ސުނާމީ ކާރިސާގައި ދައްކައިދިން އެއްބައިވަންތަކަމުން އިބުރަތް ހާސިލް ކުރަން ޖެހޭ: ރައީސް

ރާއްޖެ ސުންނާފަތިކޮށްލި ސުނާމީ ކާރިސާގައި ދިވެހި ރައްޔިތުން ދައްކައިދިން އެއްބައިވަންތަކަމުގެ ވަރުގަދަ ގުޅުމުން މިއަދު ވެސް އިބުރަތް ހާސިލް ކުރަން ޖެހޭ ކަމަށް ރައީސް އަބްދުﷲ ޔާމީން މިއަދު ވިދާޅުވެއްޖެ އެވެ.

ސުނާމީއަށް 13 އަހަރު ފުރުމާ ގުޅިގެން ރައީސް ދެއްވި ހިތާބުގައި ވިދާޅުވީ ދިވެހިންގެ މެދުގައި އެކުވެރިކަމާއި އެއްބަނޑު އެއްބަފާކަމުގެ މަތިވެރި ގުޅުން އިތުރަށް ހަރުދަނާކޮށް، ގައުމީ މަސްލަހަތު އިސްކުރުމަކީ މި ފަދަ ކާރިސާތަކުން ދަސްކުރަންވީ ފިލާވަޅެއް ކަމަށެވެ. އަދި މިއަދު ވެސް ގައުމީ ރޫހާއި އެކުވެރިކަން ކުރިއަށް ނެރުމަކީ ކޮންމެ މީހެއްގެ ވެސް ވާޖިބެއް ކަމަށް ދުށުމަށް އެމަނިކުފާނު ގޮވާލެއްވި އެވެ.

ރައީސް ވިދާޅުވި ގޮތުގައި ތަރައްގީއަށް ކުރާ ކޮންމެ މަސައްކަތަކީ ރައްޔިތުންގެ ލާބަޔާއި މަންފާއަށް ކުރެވޭ މަސައްކަތެއް ކަމަށް ބަލައިގަންނަން ޖެހެ އެވެ.

ހިތާބުގައި ރައީސް ޔާމީން ވިދާޅުވީ ސުނާމީ ކާރިސާ ދިވެހިންގެ ހިތްތަކުން ދުވަހަކު ވެސް ފިލައިގެން ނުދާނެ ކަމަށެވެ. އަދި އެއީ އެތައް ބައެއްގެ ފުރާނަ ގެއްލި ކުޑަ ހިނދުކޮޅެއްގެ ތެރޭގައި މުޅި ގައުމު ބޮޑެތި ނުރައްކާތަކަކާ ކުރިމަތިލާން ޖެހުނު ހާދިސާއެއް ކަމަށް ވެސް ވިދާޅުވި އެވެ.

"އަދި އެއީ އިޖްތިމާއީ ގޮތުންނާއި އިގްތިސޯދީ ގޮތުން ވެސް ބޮޑެތި ގެއްލުންތަކެއް ލިބިގެންދިޔަ ކާރިސާ އެވެ. އެ ގެއްލުންތަކުން އަރައިގަތުމަށް ރައްޔިތުން އެކީގައި ކުރި މަސައްކަތްތައް މިއަދު ވެސް އަޅުގަނޑުމެން ހަނދާންކުރަން ޖެހެ އެވެ،" ހިތާބުގައި އެމަނިކުފާނު ވިދާޅުވި އެވެ.

މީގެ 13 އަހަރު ކުރިން 2004 ގައި، އިންޑޮނޭޝިޔާގެ އައްސޭރިފަށަށް އައި ބިންހެލުމެއްގެ ސަބަބުން ކުރިމަތިވި ސުނާމީގައި ރާއްޖޭން 82 މީހުން މަރުވެ 26 މީހުން ވަނީ ގެއްލިފަ އެވެ. އަދި ގިނަ ރަށްތަކަކަށް ބޮޑެތި ގެއްލުންތައް ވެ، ބައެއް ރަށްރަށުން މީހުން ފައިބާފައި ވެސް ވެ އެވެ.