އިދިކޮޅު ފަރާތްތަކުގެ ޖަލްސާ އަށް ފުލުހުން މަގު ބަންދެއް ނުކޮށްދިން

ވެރިކަން ކުރާ ޕީޕީއެމްގެ ޖަގަހައެއް މާލޭގައި ހުޅުވުމަށްޓަކައި ރޭ ބޭއްވި ހަފުލާ އަށް މަގެއް ބަންދުކޮށްދީ، އެތަނުގެ ސަލާމަތީ ކަންކަން ބެލެހެއްޓި ގޮތަށް، އިދިކޮޅު އެމްޑީޕީ އަށް ވެސް މިރޭ އެކަން ފަހި ކޮށްދިނުމަށް އެދުމުން، ހައުސިން މިނިސްޓްރީގެ ހުއްދަ ހުށަހެޅުމަށް ފުލުހުން މިއަދު ޝަރުތުކޮށްފި އެވެ.

ޕީޕީއެމްގެ ޖަގަހައެއް ހުޅުވުމަށް، ފުލުހުން ރޭ ވަނީ ފާށަނާކިލެގެފާނު މަގު ބަންދުކޮށް، އެ ސަރަހައްދުގެ ސެކިއުރިޓީ ބަލަހައްޓައިދީފަ އެވެ.

އިދިކޮޅު އެމްޑީޕީން މިރޭ ކުނޫޒްގައި ޖަލްސާ ކުރިއަށް ގެންދާ ވަގުތު އެ ޖަގަހަ ހުންނަ ފަނޑިޔާރު މަގު ބަންދުކޮށް، އެ ސަރަހައްދުގެ ސަލާމަތީ ކަންކަން ބަލަހައްޓައި ދިނުމަށް އެދުމުން ފުލުހުން ދިން ޖަވާބުގައި ބުނެފައި ވަނީ ހައުސިން މިނިސްޓްރީގެ ހުއްދައާ އެކު ހުށަހެޅުމުން ހަމަޖެހޭނެ ކަމަށެވެ.

އެކަމަކު އެމްޑީޕީ އަށް ފުލުހުން ޖަވާބު ދީފައި ވަނީ މިއަދުގެ ރަސްމީ ގަޑި ނިމި، ހަވީރު ހަތަރެއް ޖަހާ ބޮޑުވި ފަހުން ކަން އެ ޕާޓީން ފާހަގަކުރެ އެވެ.

އިދިކޮޅު ހަރަކާތުގެ މައި ޖަގަހަ ކުނޫޒް ހުންނަ ފަނޑިޔާރު މަގު މިރޭ ބަންދުކޮށް، ސެކިއުރިޓީ ބަލަހައްޓައި ދިނުމަށް އެދިވަޑައިގެން ފުލުހުންނަށް ސިޓީ ފޮނުއްވި، އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރު ވިދާޅުވީ އެ ޖަލްސާ އަށް ހައުސިން މިނިސްޓްރީގެ ވަކި ހުއްދައެއް ނަގަންޖެހޭ ސަބަބެއް އޮތް ކަމަކަށް ދެކެވަޑައިނުގަންނަވާ ކަމަށެވެ. ސަބަބަކީ ޖަލްސަ ބާއްވަނީ ކުނޫޒްގެ އެތެރޭގައި ކަމަށް ވުމެވެ.

"ކުނޫޒްގައި ޖަލްސާ ބާއްވާ ރެ އެއް ވެއްޖިއްޔާ އެ ތަން ފުރިގެން މަގުމަތީގައި ވެސް ގިނަ އަދަދެއްގެ ބަޔަކު ތިބޭ. އެހެންވެ އަޅުގަނޑުމެން ފުލުހުންގެ ކިބައިން މި އެދުނީ އެގޮތަށް މަގުމަތި ފުރޭތީ، މިރޭ ފަނޑިޔާރު މަގު ބަންދުކޮށް ސެކިއުރިޓީ ބަލަހައްޓައި ދިނުމަށް. އެހެންވީމާ މީގައި ހައުސިން މިނިސްޓްރީގެ ހުއްދައެއް ބޭނުންވާނެ ކަމަކަށް އަަޅުގަނޑުމެން ނުދެކެން،" އަނަސް ވިދާޅުވި އެވެ.

"ކުނޫޒްގައި ޖަލްސާ ބާއްވާ އެހެން ރޭތަކުގައި ފުލުހުން އައިސް، އެތަނުގެ ބޭރުގައި ތިބޭ މީހުން ފަހާލާއިރު ހައުސިން މިނިސްޓްރީގެ ހުއްދައެއް އޮތްތޯ ނާހާ. އެހެންވީމާ އެއިން ވެސް އެބަ އެނގޭ އެއީ ބޭނުންވާ ހުއްދައެއް ނޫންކަން."

އޭނާ ވިދާޅުވީ ތަފާތު ކުރުން ނުގެންގުޅެ ގާނޫނުތަކުގައިވާ ގޮތުގެ މަތިން ފުލުހުން އިންތިޒާމްތައް ހަމަޖައްސައިދޭން ޖެހޭނެ ކަމަށެވެ.

އިދިކޮޅު ފަރާތްތަކުގެ ބައްދަލުވުންތަކާއި އެއްވުންތަކަށް މި ސަރުކާރުގައި ފުލުހުން ހުރަސްއެޅުމާއި އެ ކަންކަމަށް ސަރުކާރުގެ ކަމާ ގުޅޭ އިދާރާތަކުން ހުއްދަ ނުދިނުމުގެ ޝަކުވާ ބޮޑުވެފައިވާތާ ކިތަންމެ ދުވަހެކެވެ.