ބޭވަފާތެރިވުމަކީ ދަރިންނަށް ދެވޭ އަނިޔާއެއް

މަންމަ ނުވަތަ ބައްޕައާ ވަކިން ދިރިއުޅޭ ކުދިންގެ އަދަދު ވަނީ ވަރަށް ބޮޑަށް އިތުރުވެފަ އެވެ. ވަރި ގިނަ ވުމުގެ ސަބަބުން މައިންބަފައިންގެ ތެރެއިން ކޮންމެވެސް އެކެއްގެ ކައިރީގައި ތިބެ ބޮޑެތިވާ ކުދިން ވަރަށް ގިނަ އެވެ. ބައެއް މީހުން ވަރިވެފައި ތިބި ނަމަވެސް އެމީހުންގެ ދަރިންގެ ހައްގުގައި އެކުވެރިކޮށް އުޅޭވޭތޯ މަސައްކަތް ކުރެ އެވެ.

ކައިވެނި ދަމަހައްޓަން ކިތަންމެ މަސައްކަތެއް ކުރިޔަސް ބައެއް ފަހަރަށް އެކަން ކާމިޔާބެއް ނުވެ އެވެ. އަދި ދެމަފިރިން ވަކިވެގެން ދާއިރު ލިބިފައި ތިބޭ ދަރިން ކިތަންމެ ކުޑަޔަސް އެ ކުދިންނަކަށް އެ ކުދިންގެ މަންމަ އާއި ބައްޕަ ވަކިވެގެންދާ ކަމެއް އޮޅިފައެއް ނޯވެ އެވެ. އަދި ބުނެދޭން ނޭނގުނު ނަމަވެސް އެކުދިންގެ ހިތުގައި މިކަމާ މެދު އެތައް ސުވާލުތަކެއް އުފެދިފައި ހުންނާނެ އެވެ.

މައިންބަފައިންގެ އަމަލުތަކުގެ ސަބަބުން ދަރިންނަށް ކުރާ ނޭދެވޭ އަސަރުތައް

ކްލިނިކަލް ސައިކޮލޮޖިސްޓެއް ބުނި ގޮތުގައި މައިންބަފައިން ކުރެ އެކަކު ބޭވަފާތެރިވުމުގެ ސަބަބުން ކައިވެނީގެ ގުޅުން ކެނޑިފައިވާ އާއިލާތަކުގެ ކުދިންގެ ތެރެއިން 55 ޕަސެންޓް ކުދިންނަކީ އެކުދިން ބޮޑެތި ވެގެން ހަޔާތުގެ ބައިވެރިންނަށް މަކަރު ހަދާ ބޭވާފަތެރި ވާނެ ބައެކެވެ. މައިންބަފައިންނަކީ އެކުދިންގެ ރޯލް މޮޑެލުންގެ ގޮތުގައި ކުދިން ގަބޫލު ކުރެ އެވެ. އެހެންވެ އެ މީހުން ކުރާ އެއްވެސް ކަމެއް އެ ކުދިންނަށް ގޯސް ކަމަކަށް ނުވާނެ އެވެ.

ލޯބިވެރިއަކު، ރައްޓެއްސަކު ނުވަތަ ތިމާގެ މީހަކު ވެސް ކުއްޖަކަށް މަކަރު ހަދާފަނެ އެވެ. ނަމަވެސް އެކުދިންނަށް އެންމެ ބޮޑަށް އަސަރުކުރާނީ މައިންބަފައިން މަކަރު ހެދުމުންނެވެ. މައިންބަފައިން ވަކިވެގެން ދާނީ ދެ މީހުން ކުރެ ކޮންމެވެސް އެކަކު އަނެކަކަށް މަކަރު ހަދައިގެންނެވެ. ނަމަވެސް އެންމެ ބޮޑު މަކަރެއް އެމީހުންނަށް އެ ހެދެނީ އެމީހުންގެ އަމިއްލަ ދަރިންނަށެވެ. އަމިއްލަ މައިންބަފައިން ތިމާއަށް މަކަރު ހަދައި އޮޅުވާލި ކަމުގެ އިހްސާސަށް ވުރެ ބޮޑަށް ކުއްޖަކަށް ކުރާނެ އިހްސާސެއް އޮންނާނެ ހެއްޔެވެ؟

މަންމަ ނުވަތަ ބައްޕައަކު ބޭވަފާތެރިވެފައިވާ ނަމަ އެމީހުންގެ ދަރިންނަށް އެހެން މީހުންނަށް އިތުބާރު ނުކުރެވޭތަން އާދެ އެވެ. އަދި މިއީ އެކުދިން ބޮޑެތިވެގެން އުފައްދާ ގުޅުންތަކަށް ވެސް އަސަރު ފޯރާ ކަމެކެވެ. ރަނގަޅު ގުޅުމެއް ބިނާކޮށް ދެމެހެއްޓުމަށްޓަކައި އިތުބާރަކީ އެންމެ މުހިއްމު ކަންތަކެވެ.

މައިންބަފައިން ވަކިވެގެންދާތަން ފެންނަ ކުދިންގެ ހިތުގައި އެކުދިން އެކަނިވެރިވެ ބާކީވެދާނެކަމުގެ އިހްސާސް ބިރުވެރިކަމެއްގެ ގޮތުގައި އޮވެ އެވެ. މިފަދަ ކުދިން ބޮޑެތިވެގެން އެހެން މީހުން ދެކެ ލޯބިވާން ބިރުގަނެ އެވެ. އަދި ލޯބިވާ މީހަކާ ދިމާވެއްޖެ ނަމަ އެމީހަކު ކޮއްޕާ ދުރަށް ލެވޭތަން އާދެ އެވެ. ހަޔާތުގެ ކޮންމެވެސް ހިސާބެއްގައި އޭނާ ވެސް ތިމާ ދޫކޮށްލާފައި ހިނގައިދާނެ ކަމުގެ ބިރަށެވެ.

މައިންބަފައިންގެ ތެރެއިން އެކަކު އަނެކަކަށް ބޭވަފާތެރިވުމުގެ ސަބަބުން ވަކިވެގެން ދާއިރު ކޮންމެވެސް އެކަކުގެ ކޮޅު ޚިޔާރުކުރަން ކުދިންނަށް މަޖުބޫރުވެ އެވެ. ނަމަވެސް މަންމަ ނުވަތަ ބައްޕަ ދޫކޮށްލާކަށް އެކުދިންނެއް ބޭނުމެއް ނުވާނެ އެވެ. އެކުދިންނަށް ދެ މީހުން ވެސް އެއްވަރަކަށް މުހިއްމު ވާނެ އެވެ. މިފަދަ ހާލަތުގައި ކުދިންގެ ނަފްސު ދެފަޅިކޮށްލުމެކޭ އެއްފަދަ އިހްސާސެއް މިކުދިންނަށް ކުރެވޭނެ އެވެ.

މައިންބަފައިން ވަކިވުމަކީ ކުދިންނަށް ނަފްސާނީ ގޮތުން ދެވޭ ބޮޑު ގެއްލުމެކެވެ. އެ ވޭނީ އިހްސާސްތައް އެކުދިންގެ މުޅި އުމުރަށް އެކުދިންނަށް އުނދަގޫކުރާނެ އެވެ.