އާޒިމްގެ ޕާސްޕޯޓް ވެސް ތިން މަސް ދުވަހަށް ހިފަހައްޓައިފި

މެދު ހެންވޭރު ދާއިރާގެ މެމްބަރު އަލީ އާޒިމްގެ ޕާސްޕޯޓް ވެސް ތިން މަސް ދުވަހަށް ކްރިމިނަލް ކޯޓުން ހިފަހައްޓާފައިވާ ކަމަށް އޭނާ މިރޭ ވިދާޅުވެއްޖެ އެވެ.

އެންމެ ބޮޑު އިދިކޮޅު ޕާޓީ، އެމްޑީޕީގެ މެމްބަރު އަލީ އާޒިމް މިރޭ ވިދާޅުވީ އޭނާގެ ޕާސްޕޯޓް ހިފަހައްޓާފައި ވަނީ މިދިޔަ މަހުގެ 24 ގައި މަޖިލިހުގެ އިދާރާ އަށް ވަން މައްސަލާގައި ކަމަށެވެ.

އޭނާ ވިދާޅުވި ގޮތުގައި ޕާސްޕޯޓް ހިފަހައްޓާފައިވާކަން އެނގިވަޑައިގަތީ، އެކަން ކޮށްފައިވޭތޯ އަމިއްލަ އަށް ޗެކް ކުރެއްވުމުންނެވެ. ޕާސްޕޯޓް ހިފެހެއްޓިކަން ދައުލަތުގެ އެއްވެސް އިދާރާއަކުން އޭނާ އަށް އޭގެ ކުރިން އަންގާފައި ނެތް ކަމަށް އާޒިމް ވިދާޅުވި އެވެ.

"މާދަމާ އަޅުގަނޑު ފުރަން ހަމަޖެހިފައި އޮތުމުން، ޕާސްޕޯޓް ހިފަހައްޓާފައި އޮތްތޯ އަޅުގަނޑު ޗެކް ކުރީ. ޕާސްޕޯޓް ހިފަހައްޓާފައި އޮތް ކަން އިމިގްރޭޝަންގެ ތެރެއިން އެނގުމުން ޕޮލިހަށް ދިޔައީމާ އަޅުގަނޑަށް ކޯޓު އަމުރު ވެސް ދިނީ. ފުލުހުން ބުނަނީ އަޅުގަނޑާ ދިމާނުވީއޭ. އެކަމަކު ޕާސްޕޯޓް ހިފެހެއްޓި ކަމުގެ އަމުރު އަޅުގަނޑާ ހަވާލުކުރަން އުޅުނީ އިއްޔެ ހަވީރު ފަހެއް ޖަހާކަންހާއިރޭ ފުލުހުން ބުނާއިރު، އެ ގަޑީގައި އަޅުގަނޑު ހުންނާނީ ވެސް ފުލުހުންގެ ބެލުމުގެ ދަށުގައި،" ނޫސްވެރިޔާ އަހުމަދު ރިލްވާން ވަގަށް ނެގިތާ ތިން އަހަރު ފުރުން ފާހަގަކުރުމަށް އިއްޔެ ހަވީރު ބޭއްވި ހިނގާލުމުގެ ތެރެއިން ހައްޔަރު ކުރުމަށް ފަހު، ދޫކޮށްލި އާޒިމް ވިދާޅުވި އެވެ.

"އެހެންވީމާ މިއިން އެނގެނީ ފުލުހުން ކިޔާ އެއްޗެއް ދިމާނުވާކަން. ދެކޮޅު ނުޖެހޭކަން. އަޅުގަނޑު ފުލުހުންގެ ބެލުމުގެ ދަށުގައި ހުރި ގަޑިއެއްގައި އަމުރު ހަވާލުކުރަން އަޅުގަނޑު ނުފެނުނު ކަމަށް ބުނީ ކިހިނެއް ގަބޫލުކުރާނީ؟."

އާޒިމް ވިދާޅުވި ގޮތުގައި ޕާސްޕޯޓް ހިފެހެއްޓި ސަބަބަކީ ތަހުގީގަށް ހުރަސް އެޅިދާނެތީ ކަމަށް އަމުރުގައިވެ އެވެ.

ރައްޔިތުން ނުކުމެ ސަރުކާރު ވައްޓާލަން ހިތްވަރު ލިބޭ ފަދަ ވާހަކައެއް ދެއްކެވިކަމުގެ ތުހުމަތުގައި ތިމަރަފުށީ ދާއިރާގެ މެމްބަރު މުހައްމަދު މުސްތަފާގެ ޕާސްޕޯޓް ތިން މަސް ދުވަހަށް ހިފަހައްޓަން ކްރިމިނަލް ކޯޓުން އިއްޔެ ވަނީ ހިފަހައްޓައިފަ އެވެ. މީގެ އިތުރުން ވެސް އިދިކޮޅު އެހެން ބައެއް މެމްބަރުންގެ ޕާސްޕޯޓް ވަނީ އެކި ސަބަބުތަކާ ގުޅުވައިގެން ހިފަހައްޓައިފަ އެވެ.