ދ. ކަނޑިންމައިގައި ހަދާ ރިސޯޓް ޑިސެމްބަރު މަހު ހުޅުވަނީ

ދ. ކަނޑިންމާގައި ތަރައްގީކުރާ ރިސޯޓް އަންނަ ޑިސެމްބަރު މަހު ހުޅުވަން ތައްޔާރުވަމުން އަންނަ ކަމަށް ބުނެފި އެވެ.

ޓޫރިޒަމް ހަބަރުތައް ގެނެސްދޭ ވެބްސައިޓެއްގައި، އެ ރިސޯޓް ތަރައްގީކުރާ ކުންފުންޏާ ހަވާލާދީ ބުނެފައި ވަނީ ކަނޑިންމަ މޯލްޑިވްސް އަކީ ރާއްޖޭގެ އެހެން ރިސޯޓްތަކާ ވަރަށް ތަފާތު ހިދުމަތްތަކެއް ލިބޭ ރިސޯޓަކަށް ވެގެންދާނެ ކަމަށެވެ.

ކުޑަހުވަދޫގައި އެއާޕޯޓް ވެސް ތަރައްގީކުރާ ރިއޯލޯ ގްރޫޕުން ތަރައްގީކުރާ ރިސޯޓަކީ އެންމެ މަތީ ފެންވަރަށް ތަރައްގީކުރާ ރިސޯޓެކެވެ. އެ ރިސޯޓް ހުޅުވާއިރު ރާއްޖޭގެ އެންމެ ބޮޑު ސުވިމިން ޕޫލް ވެސް އޮންނާނީ އެ ރަށުގަ އެވެ. އަދި ޖިމް އާއި ވޯޓާ ސްޕޯޓްސް އާއި މެރިން ބައިލޮޖީ ސްކޫލަކާއި ކިޑްސް ކްލަބެއްގެ އިތުރުން ކެއިން ބުއިމުގެ ހިދުމަތްދޭ އެންމެ ބޮޑު އެއް ރެސްޓޯރަންޓްތަކާއި ކެފޭތައް ވެސް ހުންނާނީ އެ ރަށުގައި ކަމަށް ބުނެފައިވެ އެވެ.

ޓޫރިޒަމް ހަބަރުތައް ގެނެސްދޭ އެ ވެބްސައިޓްގައި ބުނެފައި ވަނީ ކަނޑިންމަ ހުޅުވޭއިރު އެ ރަށުގައި 11 ކެޓަގަރީއެއްގެ 274 ވިލާ ހުންނާނެ ކަމަށެވެ.

ތިން ކިލޯ މީޓަރުގެ ދިގު ރަށުގައި ގެސްޓް ވިލާތައް ހަދާފައި ވަނީ ޓޫރިސްޓުންނަށް އެންމެ ހިތްހަމަޖެހޭނެ ގޮތްތަކަށް ބަލައިގެން ކަމަށް އެ ވެބްސައިޓްގައި ބުނެފައިވެ އެވެ.