އުމުރުން 30 އަހަރު، އެކަމަކު ތުއްތު ކުއްޖެއް

މިއީ އުމުރުން 30 އަހަރު މީހެއް ނަމަވެސް އޭނާ އިންނަނީ ތުއްތު ކުއްޖެއްހެންނެވެ. މި މައްސަލަ ދިމާވެފައި ވަނީ ކީއްވެގެން ކަމެއް ޑޮކްޓަރުންނަކަށް ވެސް ޔަގީންކަމާ އެކު ބުނާކަށް ނޭނގެ އެވެ.

ޗައިނާގެ އަންހުއި ޕްރޮވިންސްގެ ވަންފަންގް އަވަށުގައި ދިރިއުޅޭ އުމުރުން 52 އަހަރުގެ ޗޫ ޒިއޮޕިން ބުނި ގޮތުގައި އެ ސަރަހައްދުގެ ހޮސްޕިޓަލުތަކުގެ އެއްވެސް ޑޮކްޓަރަކަށް އޭނާގެ ދަރިފުޅަށް ޖެހިފައިވާ ބައްޔެއް ނޭނގުނެވެ. އޭނާ ބުނި ގޮތުގައި ދަރިފުޅުގެ އުމުރުން އެންމެ ދެ އަހަރުގައި ކުއްޖާ ހެދިބޮޑުވުން ވަނީ ހުއްޓިފަ އެވެ.

ވަންގް ޓިއަންފަންގް އުފަންވީ 1987 ވަނަ އަހަރު އެވެ. މިހާރު 30 އަހަރު ފުރިފައިވާ ވަންގް އަށް އަދިވެސް ވާހަކައެއް ނުދެއްކެ އެވެ. ނުހިނގެ އެވެ. އަމިއްލައަށް އެއްވެސް ކަމެއް ނުކުރެވެ އެވެ. އެންމެ ތުއްތު ކުއްޖަކަށް ކަންތައް ކޮށްދޭ ގޮތަށް ޗޫ އަށް ޖެހިފައިވަނީ ދަރިފުޅުގެ ހުރިހާ ކަމެއް ކޮށްދޭށެވެ.

ޗޫ ބުނި ގޮތުގައި އޭނާގެ ދަރިފުޅުގެ ހަށިގަނޑު މީގެ 28 އަހަރު ކުރީގައި ހުރި ގޮތަށް ހުރުމުގެ އިތުރުން ސިކުނޑި ވެސް ހުރީ ހަމަ އެހާ ޅަކޮށެވެ. ދަރިފުޅުގެ ވިސްނުން ހުރީ ދެ އަހަރުގެ ކުޑަ ކުއްޖެއްގެ ވިސްނުމެކޭ އެއްފަދަ ގޮތަކަށެވެ.

ދަރިފުޅުގެ ބައްޕަގެ އަޅާލުމެއް ނުލިބެ އެވެ. އެކަމަކު އެ ވާހަކަ ދައްކާކަށް ޗޫ ބޭނުމެއް ނޫނެވެ.

"މި ދަރިފުޅަށް ތިން އަހަރުގައި 1990 ވަނަ އަހަރު އަވަށު މީހުން އަހަންނަށް ލަފާ ދިން މަގުމައްޗަށް ދަރިފުޅު ދޫކޮށްލަން. އޭރުން ކޮންމެވެސް މީހަކު ދަރިފުޅު ގެންދާނޭ އެ މީހުން ބުނި. އަދި އަހަރެން އެެހެން ކުއްޖެއް ހޯދަން އެމީހުން ނަސޭހަތްތެރިވި. އަހަރެން ކަނޑައެޅިގެން އެކަމަށް ނޫނެކޭ ބުނިން،" ޗޫ ބުންޏެވެ.

ވަންގްގެ ހެދިބޮޑުވުން ހުއްޓުމުން އޭނާ ޑޮކްޓަރަށް ދައްކައިގެން ބޭސް ކުރަން ފެށި ދުވަސްވަރު ޑޮކްޓަރުން ޗޫ ގާތު ބުނީ 30 އަހަރު ވަންދެން ދުނިޔޭގައި ނުހުންނާނެ ކަމަށެވެ. އެހެންވެ އޭނާ މިހާތަނަށް ދުނިޔޭގައި ހުރުމަކީ ވެސް އަޖައިބެއް ފަދަ ކަމެއްގެ ގޮތުގައި އޭނާ ސިފަކުރި އެވެ.

"އަަހަންނަށް އެނގޭ ދަރިފުޅު ދުވަހަކުވެސް ރަނގަޅު ނުވާނެކަން. އެކަމަކު އޭނާ ދުނިޔޭގައި އުޅޭތަން ދެކެން އަހަރެން ބޭނުމީ. އޭނާ މަރުވާކަށް އަހަރެން ބޭނުމެއް ނޫން،" ޗޫ ބުންޏެވެ.