންތަކަކީ މަސްތުވާތަކެތީގެ މައްސަލަތަކާ ގުޅިގެން ކަނޑައަޅާފައިވާ އުސޫލުތަކެއް ކަމަށް ވެސް އެ ހުކުމުގައިވެ އެވެ.

އެ މައްސަލައިގެ އިތުރުން އިތުރު ދެ މައްސަލައަކާ ގުޅިގެން ވެސް އަދީބަށް ވަނީ ދިގު މުއްދަތުގެ ޖަލު ހުކުމް އައިސްފަ އެވެ. އެއީ ރިޔާސީ ލޯންޗްގައި އެއްޗެއް ގޮއްވާލި މައްސަލަ އާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަންގެ ފައިސާތަކަކަށް ޚިޔާނާތްތެރިވި މައްސަލާގައި އައިސްފައިވާ ހުކުމެވެ.

އަދީބުގެ މައްޗަށް އިއްވާފައިވާ ހުކުމްތަކުގެ މުއްދަތު 33 އަހަރަށް އަރަ އެވެ.