ވަކީލުންގެ ފަރާތުން އޭޖީއަށް "ބޮޑު" ގާނޫނުއަސާސީއެއް ހަދިޔާކޮށްފި

ގާނޫނީ ވަކީލުންތަކެއްގެ ފަރާތުން އެޓާނީ ޖެނެރަލް މުހައްމަދު އަނިލަށް ގާނޫނުއަސާސީގެ ބޮޑު ކޮޕީއެއް މިއަދު އަރުވައިފި އެވެ.

ގާނޫނީ ދާއިރާގައި ހުރި މައްސަލަތަކާ ދެކޮޅަށް ވަކީލުންތަކެއް މިހާރު ހިންގަމުންދާ ހަރަކާތުގެ ދަށުން އޭޖީ އަނިލަށް ވަކީލުންގެ ފަރާތުން އޭޖީ އޮފީހާ ހަވާލުކުރީ ކުލަކޮށް ޕްރިންޓްކޮށްފައިވާ ގާނޫނުއަސާސީގެ ބޮޑު ކޮޕީއެކެވެ. އެ ކޮޕީގެ އިތުރުން ވަކީލުން ތައްޔާރު ކޮށްފައިވާ ޕެޓިޝަނެއް ވެސް ވަކީލުންގެ ފަރާތުން ވަނީ އޭޖީ އޮފީހާ ހަވާލުކޮށްފަ އެވެ.

އެ ހަރަކާތުގައި އިސްކޮށް ހަރަކާތްތެރިވެ ވަޑައިގަންނަވާ ކުރީގެ ބަންޑާރަ ނައިބު ހުސްނުއްސުއޫދު ވިދާޅުވީ "ބޮޑު" އަދި "ފުޅާ" ގާނޫނުއަސާސީއެއް އޭޖީ އަނިލާ ހަވާލުކުރީ ގާނޫނު އަސާސީގެ ބައެއް މާއްދާތައް ބައެއް ބޭފުޅުންނަށް މިިހާރު ނުފެންނާތީ ކަމަށެވެ. އެހެން މުއައްސަސާއަކުން ވެސް އެފަދަ ބޮޑު ގާނޫނީއަސާސީއެއް ބޭނުންވާ ނަމަ އެ ހަރަކާތުގެ ދަށުން ހިލޭ ހަދިޔާކުރާނެ ކަމަށް ސުއޫދު ވިދާޅުވި އެވެ.

"އޭގެން އެއްވެސް މާއްދާއެއް އުނިވެފައެއް ނޯންނާނެ. ހުރިހާ މާއްދާއެއް ހަމަތޯ އަޅުގަނޑުމެން ޔަގީން ކުރިން. ބައެއް ބޭފުޅުން ގާނޫނުއަސާސީ ބެއްލެވުމުގައި ބައެއް މާއްދާތައް ފެނިވަޑައިނުގަންނަވާ ކަމަށް ހީވާތީވެ، ގައިމު ވެސް ފެނިވަޑައިގަންނަވާ ސައިޒުގައި ގާނޫނުއަސާސީ މި ހަދިޔާކުރީ،" ސުއޫދު ވިދާޅުވި އެވެ.

ގާނޫނީ ވަކީލުންގެ ފަރާތުން މިހާރު ހިިންގާ ހަރަކާތުގެ ދަށުން ސުޕްރީމް ކޯޓަށް ޕެޓިޝަނެއް ވެސް ހުށަހެޅި އެވެ. އެކަމަކު އެ ޕެޓިޝަން އެ ކޯޓުން ބަލައިގެންފައެއް ނުވެ އެވެ.