ޖަޕާނާއި ރާއްޖެއާ ދެމެދު ގުޅުން ބަދަހިކުރަން މަޝްވަރާ ކޮށްފި

ޖަޕާނުގެ ފޮރިން މިނިސްޓަރު ޓާރޯ ކޯނޯ މިހާރު ރާއްޖެ އަށް ކުރައްވަމުން ގެންދަވާ ދަތުރުފުޅުގައި ދެ ގައުމުގެ ދެމެދުގައި ރަސްމީ މަޝްވަރާތައް މިއަދު ބާއްވައިފި އެވެ.

ފޮރިން މިނިސްޓްރީގައި މިއަދު ހެނދުނު ބޭއްވި ރަސްމީ މަޝްވަރާތަކުގައި ރާއްޖޭގެ ވަފުދުގައި އިސްކޮށް ހުންނެވީ ފޮރިން މިނިސްޓަރު ޑރ. މުހައްމަދު އާސިމެވެ. ޖަޕާނުގެ ވަފުދުގައި އިސްކޮށް ހުންނެވީ މިނިސްޓަރު ޓާރޯ އެވެ.

މަޝްވަރާތަކުގައި ދެ ގައުމުން އެއްބަސްވީ ދެ ގައުމުގެ ގުޅުން އިތުރަށް ބަދަހި ކުރުމުގެ ގޮތުން ދެ ގައުމުގެ ދެމެދުގައި އެކި ދާއިރާތައް ހިމެނޭ ގޮތުން އިތުރު މަޝްވަރާތައް ބޭއްވުމަށެވެ. ކޮންމެ އަހަރަކު ކުރިއަށް ގެންދަން ނިންމި އެ މަޝްވަރާތަކުގައި ސިޔާސީ އަދި އިގްތިސާދީ ގޮތުންނާއި ސަރަހައްދީ އަދި ބައިނަލްއަގްވާމީ ގޮތުން ހުރި މައްސަލަތަކާ ބެހޭ ގޮތުން މަޝްވަރާ ކުރަން ދެ ގައުމުން ވަނީ ނިންމައިފަ އެވެ.

މީގެ އިތުރުން މިއަދުގެ ބައްދަލުވުމުގައި ދެ ގައުމުން ވަނީ ސަރަހައްދީ ގޮތުންނާއި ބައިނަލްއަގްވާމީ ގޮތުން މިހާރު ހުރި ބައެއް މައްސަލަތަކާ ބެހޭ ގޮތުން ވެސް މަޝްވަރާ ކޮށްފަ އެވެ. އޭގެ ތެރޭގައި މޫސުމަށް އަންނަ ބަދަލުތަކާއި ޓެރަރިޒަމްގެ ނުރައްކަލާއި ކޮރެއާ ސަރަހައްދުގައި އުފެދިފައިވާ ނުތަނަވަސްކަމާ ބެހޭ މައްސަލަ ވެސް ހިމެނެ އެވެ.

ޖަޕާނަކީ އެތައް ގޮތަކުން ރާއްޖެ އަށް އެހީ ދެމުން އަންނަ ގައުމެއް ކަން ފާހަގަ ކުރައްވައި، ފޮރިން މިނިސްޓަރު އާސިމް އެ ބައްދަލުވުމުގައި ވިދާޅުވީ އެއިން ކޮންމެ އެހީއަކުން ވެސް ހާސިލް ކުރަން ބޭނުންވި ނަތީޖާ ހާސިލްވެ، އޭގެ ފައިދާ ރައްޔިތުންނަށް ލިބެމުން އަންނަ ކަމަށެވެ. އަދި އިގްތިސާދީ އަދި އިޖްތިމާއީ ރޮނގުން ޖަޕާނުން ގައުމުތަކަށް ދެމުންދާ އެހީތަކަކީ ރާއްޖެ ފަދަ ކުޑަ ގައުމަށް ބޭނުންތެރި އެހީތަކެއް ކަން މިނިސްޓަރު އާސިމް ފާހަގަ ކުރެއްވި އެވެ.

ޓާރޯގެ މި ދަތުރުފުޅަކީ ޖަޕާނުގެ ފޮރިން މިނިސްޓަރަކު ރާއްޖެ އަށް ކުރައްވާ ފުރަތަމަ ރަސްމީ ދަތުރުފުޅެކެވެ. އެއް ދުވަހުގެ މި ދަތުރުފުޅުގައި ރައީސް އަބްދުﷲ ޔާމީނާ ވެސް ޓާރޯ ބައްދަލު ކުރަން ވަނީ ހަމަޖެހިފަ އެވެ.