އެމްޕީއެލްގެ ތިން ޓަވަރުގެ އަގު 500 މިލިއަނަށް ވުރެ މަތީގައި، އަމަލީ މަސައްކަތް ފަށައިފި

ބޯހިޔާވަހިކަން ފޯރުކޮށްދިނުމަށް ސަރުކާރުން ހިންގާ "ހިޔާ" ޕްރޮގްރާމްގެ ދަށުން އެމްޕީއެލް އިން ހުޅުމާލޭގައި 14 ބުރީގެ ރެޒިޑެންޝަލް ތިން ޓަވަރު އިމާރާތްކުރަން ސިންގަޕޫރުގެ ކުންފުންޏާ ހަވާލުކުރީ 500 މިލިއަން ރުފިޔާއަށް ވުރެ ބޮޑު އަގެއްގައި ކަމަށް އެ ކުންފުނިން މިއަދު ބުނެފި އެވެ.

ސިންގަޕޫރު ކުންފުންޏެއް ކަމަށްވާ ޑަބްލިއު އެންޑް އޭ އޯވަސީސްއާ ހަވާލުކޮށްފައިވާ މި ޓަވަރުތައް އިމާރާތް ކުރުމުގެ އަމަލީ މަސައްކަތް ފެށުމަށް ހުޅުމާލޭގެ ދެވަނަ ފިޔަވަހީގައި ބޭއްވި ރަސްމިއްޔާތަށް ފަހު، އެމްޕީއެލްގެ ބިޒްނަސް ޑިވެލޮޕްމަންޓް އަބްދުﷲ ފާއިޒް "މިހާރު" އަށް ވިދާޅުވީ މަސައްކަތުގެ އަގު 500 މިލިއަން ރުފިޔާ އަށް ވުރެ މަތިވާނެ ކަމަށެވެ.

އޭނާ ވިދާޅުވި ގޮތުގައި އެމްޕީއެލްގެ ޓަވަރުތަކުގެ މަސައްކަތް ކުރާ ޑަބްލިއު އެންޑް އޭ އޯވަސީސްއަކީ، ސިންގަޕޫރުގައި ރަޖިސްޓަރީ ކޮށްފައިވާ އަދި އެ ގައުމުގެ ސްޓޮކް އެކްސްޗޭންޖްގައި ހިމެނޭ ކުންފުންޏެވެ.

"މި ކޮންޕެނީގެ ޕްރޮޖެކްޓެއް މިހާރު ވެސް ރާއްޖޭގައި އެބަ ހިނގާ. އަދި މި ރީޖަންގައި ވެސް އެބަދޭ. މި ކޮމްޕެނީ ހޮވީ ތަޖުރިބާ އާއި މިހާރު މި ބޭފުޅުން ބޭނުން ކުރަމުންދާ ޓެކްނޮލޮޖީގެ އިތުރުން އެ ބޭފުޅުން މިވަގުތު މި ސްކޭލްގައި އިތުރު ކިތައް ޕްރޮޖެކްޓްތޯ ހިންގާތޯ [ބެލުމަށް ފަހު]. އެ ބޭސިސް އަށް ބަލާފައި އެބޭފުޅުންނަށް މި ޕްރޮޖެކްޓް ދިނީ،" ފާއިޒް ވިދާޅުވި އެވެ.

އޭނާ ވިދާޅުވީ ޑަބްލިއު އެންޑް އޭ އޯވަސީސް އަށް މަސައްކަތް ހަވާލުކުރީ މާލިއްޔަތު ގާނޫނާ އެއްގޮތަށް އިއުލާން ކުރުމަށް ފަހު، ޝައުގުވެރިކަން ފާޅުކުރި ކުންފުނިތަކުގެ ތެރެއިން ކަމަށެވެ. އަދި މި އަގުގެ ތެރޭގައި އިމާރާތް ކުރުމުގެ އިތުރުން ޑިޒައިން ފަދަ މަސައްކަތްތައް ވެސް ހިމެނޭނެ ކަމަށް ވިދާޅުވި އެވެ.

"މިހާރު ޑިޒަައިނިންގެ ކޮންސެޕްޝަލް ކޮންޕޯނެންޓް ނިމި، އެޗްޑީސީ އަށް ސަބްމިޓް ކުރެވި އެއަށް އެޕްރޫވަލް ލިބިފައި ވަނީ. ދެން މިހާރު އަޅުގަނޑުމެން މަސައްކަތް ކުރަމުން މިދަނީ ޑީޓެއިލް ޑިޒައިން އަށް. ޑީޓެއިލް ޑިޒައިން ވެސް މި ހަފްތާގައި އެޗްޑީސީ އަށް ސަބްމިޓް ކުރެވި، ފާސްވުމުން ދެން މަސައްކަތް ފެށުނީ. މިހާރު އެޗްޑީސީން އެޕްރޫވަލް ދީފައި މިއޮތީ ގްރައުންޑް ވޯކްސްތައް ކުރިއަށް ގެންދަން،" ފާއިޒް ވިދާޅުވި އެވެ.

އެމްޕީއެލްގެ ޓަވަރުތައް އިމާރާތް ކުރުމުގެ އަމަލީ މަސައްކަތްތައް ފެށުމަށް މިއަދު ބޭއްވި ރަސްމިއްޔާތުގައި އެ ކުންފުނީގެ ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވީ، އެއްބަސްވުމުގައިވާ ގޮތުން މަސައްކަތް ފެށުމާ އެކު ފުރަތަމަ ފިޔަވަހީގެ މަސައްކަތްތައް އަށް މަސް ދުވަހުގެ ތެރޭގައި ނިންމަން ޖެހޭނެ އެވެ. އަދި ފުރަތަމަ ފިޔަވަހީގައި ހިމެނެނީ ތިން ޓަވަރުގެ ފުުރަތަމަ ހަތަރު ބުރީގެ މަސައްކަތްތައް ނިންމުން ކަމަށް ވެސް ވިދާޅުވި އެވެ. ހަލީމް ވިދާޅުވީ ހުރިހާ މަސައްކަތްތަކެއް ނިންމާލެވޭނީ އަންނަ އަހަރަށް ކަމަށެވެ.

ވިޔަފާރީގެ ބޭނުންތަކަށް، ގްރައުންޑް ފްލޯ ބޭނުން ކުރެވޭ ގޮތަށް ހަދާ ތިން ޓަވަރުގައި ހުންނާނީ 536 އެޕާޓްމަންޓް ކަމަށް ވެސް އޭނާ ވިދާޅުވި އެވެ. އޭގެ ތެރޭފައި ހިމެނެނީ ތިން ކޮޓަރީގެ 330 އެޕާޓްމަންޓާއި އެއް ކޮޓަރީގެ 206 ސްޓޫޑިއޯ އެޕާޓްމަންޓެވެ.

ހަލީމް ވިދާޅުވި ގޮތުގައި ވީހާ ވެސް ހެޔޮ އަގެއްގައި، ލުއި ގޮތަކަށް އެޕާޓްމަންޓްތަކުގެ އަގު ދެއްކޭނެ މަގު ފަހިކޮށްދިނުމަށް އެކަމާ ގުޅުން ހުރި މަސައްކަތްތައް ވެސް އެމްޕީއެލް އިން އަންނަނީ ކުރަމުންނެވެ. އަދި މިފަދަ ތަރައްގީގެ މަސައްކަތްތައް ކުރިއަށް ގެންގޮސް ނިންމައިލުމަށް، މުވައްޒަފުންނާއި އެމީހުންގެ އާއިލާތަކުން ސަރުކާރަށް އެއްބާރުލުންދީ ދެވަނަ ދައުރަކަށް ރައީސް އަބްދުﷲ ޔާމިން ހޮވައި ދިނުމަށް މަސައްކަތް ކުރުމަށް ވެސް ހަލީމް އެދިވަޑައިގަތެވެ.

ޑަބްލިއު އެންޑް އޭ އޯވަސީސްގެ ޗެއާމަން ރޭމަން ވިދާޅުވީ މި ޕްރޮޖެކްޓްގެ މަސައްކަތްތައް ކަނޑައެޅިފައިވާ މުއްދަތުގައި ނިންމާނެ ކަމަށެވެ. އަދި އިމާރާތްތައް ހަދާނީ އެމްޕީއެލްއިން ގަބޫލުކުރާ ފެންވަރުގައި، ކޮލެޓީ އަށް ވަރަށް ބޮޑަށް އިސްކަން ދީގެން ކަމަށް އޭނާ ވިދާޅުވި އެވެ.

އެމްޕީއެލްގެ ގިނަ އަދަދެއްގެ މުވައްޒަފުން ބައިވެރިވި ޖަލްސާގައި އިކޮނޮމިކް މިނިސްޓަރު މުހައްމަދު ސައީދު އާއި އެންވަޔަރުމެންޓް މިނިސްޓަރު ތޯރިގު އިބްރާހިމް ވެސް ބައިވެރިވި އެވެ. އަދި ޑަބްލިއު އެންޑް އޭ އޯވަސީސްގެ އިސް ބޭފުޅުން ވެސް ބައިވެރިވި އެވެ.