ޖަޕާންގެ އިންވެސްޓަމަންޓް އިތުރު ކުރަން ރައީސް ޔާމީނާ މަޝްވަރާކޮށްފި

ޖަޕާންގެ ޓޫރިސްޓުން ރާއްޖެ އަށް އަންނަ އަދަދު އިތުރު ކުރުމަށާއި އެ ގައުމުގެ ވިޔަފާރި އާއި އިންވެސްޓްމެންޓް ރާއްޖޭގައި އިތުރު ކުރުމަށް ޖަޕާނުގެ ޕާލިމެންޓަރީ ވައިސް މިނިސްޓަ ފޯ ފޮރިން އެފެއާޒް އައިވާއޯ ހޯރީ، ރައީސް އަބްދުﷲ ޔާމީންއާ މިއަދު މަޝްވަރާ ކުރައްވައިފި އެވެ.

ރައީސް އޮފީހުން ބުނީ ރައީސް ޔާމީނާއެކު، ޖަޕާނުގެ ވައިސް މިނިސްޓަ ފޯ ފޮރިން އެފެއާޒް ބޭއްވި ބައްދަލު ކުރެއްވުމުގައި، ދުނިޔެ އިން ޓެރަރިޒަމް ނައްތާލުމަށް މަސައްކަތް ކުރުމަށް މަޝްވަރާ ކުރެއްވި ކަމަށެވެ. އަދި މަސްވެރިކަން ތަރައްގީ ކުރުމާއި ތިމާވެށި ރައްކާތެރި ކުރުމުގެ ދާއިރާއިންނާއި ތިމާވެއްޓަށް އަންނަ ބަދަލުތަކަށް އަހުލުވެރިކުރުމުގެ ދާއިރާ އިން ވެސް ދެ ބޭފުޅުން މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.

މީގެ އިތުރުން އުމްރާނީ ތަރައްގީ ހާސިލް ކުރެވޭނެ ދާއިރާތަކުގެ މައްޗަށް ރައީސް ޔާމީނާއި ޖަޕާނުގެ ވައިސް މިނިސްޓަ ފޯ ފޮރިން އެފެއާޒް މަޝްވަރާ ކުރެއްވި ކަމަށް ވެސް ރައީސް އޮފީހުން ބުންޏެވެ. އަދި ބައިނަލްއަގްވާމީ މައިދާނުގައި އެއް ގައުމުން އަނެއް ގައުމަށް އެއްބާރުލުން ލިބޭނެ ކަމަށް އުންމީދު ކުރައްވާ ކަމަށް ރައީސް ވިދާޅުވި އެވެ.

ރައީސް ޔާމީން ވަނީ ރާއްޖެ ހާސިލް ކުރަމުން އަންނަ އިޖްތިމާއީ އަދި އިގްތިސާދީ ކުރިއެރުމާއި ތަރައްގީ އަށް ޖަޕާނުން ދޭ އަހައްމިއްޔަތަށާއި އެއްބާރުލުމަށް ޝުކުރު އަދާ ކުރައްވައިފަ އެވެ. އަދި ދެ ގައުއުމުގެ ދެމެދު އޮތް ސިޔާސީ ގުޅުމަށް 50 އަހަރު ފުރުމާ ގުޅިގެން، ޖަޕާނުގެ ސަރުކާރަށާއި އެ ގައުމުގެ ރައްޔިތުންނަށް ރައީސް ވަނީ މަރުހަބާ ދަންނަވައިފަ އެވެ.

ރައީސް އޮފީހުން ބުނި ގޮތުގައި ޖަޕާނުގެ ވައިސް މިނިސްޓަރު ވަނީ އެ ގައުމުގެ ބޮޑުވަޒީރު ޝިންޒޯ އަބޭގެ ތަހުނިއްޔާ އާއި ހެޔޮއެދުންތައް ރައީސް ޔާމީނަށް ރައްދުކޮށް ދެއްވައިފަ އެވެ. އަދި އެމަނިކުފާނަށް ރާއްޖެ ވަޑައިގެންނެވުމަށް ފުރުސަތު ލިބިވަޑައި ގެންނެވީތީ އެކަމާ ފަހުރުވެރިވާ ކަމުގައި ވިދާޅުވި އެވެ.