ގެއްލުނު މަސްވެރިން ހޯދަން އިންޑިއާ ސިފައިން ރާއްޖޭގެ ސަރަހައްދުގައި

އިންޑިއާ އާއި ސްރީ ލަންކާ އަށް އެރި ތޫފާން "އޮކްޝީ" ގައި ގެއްލުނު އިންޑިއާގެ މަސްވެރިންނާއި މަސްބޯޓުތައް ހޯދުމަށް، އިންޑިއާ ކަނޑުގެ ސިފައިން ރާއްޖެ ސަރަހައްދުގައި ހަރަކާތްތެރިވާން ފަށައިފި އެވެ.

އެމްއެންޑީއެފުން މިއަދު ބުނީ އިންޑިއާ އާއި ލަންކާގެ 67 މަސް ބޯޓެއް، މި ސަރަހައްދަށް އައި ބާރުގަދަ ތޫފާންގައި ގެއްލިފައިވާއިރު، އެ އުޅަނދުތަކާއި މީހުން ހޯދުމަށް، އިންޑިއާގެ އެއާފޯސްގެ މަތިންދާބޯޓަކާއި ކަނޑުގެ އުޅަނދެއް، ރާއްޖޭގެ އުތުރުގައި ހަރަކާތްތެރިވަމުން އަންނަ ކަމަށެވެ. އަދި ރާއްޖެގެ ކޯސްޓްގާޑުން ވެސް އެ މީހުންނާ ގުޅިގެން މަސައްކަތް ކުރަމުން އަންނަ ކަމަށް އެމްއެންޑީއެފުން ބުންޏެވެ.

އިންޑިއާގެ އެއާފޯސްގެ މަތިންދާބޯޓު، ރާއްޖޭގެ އުތުރުގެ ރަށްތައް ކައިރިން ވަރަށް ތިރިން އުދުހެނިކޮށް ނަގާފައިވާ ފޮޓޯތަކެއް މިއަދު ސޯޝަލް މީޑިއާގައި ދައުރުވެފައި ވެ އެވެ.

"އޮކްޝީ" ތޫފާންގައި ގެއްލުނު ލަންކާގެ މަސްވެރިން ސަލާމަތް ކުރުމަށް އެ ގައުމުގެ ސިފައިން ވެސް އަންނަނީ ހަރަކާތްތެރިވަމުންނެވެ.

ތޫފާން "އޮކްޝީ" ގައި އިންޑިއާގެ ޓެމިލްނާޑޫ އާއި ލަންކާގެ ބައެއް ހިސާބުތަކަށް ބޮޑެތި ގެއްލުންތައްވެ، ބައެއް މީހުން މަރުވެފައި ވެ އެވެ. އަދި ކެރެލާ އާއި މަލިކު ހިމެނޭ ސަރަހައްދުން ހާލުގައި ޖެހުނު 531 މަސްވެރިން ސަލާމަތްކޮށްފައިވާ ކަމަށް ކެރެލާގެ ކަމާ ބެހޭ އިދާރާތްތަކުން ބުނެފައި ވެ އެވެ.

މި ތޫފާނުގެ އަސަރު ރާއްޖެއަށް ވެސް ކުރި އެވެ. އެގޮތުން ރާއްޖެއަށް ގަދައަށް ވިއްސާރަކޮށް 57 ރަށަކަށް ވަނީ ގެއްލުން ލިބިފަ އެވެ.