އިބްރާހިމް ދީދީއަށް ކުރާ ދައުވާއާ ގުޅޭ ލިޔުންތައް ހަވާލުކުރަން މާދަމާ ކޯޓަށް ހާޒިރުކުރަނީ

ކްރިމިނަލް ކޯޓުގެ ކުރީގެ އިސްގާޒީ އަބްދުﷲ މުހައްމަދު ބަންދުކުރި މައްސަލާގައި ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެމްބަރު އިބްރާހިމް ދީދީގެ މައްޗަށް ކުރާ ދައުވާއާ ގުޅިގެން ލިޔުންތަކާ ހަވާލުވާން މާދަމާ ކޯޓަށް ހާޒިރުވާން އޭނާ އަންގައިފި އެވެ.

އެމްޑީޕީގެ ވެރިކަމުގައި އަބްދުﷲ ގާޒީ ބަންދު ކުރިއިރު އެމްއެންޑީއެފްގެ މާލޭ އޭރިޔާގެ ކޮމާންޑަރަކަށް ހުންނެވި އިބްރާހިމް ދީދީގެ މައްޗަށް ދައުލަތުން ކުރާ ޓެރަރިޒަމްގެ ދައުވާއާ ގުޅޭ ލިޔުންތަކާ ހަވާލުވާން މާދަމާ މެންދުރު ކްރިމިނަލް ކޯޓަށް ހާޒިރުވާން އޭނާ އަށް މިހާރު ވަނީ އަންގައިފަ އެވެ.

ޝަރީއަތް ފެށުމުގެ ކުރިން މައްސަލައިގެ ލިޔުންތައް، ދައުވާލިބޭ ފަރާތްތަކާ ހަވާލު ކުރުމަކީ އާންމު އުސޫލުން މިހާރު ކޯޓުން ކުރާ ކަމެކެވެ.

އިބްރާހިމް ދީދީގެ މައްޗަށް ދައުވާކޮށް، މިދިޔަ މަހު ދައުލަތުން ކޯޓަށް މައްސަލަ ފޮނުުވީ އެ މައްސަލާގައި އޭނާއަށް ދައުވާ ނުކުރަން ނިންމާފައި އޮތުމަށް ފަހު އެވެ.

އެ ދައުވާ ސާބިތުވެއްޖެ ނަމަ 10 އަހަރާއި 15 އަހަރާ ދެމެދުގެ ޖަލު ހުކުމެއް ނުވަތަ އަރުވާލުމުގެ ހުކުމެއް އަންނާނެ އެވެ. އެފަދަ ހުކުމެއް އަތުވެއްޖެ ނަމަ މަޖިލީހުގެ މެމްބަރުކަމުގެ ގޮނޑި އިބްރާހިމް ދީދީ އަށް ގެއްލޭނެ އެވެ.

އަބްދުﷲ ގާޒީ ބަންދުކުރި މައްސަލާގައި ކުރީގެ ރައީސް މުހައްމަދު ނަޝީދާއި އޭރުގެ ޑިފެންސް މިނިސްޓަރު ތޮލްހަތު އިބްރާހިމް ކަލޭފާނުގެ މައްޗަށް ކުށް ސާބިތުވެ، ޖަލު ހުކުމް ވަނީ އައިސްފަ އެވެ.