އަބޫބަކުރު ސްކޫލްގައި އިހްތިޖާޖް ކުރި ދެ މުވައްޒަފަކަށް އެޑިއުކޭޝަނުގެ އިންޒާރެއް

މުސާރައަށް ކުރިއެރުން ނާންނަ ކަމަށް ބުނެ ގދ. ތިނަދޫ އަބޫބަކުރު ސްކޫލުގައި އިހްތިޖާޖު ކުރި އިދާރީ މުވައްޒަފުންގެ ތެރެއިން އިސްކޮށް އުޅުނު ދެ މީހަކަށް، އެފަދަ ކަމެއް ދެން ނުކުރުމަށް އަންގައި، އެޑިއުކޭޝަން މިނިސްޓްރީން މިއަދު އިންޒާރު ދީފި އެވެ.

މުސާރައަށް އައި ކުރިއެރުން ކުޑަވުމާއި މުސާރަ ދިނުމުގައި ގިނަ މައްސަލަތަކެއް ހުރި ކަމަށް ބުނެ މި މަހު އެކެއްގައި ކުރި އެ އިހްތިޖާޖުގައި ރާއްޖޭގެ ބައެއް އެހެން ސްކޫލުތަކުގެ އިދާރީ މުވައްޒަފުން ވެސް ބައިވެރިވި އެވެ. މުސާރައިގެ މައްސަލައިގައި ހިތްހަމަނުޖެހުން ފާޅުކުރުމުގެ ގޮތުން އެ މުވައްޒަފުން އެ ދުވަހު ސްކޫލަށް ދިޔައީ ކަޅު ހެދުމުގަ އެވެ.

އަބޫބަކުރު ސްކޫލުގެ އިދާރީ ހުރިހާ މުވައްޒަފުންހެން އެ އިހްތިޖާޖުގައި ބައިވެރިވި ނަމަވެސް އެޑިއުކޭޝަން މިނިސްޓްރީން އިންޒާރު ފޮނުވާފައިވަނީ ދެ މުވައްޒަފަކަށެވެ. "މިހާރު"އަށް އެނގިފައިވާ ގޮތުގައި އެ އިހްތިޖާޖް ރޭވުމުގައި އިސްކޮށް އުޅުނީ އެ ދެ މީހުންނެވެ.

އިހްތިޖާޖުކުރި މުވައްޒަފުން ކަނޑާލަން، އެޑިއުކޭޝަން މިނިސްޓްރީން ނިންމާފައިވާ ކަމަށް ބުނެ އެ ސްކޫލުގެ މުވައްޒަފުންނާއި ބެލެނިވެރިން މިއަދު ވަނީ ސްކޫލު ދޮށުގައި މުޒާހަރާ ވެސް ކޮށްފަ އެވެ. އެގޮތުން ބެލެނިވެރިން ސްކޫލު ދޮށަށް އެއްވެ އެކަމާ ދެކޮޅަށް އަޑުއުފުލި އިރު، ޓީޗަރުން ވަނީ ކިޔަވައިދިނުން ހުއްޓާލައި ކްލާސްތަކުން ނިކުމެފަ އެވެ.

"ހެނދުނު އަޅުގަނޑުމެންނަށް އެނގިފައި އޮތީ އެ މުވައްޒަފުން ކަނޑާލަން ނިންމާފައިވާ ކަމަށް. އެ މީހުން އިހްތިޖާޖް ކުރީ ހައްގެއް ހޯދަން. އެހެންވެ، އެފަދަ ފިޔަވަޅެއް އެޅުމާ ދެކޮޅަށް އަޅުގަނޑުމެން މުޒާހަރާ ކުރީ،" އެ ސްކޫލުގެ ޓީޗަރަކު، ނޫހުގައި ނަން ނުޖެހުމަށް އެދި، ބުންޏެވެ.

"އެކަމަކު ފަހުން އެ މުވައްޒަފުންނަށް އިންޒާރުގެ ސިޓީ ފޮނުވުމުން އަޅުގަނޑުމެން އަލުން މަސައްކަތަށް ނިކުތީ،"

މި މައްސަލައިގައި ވާހަކަ ދައްކަން ސްކޫލުން ވަނީ ދެކޮޅުހަދާފަ އެވެ. އަދި އެޑިއުކޭޝަން މިނިސްޓްރީން ވެސް މިކަމާ ގުޅޭ ގޮތުން ބަހެއް ނުލިބުނެވެ.

"އެޑްމިން ބްލެކް ޑޭ"ގެ ނަމުގައި އިދާރީ މުވައްޒަފުން އިހްތިޖާޖް ކުރީ މުސާރަ ބޮޑުކޮށްދޭނެ ކަމަށް މީގެ ތިން އަހަރު ކުރިން އެޑިއުކޭޝަން މިނިސްޓްރީން ވީ ވައުދު ފުއްދާފައި ނުވާތީ އާއި މި ފަހުން ސިވިލް ސާވެންޓުންގެ މުސާރަ ބޮޑު ކުރިއިރު އެކަށީގެންވާ މިންވަރުގެ ކުރިއެރުމެއް ސްކޫލްތަކުގެ އިދާރީ މުވައްޒަފުންނަށް ލިބިފައި ނުވާތީ ކަމަށް ބުނެ އެވެ.

އޭގެ އިތުރުން ތައުލީމީ ފެންވަރަށް ބަލައި މުވައްޒަފުންނަށް ކޮލިފިކޭޝަން އެލަވަންސް ނުދިނުމާއި އެހެން އޮފީސްތަކުގެ އިދާރީ މުވައްޒަފުންނާ ސްކޫލުތަކުގެ އިދާރީ މުވައްޒަފުންގެ މުސާރާގައި ތަފާތު ހުރި ކަމަށް ވެސް އެ މުވައްޒަފުން ބުނެ އެވެ.