ޓީބީ ނައްތާލުމުގެ ގައުމީ ކެމްޕެއިން ރައީސް ޔާމީން ފައްޓަވައި ދެއްވައިފި

ރާއްޖެ އިން ޓީބީ ނައްތާލުމުގެ ގައުމީ ކެމްޕެއިނެއް ރައީސް އަބްދުﷲ ޔާމީން މިއަދު އިފުތިތާހު ކޮށްދެއްވައިފި އެވެ.

ހޮޓެލް ޖެންގައި ބޭއްވި ރަސްމިއްޔާތެއްގައި އިފުތިތާހު ކުރި މި ކެމްޕެއިންގެ އަމާޒަކީ 2022 ވަނަ އަހަރު އަންނަންވާއިރަށް ރާއްޖެ އިން ޓީބީ ނައްތާލުމެވެ. އަދި އެކަމަށް 170 މިލިއަން ރުފިޔާ ޚަރަދުވާނެ ކަމަށް ސަރުކާރުން ބުނެ އެވެ.

މި ކެމްޕެއިންގައި، ޓީބީ ޖެހިފައިވާ މީހުންނަށް ޚާއްސަ ސަމާލުކަމެއް ދީގެން ފަރުވާ ދިނުމާއި ސްކްރީން ކުރުން ހިމެނެ އެވެ. އަދި އާންމުން ހޭލުންތެރި ކުރުމަށާއި ރާއްޖެ އިން ބޭރުން އަންނަ މީހުން ކެއްސުން ބައްޔަށް ސްކްރީން ކޮށް އެ މީހުންގެ ފަރާތުން ބަލި ފެތުރުނަ ނުދިނުމަށް އަޅަން ޖެހޭ ފިޔަވަޅުތައް އެޅުން ވެސް ހިމެނެ އެވެ. ޓީބީ ޖެހޭ މީހުންގެ ނިސްބަތް 50 ޕަސެންޓަށް ދަށް ކުރުމާއި އެ ބަލީގައި މަރުވާ މީހުންގެ ނިސްބަތް 70 ޕަސެންޓަށް ދަށް ކުރުމަކީ ވެސް ކެޕްއިންގެ މަގުސަދެކެވެ.

ޓީބީ އަކީ ޖަރާސީމެއްގެ ސަބަބުން ފެތުރޭ، ގައިންގަޔަށް އަރާ ބައްޔެކެވެ. އާންމު ގޮތެއްގައި ޓީބީ ޖެހެނީ ފުއްޕާމެއަށް ކަމަށް ވިޔަސް ހަށިގަނޑުގެ އެހެން ބައިތަކަށް ވެސް ޓީބީ ޖެހެ އެވެ.

ރަޝިއާގެ މޮސްކޯގައި ހެލްތް މިނިސްޓަރުންނަށް ޚާއްސަ ކޮށްގެން މިދިޔަ އަހަރު ބޭއްވި ކޮންފަރެންސެއް އިފުތިތާހް ކޮށްދެއްވުމަށް ވަޑައިގެން އެ ގައުމުގެ ރައީސް ލަޑިމިއާ ޕުޓިން ވަނީ ޓީބީ ނައްތާލުމުގެ މަސައްކަތުގައި ގައުމުތަކުގެ ވެރިން އެއްބާރުލުން ދެއްވުމަށް ގޮވާލައްވައިފަ އެވެ.

މިއަދުގެ ރަސްމިއްޔާތުގައި ވާހަކަ ދައްކަވަމުން ހެލްތް މިނިސްޓަރު އަބްދުﷲ ނާޒިމް އިބްރާހީމް ވިދާޅުވީ، ރާއްޖެ އިން ޓީބީ ނައްތާލުމަށް އެންމެ ބޮޑު އިސްކަމެއް ދެއްވައިގެން އެކަން ފެއްޓެވީ ރައީސް ޔާމީން ކަމަށް ވުމަކީ ދިވެހިން ފަޚުރުވެރިވާ ކަމެއް ކަމަށެވެ. އަދި މިއީ ބުރަ ނަމަވެސް މުހިންމު މަސައްކަތެއް ކަމަށް މިނިސްޓަރު ވިދާޅުވި އެވެ.

ރާއްޖޭގައި ހުންނަވާ ޑަބްލިއުއެޗްއޯގެ މަންދޫބް ޑރ، އަރްވިންދް މާތުރް ވިދާޅުވީ، ޓީބީ އަކީ ދުނިޔޭގައި އެންމެ ބޮޑަށް ފެތުރެމުންދާ ނުރައްކާތެރި ބައްޔަކަށް ވުމާއި އެ ބަލި ރާއްޖޭގައި އޮތް މިންވަރާ އަޅާ ބަލާއިރު، އެ ބަލި ރާއްޖެ އިން ނައްތާލުމަކީ ގިނަގުނަ މަސައްކަތްތަކެއް ކުރަން ޖެހޭ ކަމެއް ކަމަށެވެ.

ރާއްޖެ އިން 2015 ވަނަ އަހަރު މެލޭރިއާ ނައްތާލާފައިވާއިރު، 2016 ވަނަ އަހަރު ވަނީ ފައިލޭރިއާ ނައްތާލައިފަ އެވެ. އަދި މިދިޔަ އަހަރު ރާއްޖެ ވަނީ ހިމަބިހި ނައްތާލެވިފައިވާ ގައުމެއްގެ ގޮތުގައި ކަނޑައަޅައިފަ އެވެ.

މިނިސްޓަރު ނާޒިމް ވިދާޅުވި ގޮތުގައި، މި އަހަރުގެ އަމާޒަކީ މައިންގެ ކިބައިން ދަރިންނަށް ޖެހޭ އެޗްއައިވީ ނައްތާލުމެވެ.

"ވޭތުވެދިޔަ ކުރު މުއްދަތެއްގައި މި ދެންނެވި ބަލިތަކެއް ނައްތާލި ނައްތާލުން ކާމިޔާބު ކުރެވުނީ މިއަދުގެ ސަރުކާރުން ހެލްތް ސިސްޓަމަށް ގެނައި ވަރަށް މުހިންމު ގިނަ ބަދަލުތަކުގެ ސަބަބުން،" މިނިސްޓަރު ވިދާޅުވި އެވެ.

ހެލްތް މިނިސްޓްރީން ކުރިން އާންމު ކުރި ތަފާސްހިސާބުތަކުން ދައްކާ ގޮތުގައި 1963 ވަނަ އަހަރުން ފެށިގެން ރާއްޖޭގައި 10،563 މީހުނަށް ޓީބީ ޖެހި ރަސްމީކޮށް ރަޖިސްޓަރީކޮށްފައި ވެއެވެ.