ދިރާސީ އާ އަހަރުގެ ކިޔެވުން ފަށައިފި

ދިރާސީ އާ އަހަރުގެ ކިޔެވުން 90،000 އެއްހާ ކުދިންނާ އެކު މިއަދު ފަށައިފި އެވެ.

ސްކޫލްތަކުގެ ކުދިންނާއި ޓީޗަރުން މިދިޔަ ދިރާސީ އަހަރު ނިންމުމަށް ފަހު، ބޮޑު ޗުއްޓީ އަށް ދިޔައީ މި އަހަރުގެ ފެބްރުއަރީ 27 ގަ އެވެ. ގާތްގަނޑަކަށް 40 ދުވަހުގެ ޗުއްޓީއަކަށް ފަހު 216 ސްކޫލެއްގައި މިއަދު ވަނީ ކިޔަވައިދޭން ފަށައިފަ އެވެ.

އެޑިއުކޭޝަން މިނިސްޓްރީން މިއަދު ބުނީ ޕްރީ-ސްކޫލުން ފެށިގެން ގްރޭޑު 12 އާ ހަމައަށް 90،000 އެއްހާ ކުދިން ކިޔަވާނެ ކަމަށެވެ. އެ ކުދިންނަށް ކިޔަވައިދިނުމަށް 11،000 އެއްހާ ޓީޗަރުން މަސައްކަތްކުރާނެ ކަމަށް ބުންޏެވެ.

އެކަޑެމިކް ކަލަންޑަރުގައިވާ ގޮތުން މި އަހަރުގެ ފުރަތަމަ ޓާމުގެ ޗުއްޓީ ފަށާނީ ޖުލައި 24 ގަ އެވެ. ދެ ހަފުތާގެ ޗުއްޓީ އަކަށް ފަހު ދެ ވަނަ ޓާމުގެ ކިޔެވުން ފަށާނީ އޮގަސްޓު 10 ގަ އެވެ. މިއަދު ފެށި ދިރާސީ ދިރާސީ އަހަރު ނިމޭނީ ޑިސެމްބަރު 28 ގަ އެވެ.

ސްކޫލްތަކަށް މި އަހަރުގެ ބޮޑު ޗުއްޓީ ލިބޭނީ ޑިސެމްބަރު 28 އިން ޖެނުއަރީ 27، 2026 އާ ހަމައަށެވެ. ނަމަވެސް އަންނަ އަހަރުގެ ބޮޑު ޗުއްޓީ އެއްކޮށް ޑިސެމްބަރުގައި ލިބޭނެ ކަމަށް މިނިސްޓްރީން ކުރިން ވަނީ ބުނެފަ އެވެ.