މައިންބަފައިން ވަރިވުމުން ދަރިންގެ ސިއްހަތު ގޯސްވޭ

މައިންބަފައިން ވަރިވުމުން ދަރިންގެ ސިއްހަތަށް ނޭދެވޭ އަސަރުކުރާ ކަމަށް ދިރާސާއެއްގައި ބުނެފި އެވެ.

ސެންޓިއާގޯ ޑެ ކޮމްޕޮސްޓެލާ އަދި ވިގޯގެ ސައިންސްވެރިން މި ދިރާސާ އަމާޒުކުރީ މައިންބަފައިން ވަރިވުމުގެ ސަބަބުން އެމީހުންގެ ދަރިންގެ ސިއްހަތަށް ލިބޭ ގެއްލުން ހޯދުމަށެވެ. މި ދިރާސާއިން ހާމަވި ގޮތުގައި މިގޮތަށް ވަކިވެގެންދާ ދެމަފިރިންގެ ދަރިންނަށް ކުޑަކަމުދާ ނިޒާމަށް ޖެހޭ އެކި ކަހަލަ ބަލިތަކާއި ގޮހޮރުގެ ބަލިތައް އަދި ހަމުގެ ބަލިތަކާއި ނާރުގެ މައްސަލަތައް ވަރަށް ގިނައިން ދިމާވެ އެވެ.

މި ދިރާސާ އަށް ސައިންސްވެރިން ބަލަމުން ގެންގޮސްފައި ވަނީ ދެމަފިރިން ވަކިވެފައި ތިބި އާއިލާތަކަކާއި ވަކިނުވެ އެކުގައި ތިބި އާއިލާތަކެއްގެ އުމުރުން ދެ އަހަރާއި 18 އަހަރާ ދެމެދުގެ 467 ކުދިންނެވެ.

މި ދިރާސާއިން ސައިންސްވެރިންނަށް ހޯދިފައިވާ ގޮތުގައި ވަކިވެފައިވާ ދެމަފިރިންގެ ދަރިންނަށް ގޮހޮރުގެ މައްސަލަތަކާއި ހަމުގެ މައްސަލަތައް އަދި ކުޑަކަމުދާ ނިޒާމުގެ މައްސަލަތަކާއި ނާރުގެ މައްސަލަތައް ދިމާވެފައިވާލެއް އެހެން ކުދިންނަށް ވުރެ ދެ ގުނަ އިތުރެވެ.

ނަމަވެސް ވަރިވެފައިވާ އާއިލާތަކުގެ ކުދިންގެ ނޭވާލުމުގެ ނިޒާމަށާއި ހިތަށް އަދި އިވުމާއި ފެނުމަށާއި އެލާޖީގެ މައްސަލަތަކެއް ހުރިކަން ސައިންސްވެރިންނަށް ފާހަގަކުރެވިފައެއް ނުވެ އެވެ.

ދެމަފިރިއަކު ވަރިވާން އުޅޭއިރު އެމީހުންގެ މެދުގައި އޮންނަ ދެކޮޅުވެރިކަން ކުދިންނަށް ފޮރުވުމުގައި ގިނަ މީހުންނަށް ނާކާމިޔާބުވެ އެވެ. ނުވަތަ ކުދިންނަށް އެނގިދާނެތީ ގިނަ މީހުން ފަރުވާލެއް ނުބަހައްޓަ އެވެ. މިކަމުގެ ސަބަބުން ފަހުން ވެސް މަންމަ ނުވަތަ ބައްޕައާ އެކު ރަނގަޅު ގުޅުމެއް ގާއިމުކުރަން ކުދިންނަށް އުނދަގޫވެ އެވެ.

"ކުދިން މިފަދަ އާއިލީ މައްސަލަތަކުގައި ގިނަ ދުވަސްތަކެއްވަންދެން ގެންގުޅޭ ނަމަ މި ކުދިންނަށް ޓޮކްސިކް ސްޓްރެސް ދިމާވޭ،" ސައިންސްވެރިން ބުނެފައިވެ އެވެ.

މި ކުދިންނަށް އެކި ބަލިތައް ޖެހެން މެދުވެރިވަނީ އެކުދިންގެ ހަށިގަނޑު މާ ބޮޑަށް ސްޓްރެސްވެފައި ގިނަ ދުވަސްތަކެއް ވަންދެން ހުންނާތީ އެވެ.

މި ދިރާސާ ޝާއިއުކޮށްފައި ވަނީ ޔޫރަޕިއަން ޖާނަލް އޮފް އެޑިޔުކޭޝަން އެންޑް ސައިކޮލޮޖީގަ އެވެ.