ބައްޕަގެ ފުރާނަ ސަލާމަތްކުރަން ކުއްޖެއްގެ ބަރުދަނަށް 10 ކިލޯ އިތުރުކޮށްފި

ޗައިނާގައި، އުމުރުން އެންމެ އަށް އަހަރުގެ ފިރިހެންކުއްޖަކު ބައްޕަގެ ފުރާނަ ސަލާމަތްކުރުމަށް ބަރުދަނަށް 10 ކިލޯ އިތުރުކޮށްފި އެވެ.

އެ ކުއްޖާ އަށް މިކަން ކުރަން ޖެހުނީ ބަލި ހާލު ބޮޑުވެފައިވާ ބައްޕަ ސަލާމަތް ކުރެވެން އޮތީ ބޯން މެރޯ ހަދައިގެން ކަމަށް ވެފައި އެ ކުއްޖާގެ ބޯންމެރޯ ނޫނީ ބޭނުންކުރެވެން ނެތުމުންނެވެ. އެކަމަކު ބޯން މެރޯ ހަދިޔާކުރެވެން އޮތީ އެކަން ކުރެވޭ ވަރަށް ފަލަވެގެންނެވެ ކުއްޖާ ލުއިކަމުން ޑޮބޯން މެރޯ ނެގޭނެ ގޮތެއް ނުވެގެން އުޅޭތާ ވަނީ ގިނަ ދުވަސްތަކެއް ވެފަ އެވެ.

ކާއޯ ޔިންޕެންގްގެ ބައްޕަ އަށް ލޭގެ ކެންސަރު ނުވަތަ ލިއުކީމިއާ ޖެހި ދުނިޔޭގައި ހުރެވޭނީ އެންމެ ހައެއްކަ މަސް ދުވަހު ކަމަށް ޑޮކްޓަރުން އޮތީ ބުނެފަ އެވެ. ބައްޕަ ސަލާމަތްވާނެ ހަމައެކަނި ގޮތަކީ ކާއޯ ބޯންމެރޯ ދިނުމެވެ.

ކާއޯ އެވަގުތު ވެސް އޭނާގެ ބައްޕައަށް ބޯން މެރޯ ދޭން ތައްޔާރެވެ. ނަމަވެސް އޭނާ ހިކިކަމުން ޑޮކްޓަރުން އޭނާގެ ބޯން މެރޯ ނަގާދޭކަށް އެއްބަހެއް ނުވި އެވެ. ކާއޯގެ ބައްޕައާ ބޯން މެރޯ ގުޅޭ އެހެން އެއްވެސް މީހެއް ނެތުމުން ޑައެޓް ޕްލޭނެއްގެ ދަށުން ކެއުން ބަދަލުކޮށް ފަލަވާން ކާއޯ ގަސްތުކުރި އެވެ. އޭރުން ހަށިގަނޑުން ފުދޭވަރަކަށް ގިނައިން ލޭ އުފައްދައިދީ ބޯން މެރޯ ނެގޭނެ ގޮތް ވާނެތީ އެވެ.

ކާއޯ އަށް އެންމެ ދެ މަސް ތެރޭ މިކަން ކާމިޔާބުކުރުމުގައި އެހީތެރިވެދިނީ އާއިލާގެ މެމްބަރުންނެވެ. ސްޓްރެއިޓް ޓައިމްސްގައި ބުނާ ގޮތުން ކާއޯގެ ބޯން މެރޯ ބޭނުންކޮށްގެން އޭނާގެ ބައްޕަގެ ސާޖަރީ ވަނީ ކާމިޔާބުވެފަ އެވެ. އަދި މިހާރު އޭނާގެ ހާލު މަޑުމަޑުން ރަނގަޅުވަމުން އަންނަ ކަމަށްވެ އެވެ.

މީގެ އިތުރުން ކާއޯ މިހާރު ވަނީ ކައްކަން ވެސް ދަސްކޮށްފަ އެވެ. އެއީ އޭނާގެ ބައްޕައަށް ކާންދޭން މީރު ކާނާ ތައްޔާރުކޮށްދިނުމަށެވެ.