އަދުލު އިންސާފު ނެތް ނަމަ ޓެރަރިޒަމް ހިންގަން މަގުފަހިވޭ: މެމްބަރުން

އަދުލު އިންސާފު ނެތް ތަނެއްގައި ޓެރަރިޒަމްގެ ހަރަކާތްތަކާއި ހައްދުފަހަނައަޅާ ދިއުން އިތުރުވާ ކަމަށް ރައްޔިތުންގެ މަޖިލީހުގެ ބައެއް މެމްބަރުން މިއަދު ވިދާޅުވެއްޖެ އެވެ.

ޓެރަރިޒަމާއި ދީނީ ގޮތުން ހައްދު ފަހަނައަޅާ ދިއުމާ ބެހޭ ގޮތުން ސަރުކާރުގެ ސިޔާސަތު ހިމެނޭ ކަރުދާހަށް ބަހުސްކުރައްވަމުން ހިތަދޫ މެދު ދާއިރާގެ މެމްބަރު އަދި ކުރީގެ ސިފައިންގެ އޮފިސަރެއް ކަމަށްވާ އިބްރާހިމް މުހައްމަދު ދީދީ ވިދާޅުވީ ސިޔާސީ ގޮތުން ކުރާ ކަންކަމުގައި ގައުމުތައް ޓެރަރިޒަމްގެ ތެރެއަށް ވަންނަނީ އަދުލު އިންސާފާއި ހަމަހަމަކަން ނެތުމުން ކަމަށެވެ.

"އެ ގައުމެއްގައި އަދުލު އިންސާފު ނެތި ހިނގައްޖެ ނަމަ، ދުނިޔޭގެ ވަރަށް ގިނަ ގައުމުތަކުގައި ފެނޭ ޓެރަރިޒަމްގެ އަމަލުތަކަށް ވަދެގެންދާ ތަން،" ދީދީ ވިދާޅުވި އެވެ.

އޭނާ ވިދާޅުވީ އިސްލާމް ދީނުގެ ނަން ކިލަނބުކުރަން އަދާވާތްތެރިން ކުރާ މަސައްކަތަށް ދިވެހި ދައުލަތުން އެއްވެސް ފުރުސަތެއް ދީގެން ނުވާނެ ކަމަށެވެ. އަދި ޓެރަރިޒަމާއި ހައްދުފަހަނައަޅައި ދިއުމާ ގުޅޭ ސިޔާސަތެއް އެކުލަވާލައި ގައުމީ ސަލާމަތުގެ ބިލު ހެދުން ލަސްވެއްޖެ ކަމަށް ވެސް އޭނާ ވިދާޅުވި އެވެ.

ދީދީ ވިދާޅުވީ ދީނީ ގޮތުން ހައްދުފަހަނަ އެޅުން ހުއްޓުވަން ދީނީ ހޭލުންތެރިކަން ބޮޑުކުރަން ޖެހޭ ކަމަށާއި އަދުލު އިންސާފާއި ހަމަޖެހުން ގާއިމްކޮށްގެން ނޫނީ ހައްދުފަހަނަ އެޅުން ނުހުއްޓުވޭނެ ކަމަށެވެ. އަދި އެފަދަ ކަންކަން ހުއްޓުވަން އެންމެން އެއްބާރުލުން ދޭން ޖެހޭ ކަމަށް ވެސް ވިދާޅުވި އެވެ.

ކުރީގެ ޕޮލިސް ކޮމިޝަނަރު އަދި ކިނބިދޫ ދާއިރާގެ މެމްބަރު އަބްދުﷲ ރިޔާޒް ވިދާޅުވީ ޝަރުއީ ދާއިރާގައި ތިއްބަވާ ފަނޑިޔާރުންނަށް ޓެރަރިޒަމަކީ ކޮބައިކަން އެނގެން ޖެހޭ ކަމަށެވެ. އެގޮތުން ޓެރަރިޒަމާ ގުޅޭ ހުކުމްތައް މިހާތަނަށް ކޮށްފައި ވަނީ ސިޔާސީ ލީޑަރުންގެ މައްޗަށް ކަމަށް އޭނާ ވިދާޅުވި އެވެ.

"ޓެރަރިޒަމްގެ ގާނޫނު ތަންފީޒުވެގެން މިދަނީ ވަރަށް ބޮޑަށް ސިޔާސީ މީހުންނަށް،" ރިޔާޒް ވިދާޅުވި އެވެ.

އޭނާ ވަނީ ޓެރަރިޒަމްގެ ގާނޫނު އަލުން މުރާޖައާ ކުރަން ގޮވާލައްވައިފަ އެވެ. އަދި ސަރުކާރުގެ ސިޔާސަތަކީ ޓެރަރިޒަމް ހުއްޓުވަން ކަމަށްވާ ނަމަ، ޓެރަރިސްޓް ޖަމާއަތްތަކުގެ ލިސްޓު އާންމުކުރުމުގެ މުހިންމުކަން ވެސް ފާހަގަކުރެއްވި އެވެ.

"ޓެރަރިސްޓް ޖަމާއަތްތަކުގެ ލިސްޓު ސިއްރުކުރުމުގެ ސަބަބުން ގާނޫނުގައި ފާހަގަކޮށްފައި ހުރި މަހްފޫމް ގެއްލިގެން ދިޔައީ، އެހެންވީމަ މިއީ ވެސް ބަހުސް ކުރަން ޖެހޭ ކަމެއް،" ރިޔާޒް ވިދާޅުވި އެވެ.

މީގެ އިތުރުން އޭނާ ވިދާޅުވީ ޓެރަރިޒަމާ ދެކޮޅަށް މަސައްކަތް ކުރުމުގެ ގާބިލްކަން ސިފައިންނާއި ފުލުހުންގެ ހުންނަން ޖެހޭނެ ކަމަށެވެ. ޓެރަރިޒަމާ ދެކޮޅަށް މަސައްކަތް ކުރާނަމަ ގައުމީ ސަލާމަތާ ގުޅުން ހުރި މުއައްސަސާއަކުން ބޯޑު އޮފް ކޮންޓްރޯލްގެ ކަންކަން ބަލަހައްޓަން ޖެހޭނެ ކަމަށް ރިޔާޒް ވިދާޅުވި އެވެ.