އެއް ތުހުމަތެއް، އެކަމަކު ކުއްލި ނުރައްކަލުގެ "ގޮޅި" އަށް ފައްތަނީ ވަކި ބަޔަކު!

ސަރުކާރާ ދެކޮޅަށް ބާއްވާ ސިލްސިލާ އެއްވުމުގެ ތެރެއިން ހައްޔަރުކުރާ ވަކި ބަޔަކު ކުއްލި ނުރައްކަލުގެ ހާލަތުގެ "ގޮޅި އަށް ފައްތައި" އަނެއް ބަޔަކާ ދޭތެރޭގައި އާއްމު އުސޫލުން އަމަލުކުރަމުންދާ މައްސަލައިގައި ފުލުހުންނަށް ފާޑުކިއުން އަމާޒުވެއްޖެ އެވެ.

ސިޔާސީ ލީޑަރުން ދޫކޮށްލަން ސުޕްރީމް ކޯޓުން މިދިޔަ މަހު ކުރި އަމުރު ތަންފީޒުކުރަން ގޮވާލައި މިދިޔަ ހުކުރު ދުވަހު މާލޭގައި ބޭއްވި އެއްވުމުގެ ތެރެއިން ބައެއް އާއްމުންނާ އެކު ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދާއި ދިއްދޫ ދާއިރާގެ މެމްބަރު އަބްދުއްލަތީފް އަދި ކިނބިދޫ ދާއިރާގެ މެމްބަރު އަބްދުﷲ ރިޔާޒް ހައްޔަރުކުރި އެވެ. ޝާހިދާއި ރިޔާޒު ހައްޔަރުކުރީ ސޯސަންމަގު، އިބްރާހިމް މިސްކިތް ކައިރީގައި ތިއްބަވަނިކޮށެވެ. ލަތީފް ހައްޔަރުކުރީ މާވެޔޮމަގުންނެވެ.

މި ތިން ބޭފުޅުންގެ ތެރެއިން ޝާހިދާއި ލަތީފް ދޫކޮށްލާފައިވާއިރު، ރިޔާޒް އަދިވެސް ހުންނެވީ ހައްޔަރުކޮށްފަ އެވެ. ރިޔާޒުގެ ވަކީލުން ވިދާޅުވި ގޮތުގައި، އޭނާ "ފެއްތީ" ކުއްލި ނުރައްކަލުގެ ހާލަތަށެވެ.

އޭގެ ހަފުތާއެއްހާ ދުވަސް ކުރިން އެމްޑީޕީގެ ހަރުގެ ކުރިމަތީގައި އެއްވުމެއް ކުރިއަށް ދަނިކޮށް، ފުލުހުން އެ ޕާޓީގެ ހަރުގެ ތެރެއަށް ވަދެ ބަޔަކު ހައްޔަރުކުރި އެވެ. އޭގެ ތެރޭގައި އެމްޑީޕީގެ ނައިބު ރައީސް މުހައްމަދު ޝިފާޒް ހިމެނިވަޑައިގަންނަވަ އެވެ. އެ އެއްވުމުގެ ތެރެއިން ވެސް ހައްޔަރުކުރި ޝިފާޒް ނޫން އެންމެން ވަނީ ދޫކޮށްލައިފަ އެވެ. އޭނާ ފެތުނީ ކުއްލި ނުރައްކަލުގެ ހާލަތަށެވެ.

މި މައްސަލާގައި ކަންބޮޑުވުން ފާޅުކުރެއްވި ގާނޫނީ ބައެއް ވަކީލުން ވިދާޅުވީ ކުއްލި ނުރައްކަލުގެ ގޮޅި އަށް ފައްތަނީ ފުލުހުން ބޭނުންވާ ވަކި ބަޔަކު ކަމަށެވެ. މިއީ ކަނޑައެޅިގެން ގާނޫނާ ޚިލާފަށް ފުލުހުން ހިންގާ އަަމަލެއް ކަމަށާއި އިމަޖެންސީއޭ ބުނެ ހިތުހުރި ގޮތަކަށް އަމަލުކުރުމުގެ އިޚްތިޔާރެއް ގާނޫނުތަކުން ފުލުހުންނަށް ލިބިދީފައި ނުވާ ކަމަށް ވަކީލުން ވިދާޅުވި އެވެ.

އެއްވުމުގެ ތެރެއިންނާއި މަގުމަތިން މީހުން ހައްޔަރުކޮށްގެން ގެންދާއިރު، ސަބަބު ނުބުނަނީ ވެސް ކުއްލި ނުރައްކަލުގެ ހާލަތަށް ފައްތަން ކަމަށް ވަކީލުން ތުހުމަތު ކުރައްވަ އެވެ.

ރިޔާޒުގެ ގާނޫނީ ވަކީލް ނޫރުއްސަލާމް މިއަދު ވިދާޅުވީ މިދިޔަ ހުކުރު ދުވަހުގެ އެއްވުމުގެ ތެރެއިން ރިޔާޒްއާ އެކު ހައްޔަރުކުރި އެހެން މީހުން ދޫކޮށްލިއިރު، ރިޔާޒުގެ މައްޗަށް ކުރަނީ ކޮން ތުހުމަތެއް ކަން ފުލުހުން މިހާތަނަށް ނުބުނާ ކަމަށެވެ. އެއީ، އޭނާގެ މައްޗަށް ކުރަނީ ކޮން ތުހުމަތެއް ކަން ފުލުހުން އަދިވެސް ކަނޑަނާޅާތީ ކަމަށް ވަކީލް ވިދާޅުވި އެވެ.

"ހައްޔަރުކުރާއިރު، އެންމެ ކުޑަމިނުން އެ މީހަކަށް ތުހުމަތު ކުރަނީ ކޮން ކަމެއް ކަން ބުނެދޭން ޖެހޭ. އެކަމަކު އެހެނެއް ނޫން ރިޔާޒާ ދޭތެރޭގައި ވެސް އަމަލުކުރަމުން މިދަނީ،" ނޫރުއްސަލާމް ވިދާޅުވި އެވެ.

އޭނާ ވިދާޅުވި ގޮތުގައި ކުއްލި ނުރައްކަލުގެ ހާލަތުގެ ދަށުންނޭ ބުނެ ހައްޔަރުކޮށްފައިވާ އެހެން މީހުންނެކޭ އެއްގޮތަށް ރިޔާޒް ވެސް ހައްޔަރުކޮށްފައި ވަނީ ގާނޫނާ ޚިލާފަށެވެ.

"ކުއްލި ނުރައްކަލުގެ ހާލަތު އިއުލާންކޮށްފައި އޮތް ގޮތަށް ބަލާއިރު ސަރުކާރު ވައްޓާލަން އުޅޭ ކަމަށް ތުހުމަތުކޮށް، އިއުލާންކޮށްފައި އޮތް ހާލަތެއް މިއީ. އެހެންވީމަ ފުރަތަމަ ކަމަކަށް، މިއީ ގާނޫނުއަސާސީއާ ޚިލާފު ހާލަތެއް. އެހެންވީމަ ފުލުހުން މީހުން ހައްޔަރުކުރަމުން މިދަނީ ވެސް ގާނޫނާ ޚިލާފަށް،" އޭނާ ވިދާޅުވި އެވެ.

މިކަމާ ގުޅޭ ގޮތުން ފުލުހުންގެ ބަހެއް ނުލިބުނެވެ.

ހުކުމުގައި ތިއްބެވި ސިޔާސީ ލީޑަރުން ދޫކޮށްލަން ގޮވާލައި މިދިޔަ މަހުގެ 1ގައި ސުޕްރީމް ކޯޓުން ނެރުނު އަމުރާ ގުޅިގެން، ކުއްލި ނުރައްކަލުގެ ހާލަތު އިއުލާންކޮށް މިހާތަނަށް 25 އަށް ވުރެ ގިނަ މީހުން ހައްޔަރުކޮށްފައިވާ ކަމަށްވެ އެވެ. އޭގެ ތެރޭގައި އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދާއި ކުރީގެ ރައީސް މައުމޫން އަބްދުލްގައްޔޫމާއި މަޖިލީހުގެ މެމްބަރުންގެ އިތުރުން ސިފައިންނާއި ފުލުހުންތަކެއް ވެސް ހިމެނެ އެވެ.

މި އެންމެންގެ މައްޗަށް ކުރަނީ ގާނޫނީ ސަރުކާރު ވައްޓާލަން އުޅުނު ކަމުގެ ތުހުމަތެވެ.