ޗިލެކްސް ހިންގި އިމާރާތް ތަޅާލައިފި

މާލޭގެ އަލިމަސް ކާނިވަލުގައި "ޗިލެކްސް" ކެފޭ ހިންގި އިމާރާތް ތަޅާލައިފި އެވެ.

ނައިބު ރައީސް އަބްދުﷲ ޖިހާދަށް ބޮޑުބޭބެ ވިދާޅުވާ ބޭފުޅެއްގެ ހިއްސާ އޮންނަ ކުންފުންޏަކުން ހިންގަމުން އައި ޗިލެކްސް ކެފޭ، ހައުސިން މިނިސްޓްރީން ވަނީ މި މަހުގެ ކުރީކޮޅު ބަންދުކޮށް، އެތަން ހުސްކޮށްފަ އެވެ. ހައުސިން މިނިސްޓްރީން އޭރު ބުނެފައިވަނީ ޗިލެކްސް ކެފޭ ހިންގި އިމާރާތް ހުސްކުރީ އެތަނާ ބެހޭ ގޮތުން ގާނޫނީ މައްސަލަތަކެއް ހުރުމުންނާއި ތަން ހުރި ސަރަހައްދު ތަރައްގީ ކުރަން ސަރުކާރުން ނިންމާފައިވާތީ އެވެ.

ވެރިކަން ކުރާ ޕީޕީއެމްގެ މަޖިލިސް މެމްބަރުންގެ ތެރެއިން ނުފޫޒު ގަދަ ބޭފުޅުންތަކަކާ ގާތްގުޅުމެއް އޮންނަ އަދި އޭގެ ތެރެއިން ބައެއް ބޭފުޅުން ވެސް ގިނަ ވަގުތު ހޭދަކުރައްވާ ޗިލެކްސް ހިންގި އިމާރާތް ތަޅާލުމާ ގުޅޭ ގޮތުން ހައުސިން މިނިސްޓްރީގެ ބަހެއް އަދިއެއް ނުލިބެ އެވެ.

ޗިލެކްސް ހިންގި އޯޝަން ޕާޗް ކުންފުންޏަށް ސަރުކާރުން އެ ބިން 2015 ގައި ދިނީ ކުރިން އެ ބިން ހަވާލު ކޮށްފައިވާ އިބްރާހިމް ނަސީމް ކިޔާ މީހެއްގެ އަތުން އެތަން އަތުލުމަށް ފަހު އެވެ. އެކަމަކު މިދިޔަ މަހު ސިވިލް ކޯޓުން ނިންމީ ނަސީމް އަތުން ސަރުކާރުން އެތަން އަތުލީ ގާނޫނާ ޚިލާފަށް ކަމަށާއި އެތަން ދިނުމާ ބެހޭ ގޮތުން ނަސީމާ ދެމެދު ހެދި އެއްބަސްވުން އަދިވެސް ދެމި އެބައޮތް ކަމަށެވެ.

އެ އެއްބަސްވުމުގެ ދަށުން ނަސީމަށް ލިބޭ ހުރިހާ ހައްގެއް އޭނާ އޮތީ އިސްމާއިލް ޝުޖާއު (ކާޓިއުންސް ޝުޖާއު) އަށް ބަދަލުކޮށްފަ އެވެ. އެހެންވެ ކޯޓުން ސަރުކާރަށް އެންގީ 15 ދުވަހުގެ ތެރޭގައި އެތަން ޝުޖާއު އަށް ދިނުމަށެވެ. ޗިލެކްސް ހުސްކުރަން ހައުސިން މިނިސްޓްރީން އެންގީ އެ ހުކުމްކުރި ފަހުންނެވެ.

އެކަމަކު ޗިލެކްސް ހުސްކުރަން ހައުސިން މިނިސްޓްރީން އެންގުމުގެ ކުރިން އޯޝަން ޕާޗް ކުންފުނިން ވަނީ ސިވިލް ކޯޓުގެ އެ ހުކުމް ހައި ކޯޓުގައި އިސްތިއުނާފްކޮށްފަ އެވެ.