މާރާމާރީއާ ގުޅިގެން ސްކޫލްތައް ހިމެނޭ ސަރަހައްދަށް އިތުރު ފުލުހުން ނެރެފި

މާރާމާރީ ހިންގައި ދެ ދަރިވަރަކު ޒަހަމްކޮށްލުމާ ގުޅިގެން، ސްކޫލްތައް ހިމެނޭ ސަރަހައްދަށް އިތުރު ފުލުހުން ނެރެ ސަލާމަތީ ކަންކަން ވަރުގަދަކުރަން ފަށައިފި އެވެ.

ތާޖުއްދީން ސްކޫލުގެ ދަރިވަރަކާއި އެހެން ފިރިހެނަކު އެ ސްކޫލުގެ ތެރެއަށް ވަދެ، ގްރޭޑް 10 ގައި ކިޔަވަމުންދާ ކުއްޖެއްގެ ބޮލަށް އިއްޔެ ވަނީ ކަތުރެއް ހަރައި ޒަހަމްކޮށްލައިފަ އެވެ. އަދި މިއަދު ދަރުމަވަންތަ ސްކޫލްގެ ދަރިވަރަކު ގެއަށް ދިޔަ މަގުމަތީގައި ގްރޫޕަކުން ވަނީ އޭނާގެ އަރިކައްޓަށް ވަޅި ހަރައި ޒަހަމްކޮށްލައިފަ އެވެ. އެ ކުއްޖާ އަށް އައިޖީއެމްއެޗުގައި އަންނަނީ ފަރުވާދެމުންނެވެ.

ސްކޫލްތައް ކައިރީގައި ތިބޭ ފުލުހުންގެ އަދަދު މިއަދު އިތުރުކޮށްފައި ވަނީ މާރާމާރީތަކާ ގުޅިގެން ފާޑުކިއުން އަމާޒުވެ ބެލެނިވެރިން ކަންބޮޑުވުންފާޅުކުރަމުން އަންނަނިކޮށެވެ. ސްކޫލްތަކުގެ ސެޝަންތައް ފަށާއިރު ކުރިން، އާއްމުކޮށް ތިބެނީ ޓްރެފިކް ޕޮލިހުންގެ ދެ މީހެކެވެ.

ސީއެޗްއެސްއީ އާއި އިސްކަންދަރާއި އަމީނިއްޔާގެ އިތުރުން އަރަބިއްޔާ ސްކޫލުގެ ދަރިވަރުން މިއަދު ނިމުނު ގަޑީގައި އެ ސަރަހައްދު އޮތީ ދުއްވާ އެއްޗިއްސަށް ނުވަދެވޭ ގޮތަށް ބަންދުކޮށްފަ އެވެ. އެ ސަރަހައްދުގައި ސަލާމަތީ ކަންކަން ބެލެހެއްޓުމަށް ގިނަ އަދަދެއްގެ ފުލުހުން ތިއްބެވެ.

ފުލުހުންގެ ތަރުޖަމާން އަހްމަދު ޝިފާން ވިދާޅުވީ ސްކޫލްތައް ހިމެނޭ ސަރަހައްދުގެ ސަލާމަތީ ކަންކަން ވަރުގަދަކުރަން އިތުރު މަސައްކަތްތަކެއް ކުރަމުން އަންނަ ކަމަށެވެ. އޭގެ ތަފްސީލު މާދަމާ ހާމަކުރައްވާނެ ކަމަށް ވިދާޅުވި އެވެ.

މީގެކުރިން ވެސް ސްކޫލްތަކުގެ ސެޝަންތައް ފަށާއިރާއި ނިމޭއިރު ފުލުހުން ހަރަކާތްތެރިވަމުން އަންނަކަން ޝިފާން ފާހަގަކުރެއްވި އެވެ.

ދެ ދަރިވަރަކަށް ހަމަލާ ދިން ސަބަބެއް އަދި ސާފެއް ނުވެ އެވެ. ތާޖުއްދީން ސްކޫލު ތެރެއަށް ވަދެ ހިންގި މާރާމާރީއާ ގުޅިގެން ފުލުހުން ވަނީ ބަޔަކު ހައްޔަރުކޮށްފަ އެވެ.

މި މާރާމާރީތަކާ ގުޅިގެން ދަރިވަރުންގެ ރައްކާތެރިކަމަށް އިތުރު ފިޔަވަޅުތަކެއް އަޅުމަށް މަޝްވަރާކުރަމުން ކަމަށް އެޑިއުކޭޝަން މިނިސްޓްރީން ވެސް ވަނީ ބުނެފަ އެވެ.