ކޭބަލް ޓީވީގެ ހިދުމަތް ދޭން ޕީއެސްއެމުން ކުރިމަތިލައިފި

މުޅި ރާއްޖެ އަށް ކޭބަލް ޓީވީގެ ހިދުމަތް ދޭން ޕަބްލިކް ސާވިސް މީޑިއާ (ޕީއެސްއެމް) އިން ކުރިމަތިލައިފި އެވެ.

ބްރޯޑްކާސްޓިން ކޮމިޝަންގެ ސެކްރެޓަރީ ޖެނެރަލް މުހައްމަދު ނާސިހު މިއަދު ވިދާޅުވީ މުޅި ރާއްޖެ އަށް ރީބްރޯޑްކާސްޓް ކުރާނެ ބަޔަކު ހޯދަން ކުރި އިއުލާނުގެ މުއްދަތު އިއްޔެ ހަމަވި އިރު ދެ ފަރާތަކުން ކުރިމަތިލާފައިވާ ކަމަށެވެ. އެއީ ޕީއެސްއެމާއި އަމިއްލަ އެހެން ކުންފުންޏަކުން ކަން އޭނާ ޔަގީންކޮށްދެއްވި އެވެ.

ނާސިހް ވިދާޅުވި ގޮތުގައި ދެ ކުންފުނިން ހުށަހެޅި ލިޔެކިޔުން ބަލައި ދިރާސާ ކުރުމަށް ފަހު ޝަރުތު ހަމަވާ ނަމަ ވަރަށް އަވަހަށް ކޮމިޝަނުން ލައިސަންސް ދޫކުރާނެ އެވެ.

"ޝަރުތު ފުރިހަމަވާ ނަމަ ދެ ފަރާތަށް ވެސް ލައިސަންސް ލިބިދާނެ. ލިއުންތައް ބަލަމުން މިހާރު އަންނަނީ،" އޭނާ ވިދާޅުވި އެވެ.

ރާއްޖޭގައި މިހާރު ކޭބަލް ޓީވީގެ ހުއްދަ ދޫކޮށްފައި ވަނީ ތިން ކުންފުންޏަކަށެވެ. އެއީ މީޑިއާ ނެޓުގެ އިތުރުން ދިރާގާއި ޕްލޭކާސްޓް ކުންފުންޏަށެވެ.

ބްރޯޑްކާސްޓިން ކޮމިޝަންގެ ރައީސް މުހައްމަދު ޝަހީބް ވިދާޅުވީ ފެންވަރު ރަނގަޅު އަގު ހެޔޮ ރީބްރޯޑްކާސްޓިން ހިދުމަތެއް މުޅި ރާއްޖޭގައި ދިނުމަކީ އެ ކޮމިޝަނުގެ ވަރަށް ބޮޑު އަމާޒެއް ކަމަށެވެ. އެ ކޮމިޝަންގެ ފުރަތަމަ ދައުރު ނިމުނު އިރު، މުޅި ރާއްޖެ އަށް ހިދުމަތް ދޭން ތިން ފަރާތަކަށް ހުއްދަ ދޫކޮށްފައިވާ ކަން ޝަހީބު ފާހަގަކުރެއްވި އެވެ.

"ނަމަވެސް އޭގެ މަގްސަދު ހާސިލެއް ނުވި. މުޅި ރާއްޖެ އަށް މި ހިދުމަތެއް ނުދެވުނު،" އޭނާ ވިދާޅުވި އެވެ.

އެ ކޮމިޝަނުން އަނެއްކާ ވެސް ރީބްރޯޑްކާސްޓް ކުރުމުގެ ހުއްދަ އަށް އެދެން ހުޅުވާލީ، ޝަހީބް ވިދާޅުވި ގޮތުގައި މުޅި ރާއްޖެ ކަވަރު ކުރެވޭ ގޮތަށް ފެންވަރު ރަނގަޅު އަގު ހެޔޮ ހިދުމަތެއް ދިނުމަށެވެ. މިހާރު ދެމުން އަންނަ ހިދުމަތުގެ ޕެކޭޖްތަކުގެ ފީ ބޮޑު ކަމުގެ ޝަކުވާ ލިބިފައިވާ ކަމަށާއި އިތުރު ބަޔަކަށް ލައިސަންސް ދޫކުރަން ނިންމީ އަގު ހެޔޮކޮށް ރައްޔިތުންނަށް ހިދުމަތް ފޯރުކޮށްދިނުމަށް ކަމަށް ވިދާޅުވި އެވެ.

ކޭބަލް ޓީވީ ހިދުމަތުގެ ހުއްދަ އަށް ދެ ކުންފުންޏަކުން ކުރިމަތިލާފައިވާ ކަން ފާހަގަކުރައްވައި ވިދާޅުވީ އޭގެ ތެރެއިން އެއް ކުންފުންޏަކީ ވަރަށް ގާބިލް، އަގުހެޔޮކޮށް ރައްޔިތުންނަށް ހިދުމަތް ފޯރުކޮށްދެވޭނެ ކުންފުންޏެއް ކަމަށެވެ. އެހެންކަމުން ކޮމިޝަނުން ބޭނުންވާ އަމާޒަށް ވާސިލްވެ ފެންވަރު ރަނގަޅު އަގު ހެޔޮ ހިދުމަތެއް ފޯރުކޮށްދެވޭނެ ކަމަށް އުއްމީދުކުރައްވާ ކަމަށް ޝަހީބު ވިދާޅުވި އެވެ.