އިންސާނީ ހައްގުތަކަށް އިހްތިރާމް ކުރަން، ހަތަރު ކުންފުންޏަކުން އެއްބަސްްވެއްޖެ

އިންސާނީ ހައްގުތަކަށް އިހްތިރާމް ކުރަން، ފެނަކަ ކޯޕަރޭޝަނާއި އެއާޕޯޓްސް ކޮމްޕެނީ އާއި އާސަންދަ އަދި މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އެއްބަސްވެ، އިގުރާރެއްގައި ސޮއިކޮށްފި އެވެ.

ހިއުމަން ރައިޓްސް ކޮމިޝަން (އެޗްއާރުސީއެމް)އާ އެކު މި ކުންފުނިތަކުން އިގުރާރުގައި ސޮއިކުރީ އެ ކުންފުނިތަކުގެ މުވައްޒަފުންނާއި ހިދުމަތް ދިނުމުގައި އެހެން މީހުންނަށް އިންސާނީ ހައްގުތައް އަދާކުރުމަށެވެ.

އިގްރާރުގައި އެޗްއާރުސީއެމްގެ ފަރާތުން ސޮއި ކުރެއްވީ އެތަނުގެ ރައީސް އައިމިނަތު އީނާޝް އެވެ. އަދި ފެނަކައިގެ ފަރާތުން އެތަނުގެ މެނޭޖިން ޑިރެކްޓަރު އަހުމަދު ޝަރީފް އާއި އެމްއޭސީއެލުން އެތަނުގެ މެނޭޖިން ޑިރެކްޓަރު އާދިލް މޫސާ އާއި އެމްޕީއެލްގެ ސީއީއޯ އިބްރާހިމް އަބްދުލްރައްޒާގު ހަލީމް އަދި އާސަންދަ މެނޭޖިން ޑިރެކްޓަރު ހަސަން އަލީ ވެސް އެ އިގްރާރުގައި ސޮއިކުރެއްވި އެވެ.

އެ ރަސްމިއްޔާތުގައި ވާހަކަ ދައްކަވަމުން އެމްޕީއެލްގެ ސީއީއޯ ހަލީމް ވިދާޅުވީ 100 ޕަސެންޓް ސަރުކާރު ހިއްސާވާ އެ ކުންފުނިން ހުރިހާ މުވައްޒަފުންނާ ދޭތެރޭ ވެސް އަމަލު ކުރަމުން އަންނަނީ ވަރަށް އިހުތިރާމާ އެކުގައި ކަމަށެވެ.

އަދި ޖިންސީ ފުރައްސާރަ ކުރުމާއި ވަޒީފާގައި ތަފާތުކުރުން ފަދަ ކަންކަން ހުއްޓުވުމަށް ގަވައިދުތައް ހަދާފައި ހުންނައިރު، އެ ފަދަ ކަމެއް ހިނގައިފި ނަމަ ހަރުކަށި އަދަބު އެ ކުންފުނިން ދޭ ކަމަށް އޭނާ ވިދާޅުވި އެވެ.

ފެނަކައިގެ އެމްޑީ އަހުމަދު ޝަރީފް ވިދާޅުވީ ރާއްޖޭގެ ގާނޫނުތަކާއި ގަވައިދުތަކުން ވަރަށް ފުރިހަމަ އަށް އިންސާނީ ހައްގުތައް ރައްކާތެރިކޮށްދޭ ކަމަށާއި އެ ކުންފުނީގެ ގަވައިދުތަކާއި އުސޫލުތައް ވެސް އެކުލަވާލާފައިވަނީ އެއާ އެއްގޮތްވާ ގޮތުގެ މަތިން ކަމަށެވެ.

ރާއްޖޭގެ ތިން ބައިކުޅަ ދެބައި މީހުންނަށް ފެނަކައިން ހިދުމަތް ދެމުން އަންނަކަން ފާހަގަ ކުރައްވައި ޝަރީފް ވިދާޅުވީ އެތަނުގައި އަންހެނުންނާއި ފިރިހެނުންނަށް ހަމަހަމަކަމާ އެކު ވަޒީފާ އަދާކުރެވޭނެ ކަމަށެވެ. އަދި އަންހެނުން ވަޒީފާ އަދާކުރުމަށް ޖެހިލުންވުން ފަދަ ޝަކުވާއެއް މިހާތަނަށް ލިބިފައި ނުވާ ކަމަށް ވިދާޅުވި އެވެ.

އެ ރަސްމިއްޔާތުގައި ވާހަކަ ދައްކަވަމުން އާސަންދައިގެ އެމްޑީ ހަސަން ވިދާޅުވީ ރާއްޖޭގައި އިންސާނީ ހައްގުތައް ނެތް ކަމަށް ބުނެ ވާހަކަ ދެއްކުމުގެ ފުރުސަތު ނެތް ކަމަށާއި އެންމެ ކުރިއަރާފައިވާ ގައުމުތަކެކޭ އެއްގޮތަށް ރާއްޖޭގައި އެ ރައްކާތެރިކަން ލިބިދޭ ކަމަށެވެ. އަދި އިންސާނީ ހައްގުތައް ހުރިހާ އެންމެންނަށް ލިބިދޭތޯ އެޗްއާރުސީއެމުން ޔަގީންކުރާކަން ފާހަގަ ކުރައްވައި، އެ ކޮމިޝަނަށް އޭނާ ތައުރީފް ކުރެއްވި އެވެ.

އެމްއޭސީއެލްގައި 2،600 އަށް ވުރެ ގިނަ މުވައްޒަފުން މަސައްކަތްކޮށް، ކޮންމެ އަހަރަކު ވެސް ރާއްޖެ އަންނަ ގިނަ ބަޔަކަށް ހިދުމަތް ދެމުން އަންނަކަން ފާހަގަ ކުރައްވައި، އެމްޑީ އާދިލް ވިދާޅުވީ ގާނޫނުތަކުގެ ދަށުން ލާޒިމްކުރާ ހުރިހާ އިންސާނީ ހައްގުތަކެއް ވެސް އެ ކުންފުނިން ފުރިހަމަ އަށް ލިބިދޭނެ ކަމަށެވެ. އަދި މި އިގްރާރުގެ ސަބަބުން އެކަމަށް އިތުރު ހިތްވަރެއް ލިބިވަޑައިގެންފައިވާ ކަމަށާއި މިކަން އިތުރަށް ފުރިހަމަކުރުމަށް އިދާރީ ގޮތުން ބަލަން ޖެހޭ ކަންކަން ވެސް ބަލައި، އެކަމުގެ ޔަގީންކަން އޭނާ ދެއްވި އެވެ.

އެ ރަސްމިއްޔާތުގައި އެޗްއާރުސީއެމްގެ ފަރާތުން ވާހަކަ ދައްކަވަމުން އެ ކޮމިޝަންގެ މެމްބަރު މޫސާ އަލީ ކަލޭފާނު ވިދާޅުވީ ރާއްޖޭގެ ތާރީހަށް ބަލާއިރު، އިންސާނީ ހައްގުތަކާ އެންމެ ބޮޑަށް ހިލާފުވެފައިވަނީ ކުންފުނިތަކުން ކަމަށެވެ. އެގޮތުން ބައެއް މީހުންނަށް ކާބޯތަކެތި ނުދިނުން ފަދަ އެންމެ އަސާސީ ހައްގުތައް ދިނުމަށް ކުރިން ބައެއް ކުންފުނިތަކުން ދެކޮޅު ހަދާފައިވާ ކަަމަށާއި އެހެންވެ، މިހާރުގެ ކުންފުނިތަކުން އެ ހައްގުތަކަށް ވަރަށް ބޮޑަށް އިހްތިރާމްކުރަން ޖެހޭނެކަން އޭނާ ފާހަގަ ކުރެއްވި އެވެ.

އަދި މި އެއްބަސްވުމުގެ ސަބަބުން ކުންފުނިތަކުންގެ އިންސާނީ ހައްގުތައް ފުރިހަމަވެގެންދާނެ ކަމަށް އުއްމީދު ކުރައްވާ ކަމަށް ވެސް މޫސަ ވިދާޅުވި އެވެ.

އެޗްއާރުސީއެމުން ވަނީ މިދިޔަ އަހަރު ވެސް ހަތަރު ކުންފުންޏަކާ އެކު މި އެއްބަސްވުމުގައި ސޮއިކޮށްފަ އެވެ.