އާއިލާއާ ބައްދަލުކުރާ ކޮންމެ ފަހަރަކު ސްކޫޓަރެއް ވަގަށް ނަގާ މީހެއް

އިންޑިއާގެ ބެންގަލޫރުގައި ދިރިއުޅޭ މުރަލީ ރާމްރާއޯ އަކީ ކޫލީއެއްގެ ގޮތުގައި އުޖޫރައަށް ދަތުރުވެރިންގެ ފޮށީތަންމަތި އުފުލާދޭ މީހެކެވެ. އުމުރުން 32 އަހަރުގެ މި މީހާ އަކީ ދެ އާއިލާއެއް ބަލަހައްޓާ މީހަކަށް ވާތީ ކޫލީއެއްގެ މަސައްކަތްކޮށްގެން ލިބޭ އުޖޫރައިން ދެ އާއިލާގެ ޚަރަދުތައް ފޫބެއްދޭގޮތެއް ނުވެ އެވެ.

އެހެންވެ ދެން އޭނާ ކުރަން ފެށި ކަމަކީ މަގުމަތީގައި ޕާކްކޮށްފައި ހުންނަ ސްކޫޓަރު ވަގަށް ނެގުމެވެ. މީނާ ހައްޔަރުކޮށްފައި ވަނީ މި މަހުގެ ފަސް ވަނަ ދުވަހު ސްކޫޓަރެއް ވަގަން ނަގަން އުޅެނިކޮށެވެ.

ފުލުހުން ބުނި ގޮތުގައި މި މީހާ އޭނާގެ ދެ އަނބިން ކުރެ ކޮންމެ އަންބެއް ކައިރިއަށް ވެސް ދަނީ ބަހުގަ އެވެ. އަދި އެނބުރި ދާ މަގުމަތީގައި މަގުމަތިން ސްކޫޓަރެއް ވަގަށް ނަގަ އެވެ. އަނބިން ކައިރިއަށް ދާ ކޮންމެ ފަހަރަކު ކަހަލަ ގޮތަކަށް އޭނާ މިގޮތަށް ސައިކަލު ވަގަށް ނަގާފައިވާ ކަމަށް ވަނީ އެނގިފަ އެވެ. އެގޮތުން މިހާތަނަށް 25 އަށް ވުރެ ގިނަ ސައިކަލު ވަގަށް ނަގާ އެ ރަށުގެ އެކި ސަރަހައްދުތަކަށް ވިއްކާލާފައިވެ އެވެ،

ފުލުހުން ބުނި ގޮތުގައި މުރަލީ އާމްދަނީ ހޯދަން ކުރާ ދެ ވަނަ މަސައްކަތަކަށް ސައިކަލު ވަގަށް ނެގުން ވަނީ ހަދާފަ އެވެ.

ސައިކަލު ވަގަށް ނެގުމުގެ މަސައްކަތް މުރަލީ ކުރަނީ އެކަންޏެވެ. މިހާތަނަށް އޭނާ ވަގަށް ނެގި 25 ސައިކަލު ވިއްކާލައިގެން 15 ލައްކަ ރުޕީސް ހޯދާފައިވާ ކަމަށް ފުލުހުން ބުނެ އެވެ.

ފުލުހުން ބުނީ ސައިކަލު ވަގަށް ނަގާ ކަމަށް މުރަލީ އެއްބަސް ވެފައިވާ ކަމަށާއި އެއީ އޭނާ އެނޫން ގޮތެއް ނެގިގެން ކުރާ ކަމެއް ކަމަށް ބުނެފައިވާ ކަމަށެވެ.

މުރަލީ ފުލުހުން ގާތު ބުނެފައިވާ ގޮތުގައި އޭނާ އުޅެނީ ދެ މީހުންނާ އިނދެގެންނެވެ. އެހެންވެ ދެ އާއިލާ ބެލެހެއްޓުމުގެ ޒިންމާ ހަވާލުވެފައި އޮތަސް އޭނާއަށް ދެ އާއިލާއަށް ޚަރަދު ކުރާ ވަރަށް ފައިސާއެއް ނުލިބެ އެވެ. މުރަލީގެ އަނބިން އޭނާ ގެންގުޅޭ ސައިކަލުތަކާ ބެހޭ ގޮތުން ސުވާލުކުރުމުން ބުނާ ކަމަށް ވަނީ އެއީ އޭނާގެ ރައްޓެހިންގެ އެއްޗެހި ކަމަށެވެ.