ހާރިޖީ ގޮތުން ވެސް ރާއްޖެއަށް ލިބުނީ ނަސްރެއް: ރައީސް

ސުޕްރީމް ކޯޓުން ނެރުނު އަމުރާ ގުޅިގެން އދ. ގައި ރާއްޖެއަށް ކުރިމަތިވި ބޭރުގެ ފިއްތުންތަކުން ވެސް ސަލާމަތްވެފައިވާ ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.

ސުޕްރީމް ކޯޓުގެ އަމުރާ ގުޅިގެން ރާއްޖޭގެ ކުއްލި ހާލަތު އިއުލާންކޮށް، ބައެއް ފަރާތްތައް ހައްޔަރު ކުރުމާ ގުޅިގެން އދ. ގެ ސަލާމަތީ މަޖިލީހުގެ ކުއްލި ބައްދަލުވުމެއް އިއްޔެ ބޭއްވި އެވެ. އެކަމަކު އެ ބައްދަލުވުން ބޭއްވީ ސިއްރުންނެވެ. އެ ބައްދަލުވުމާ ބެހޭ އެއްވެސް ތަފްސީލެއް އދ. އިން އަދި ހާމައެއް ނުކުރެ އެވެ.

ޕީޕީއެމުން މިރޭ ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ ރެއާ ހަމައަށް އދ. ގެ ސަލާމަތީ މަޖިލީހުގައި ގެންދިޔައީ ރާއްޖެއާ މެދު ފިޔަވަޅެއް އެޅުމާ މެދު މަޝްވަރާ ކުރަމުން ކަމަށެވެ. ރާއްޖޭގެ މައްސަލަ އޮތީ ރަސްމީ އެޖެންޑާގައި ހިމަނާ ހިސާބެއްގައި ކަމަށާއި އެކަމުގައި ވެސް ލިބުނީ ރާއްޖެއަށް ލިބުނީ ނަސްރެއް ކަމަށް ރައީސް ވިދާޅުވި އެވެ.

"އެހެން ނަމަވެސް އަނެއްކާވެސް އަޅުގަނޑުމެންގެ އީމާންކަމާއި އަޅުގަނޑުމެން ތިބީ ތެދުމަގުގައި ކަމަށްވާތީ އެކަން ވެސް ހާސިލް ނުވެ ދިޔައީ. އެކަމުން ވެސް، ޚާރިޖީ ސިޔާސަތުން ވެސް އަޅުގަނޑުމެންނަށް ލިބުނީ ނަސްރު،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި މިދަނޑިވަޅުގައި ރާއްޖެއަށް އެންމެ ބޮޑު އެހީއެއް ދިނީ ޗައިނާ އާއި ރަޝިއާގެ އިތުރުން ސައުދީ އަރަބިއާ އެވެ. ޗައިނާ އާއި ރަޝިއާ އަކީ އދ. ގެ ސަލާމަތީ މަޖިލީހުގެ ދާއިމީ މެމްބަރު ދެ ގައުމެވެ. ސަލާމަތީ މަޖިލީހަށް ހުށަހެޅޭ ކޮންމެ ގަރާރެއް ވީޓޯކޮށް، ބޭރުކޮށްލުމުގެ ބާރު އެ ދެ ގައުމަށް އޮވެ އެވެ.

ކުއްލި ހާލަތު އުވާލަން އދ. އާއި ބައެއް ގައުމުތަކުން ކުރިން ވަނީ ގޮވާލައިފަ އެވެ. އަދި އީޔޫގެ ވަފުދެއް އިއްޔެ ވަނީ ރާއްޖެ އައިސް، އިދިކޮޅު ފަރާތްތަކާ ބައްދަލުކޮށްފަ އެވެ. އެހެން ނަމަވެސް އެއްވެސް ގައުމަކުން ރާއްޖެއާ ދެކޮޅަށް ފިޔަވަޅެއް ނާޅަ އެވެ.