ސުލައިމާނަށް ކޮމިޓީން ދިނީ އެންމެ 75 މާކްސް

އިލެކްޝަންސް ކޮމިޝަން (އީސީ)ގެ ކުރީގެ ރައީސް އަހުމަދު ސުލައިމާން، ނޭޝަނަލް އިންޓެގްރިޓީ ކޮމިޝަން (އެންއައިސީ) ގެ މެމްބަރު ކަމަށް އައްޔަން ކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީން ދިރާސާ ކުރުމަށް ފަހު އެންމެ 75 ޕަސެންޓް ދީގެން އޭނާގެ ނަން ފާސްކޮށްފި އެވެ.

ސުލައިމާންގެ ނަން ދިރާސާ ކުރި މިނިވަން މުއައްސަސާތަކުގެ ކޮމެޓީގެ ރިޕޯޓުގައިވާ ގޮތުން ސުލައިމާނަކީ އެންއައިސީ އަށް އައްޔަން ކުރުމަށް ގާބިލް ފަރާތެއްތޯ ބެލުމަށްޓަކައި ކޮމިޓީގެ މެމްބަރުން މާކްސް ދިނުމުން އޭނާ އަށް ލިބިވަޑައިގަތީ 75.89 ޕަސެންޓެވެ.

އެ ރިޕޯޓްގައިވާ ގޮތުން، އެންއައިސީ އަށް އައްޔަން ކުރުމަށް ގާބިލް ފަރާތެއް ކަމަށް ކަނޑައަޅަނީ ކޮމިޓީން ކަނޑައަޅާފައިވާ މިންގަނޑުން މާކްސް ދިނުމުން އެވްރެޖް 75 ޕަސެންޓް އަށް ވުރެ މަތިން މާކްސް ލިބޭ މީހުންނެވެ.

ސުލައިމާނަށް އެ ވަރަށް މާކްސް ލިބިވަޑައިގަތީ އޭނާގެ ތައުލީމާއި ތަމްރީނާއި މަސައްކަތުގެ ތަޖުރިބާ އާއި ގާބިލުކަމާއި ހުނަރަށް ބެލުމަށް ފަހު މެމްބަރުން މާކްސް ދެއްވައިގެންނެވެ.

އެންއައިސީގެ މެމްބަރު ކަމަށް ކުރިމަތިލުމުގެ ފުރުސަތު ހުޅުވާލުމުން އެކަމަށް އެދި ހަތް މީހަކު ކުރިމަތިލި އެވެ. އެކަމަކު، ރައީސް އަބްދުﷲ ޔާމީން މަޖިލީހަށް ފޮނުއްވީ ސުލައިމާނުގެ ނަން އެކަންޏެވެ.

އެންއައިސީގެ މެމްބަރު ކަމަށް އޭނާ އައްޔަން ކުރާނީ، ކޮމިޓީގެ ނިންމުމުގެ މައްޗަށް ބަލައި މަޖިލީހުގެ ޖަލްސާއެއްގައި ނަގާ ވޯޓުގައި އޭނާ އެ މަގާމަށް އައްޔަން ކުރަން ފާސްވެއްޖެ ނަމަ އެވެ.

ސުލައިމާން އިލެކްޝަންސް ކޮމިޝަނުން އިސްތިއުފާ ދެއްވީ މިދިޔަ މަހުގެ 31 ގަ އެވެ. ނަމަވެސް އިސްތިއުފާ ދެއްވި ސީދާ ސަބަބެއް އޭނާ މިހާތަނަށް މީޑިއާގައި ހާމަ ކުރައްވައިފައެއް ނުވެ އެވެ.

އެންއައިސީގެ މެމްބަރު ކަމަށް ކުރިމަތިލުމުގެ ފުރުސަތު ހުޅުވައިލީ އެ ކޮމިޝަންގެ ރައީސްގެ މަގާމުގައި ހުންނެވި ޔޫސުފް މާނިއު މަގާމުން ވަކި ކުރެއްވުމަށް ފަހު އެވެ.

ފުލުހުންނާއި ކަސްޓަމްސް އަދި އިމިގްރޭޝަން ފަދަ މުއައްސަސާތަކުގެ މައްސަލަތައް ބެލުމަށް އުފައްދާފައިވާ އެންއައިސީގެ ރައީސްކަމުން މާނިއު ވަކިކުރީ އެ ކޮމިޝަންގެ ބައެއް ތަހުގީގުތަކަށް ފުލުހުންގެ ބައެއް އިސް ވެރިން ހުރަސްއަޅާ ކަމަށް ތުހުމަތުކޮށް، އެ ކަމަށް ގާނޫނީ ފިޔަވަޅު އަޅާނެ ކަމުގެ އިންޒާރު އޭނާ ދެއްވާފައި ވަނިކޮށް މިދިޔަ ނޮވެމްބަރު މަހުގެ ތެރޭގަ އެވެ.

މީގެ އިތުރުން އިއްޔެ ބޭއްވި މަޖިލީހުގެ ގައުމީ ސަލާމަތުގެ ކޮމެޓީން ވަނީ ރާއްޖެ އިން ޖަޕާނަށް ކަނޑައަޅާފައި ހުންނަވާ ސަފީރު ކަމަށް އައްޔަން ކުރުމަށްޓަކައި މަޖިލީހުގެ ރުހުން ހޯދުމަށް ރައީސް ޔާމީން ފޮނުއްވި މ. ފޭމަންސް އިބްރާހިމް އުވައިސް އަށް ރުހުން ދޭން ފެންނަ ކަމަށް ފާސްކޮށްފަ އެވެ.

އެންއައިސީއަށް ސުލައިމާނާއި ޖަޕާނު ސަފީރަކަށް އުވައިސް އައްޔަން ކުރުމާ މެދު މަޖިލީހުން ގޮތެއް ނިންމުމަށް މާދަމާގެ ޖަލްސާ އަށް ވަނީ އެޖެންޑާކޮށްފަ އެވެ.