އަރަބި އަދި ދިވެހި ބޮޑުއަކުރު ލިޔުމުގެ މުބާރާތެއް ބާއްވަނީ

މިނިސްޓްރީ އޮފް އިސްލާމިކް އެފެއާޒް އިން ދިވެހިންނަށް ހާއްސަ ކޮށްގެން، ބޮޑުއަކުރުން ދިވެއްސާއި އަރަބި ލިޔުމުގެ މުބާރާތެއް ބާއްވަން ނިންމައިފި އެވެ.

ދިވެއްސާއި އަރަބި ލިޔުމުގެ ހުނަރު ކުރިއެރުވުމުގެ މަގްސަދުގައި ބާއްވާ މި މުބާރާތުގައި ބައިވެރިވުމަށް ފޯމް ހުށައަޅަން ޖެހޭނެ ކަމަށް މިނިސްޓްރީ އޮފް އިސްލާމިކް އެފެއާޒް އިން މިއަދު ނެރުނު ބަޔާނުގައި ވަނީ ބުނެފަ އެވެ. އެގޮތުން މުބާރާތުގައި ބައިވެރިވުމުގެ އެންމެ ފަހު ތާރީހަކީ އަންނަ މަހުގެ 30 ވަނަ ދުވަަހެވެ.

މިނިސްޓްރީގެ ބަޔާނުގައި ބުނެފައިވާ ގޮތުގައި މުބާރާތަށް ފޮނުވާ ލިޔުމަކީ ބައިވެރިންގެ އަމިއްލަ އަތުން ލިޔެ، އަދި ޑިޒައިންތަކަކީ ބައިވެރިންގެ އަމިއްލަ ފަންނުވެރި ޑިޒައިންތަކަށް ވާންޖެހޭނެ އެވެ.

އެ މިނިސްޓްރީން ބުނި ގޮތުގައި، މުބާރާތުން އެއް ވަނަ އަށް ހޮވޭ ފަރާތަކަށް 50،000ރ ދިނުމަށް ވަނީ ހަަމަޖެހިފަ އެވެ. އަދި ދެ ވަނަ އަށް ހޮވޭ ފަރާތަކަށް 40،000ރ އަދި ތިން ވަނަ އަށް ހޮވޭ ފަރާތަަށް 35،000 ދިނުމަށް ހަމަޖެހިފައިވާ ކަމަށް އެ މިނިސްޓްރީގެ ބަޔާނުގައި ވަނީ ބުނެފަ އެވެ.

މި މުބާރާތުގެ ވަނަތައް ހޮވާނީ ދިވެހި އަދި އަރަބި ދާއިރާ ވަކިންނެވެ. މި މުބާރާތުގަޢި ބައިވެރިވާ ފޯމާއި ގަވައިދު އެ މިނިސްޓްރީގެ ވެބްސައިޓުން ލިބެން ހުންނާނެ ކަމަށް މިނިސްޓްރީން ބުންޏެވެ.